「米」豬年 - 包蘿萬有『瑤柱臘味蘿蔔糕』- 2019

新年指定動作，屋企必備嘅「蘿蔔糕」。如果自己食，可以留待年廿九先做，但送比人就最後今日啦！嚟緊又返工，又團年飯，冇時間做啦！今日仲要一次過做齊兩款糕添（蘿蔔糕同芋頭糕）。好彩今年減左產，所以可以輕鬆完成，絕對難吾到我（姐姐）呀！哈哈。

今次我又改左少少做法，因為希望可以同時間處理兩款糕囉，其實都係駁吓咋，鬼叫我心口有個勇字咩，好彩冇令我失望，仲好有驚喜呢！

一早準備晒材料（臘味同瑤柱），然後炒香備用。之後就刨蘿白，然後蒸，蒸到透明即代表得啦！蒸完大約有一杯水，可以用嚟開粉。趁蒸緊就可以處理芋頭（刨皮切粒），當煲水嘅時候，就可以開粉。真係忙到冇停手，要爭取每一分每一秒。最緊要吾好亂，一步一步嚟，頭腦要清晰，安排要有序。

下年又可以跟呢個蒸蘿蔔做法，吾怕炒蘿蔔出太多水，比以往更容易控制。

材料：（3 x 680ml 盒)
白蘿蔔　　1500g
粘米粉　　160g
澄麵　　　40g
臘腸　　　3-4條
瑤柱　　　3-4粒
乾蔥茸　　1湯匙
水　　　　150g（浸過瑤柱水）
水　　　　150-200g（蒸完蘿蔔水）

調味：
蠔油　　　1⅓湯匙
鹽　　　　⅓茶匙
糖　　　　1茶匙
雞粉　　　1½茶匙
胡椒粉　　少許

預備：

1. 蘿蔔洗淨刨／切粗絲（筷子粗度），大火隔水蒸30分鐘（透明／軟身／淋），蘿白水留用。
2. 瑤柱略沖洗，加160ml水蒸軟（約30分鐘），放涼後撕開一絲絲備用，瑤柱水留用。
3. 用熱水浸洗臘腸（清洗表面灰塵），然後蒸軟（約15分鐘），放涼後切細粒備用。
4. 粘米粉，澄麵，調味料及水（瑤柱水及水共300g）拌勻，備用。

做法：

1. 燒熱鑊，加少許油炒香臘腸，然後加入乾蔥茸炒香，再加入瑤柱絲炒至乾身，盛起備用。
2. 燒熱鑊，倒入蘿蔔，加入2/3臘味料炒勻，熄火。
3. 倒入粉漿炒勻，開中細火，邊攪邊炒至杰身糊狀。
4. 入模至9成滿，掃平，放上臘味料，大火隔水蒸60分鐘或至熟。
5. 可趁熱食或放涼後存入雪櫃，食前取出切件煎香即可。

蘿蔔蒸熟後，隔出水份。

蘿蔔水可以用嚟開粉

如太杰可加少許水