「米」豬年 - 甜爺爺『椰汁年糕』 - 2019

2019第三款年糕『椰汁年糕』，其實即係古法年糕加入椰漿，係我最鍾意嘅質感同味道。

我一直都覺得糯米粉有陣粉味，就算用上最靚嘅李祥和糯米粉，一樣都會有，但如果加入椰漿，就可以蓋過粉味啦！這就是我鍾意椰汁年糕嘅最大理由啦！

今次造型要優雅有優雅，要可愛有可爰，要四正有四正（外賣）。其實無論咩造型，內涵先至最重要。

簡約、優雅、懷舊造型（新鮮出爐樣貌）

可愛、童話、吸睛造型（雪了兩日樣貌）

簡約、大方、高雅禮盒裝

室溫放涼一晚後樣貌

材料：（4 x 680ml盒）

糯米粉　　　　　810g

粘米粉　　　　　90g

增城蔗糖　　　　220g

大糖　　　　　　500g

水　　　　　　　600g
椰漿　　　　　　400g

花生油或菜油　　1湯匙

注意：因今年買的增城蔗糖，味道同顏色都比舊年淡，所以份量同比例多左少少。

做法：

1. 蔗糖，大糖加400ml水中火煮滾，再轉細火繼續煮溶，最後加入油拌勻，過濾一次，放暖備用。
2. 將椰漿及200ml水加入粉內，用木勺攪勻，再逐少加入糖水攪拌成麵糰，然後轉用手（戴上手套）搓至光滑。
3. 再逐少倒入糖水，繼續用手搓，搓至變回粉漿形態（如質感太杰，可加水少許水）。
4. 將粉漿用篩過濾兩次（隔走氣泡），然後倒入糕模，大火隔水蒸1-2小時或至熟。
5. 出爐後，待完全放涼，放入雪櫃儲存。

【增城蔗糖】增城黑皮蔗，每年只得冬季一造，收割時間一般在農曆10月至農曆新年前。蔗糖以純竹蔗榨汁煮煉而成。純正蔗糖有竹蔗味道，而且一滅就斷。

【大糖】顏色帶橙紅，帶有麥芽糖香味，勝過一般片糖做年糕，通常會在農曆新年前買到。

用淨嘅大糖同蔗糖，最好抽真空包裝，然後放冰格儲存。