「米」豬年 - 紅運當頭『紅豆年糕』 - 2019

今晚其實想做生磨糯米年糕（攪拌機版），但驚時間有D趕，又吾想有壓力，所以最後放棄了。不過，我冇偷懶到，有做嘢架，只係轉番用糯米粉咋。哈哈。

今年做左幾款年糕，全部都係冇餡嘅，口感比較單調，所以今日特登做一個，加入紅豆嘅年糕，令口感更加豐富同實在。

其實呢款年糕，我吾係未做過，記憶中.....可能、應該、或者都有10年啦！

不過，十年人士幾翻身，今時今日嘅我，已經吾同晒啦！因人會進步，糕都會進步架！

材料：（2 x 1L盒）

糯米粉　　　　　480g

澄麵　　　　　　120g

增城蔗糖　　　　233g

大糖　　　　　　233g
紅豆　　　　　　150g

紅豆水　　　　　330g
椰漿　　　　　　400g

花生油或菜油　　1湯匙
水（後備）　　　適量

做法：

1. 紅豆浸兩小時，然後煮淋（保持原狀，不要起沙），隔出紅豆，紅豆水留用。
2. 取紅豆水300g加蔗糖及大糖中細火煮溶，加入油拌勻，放暖備用。
3. 將椰漿加入糖水內拌勻，然後倒入粉內拌勻至冇粉粒（太杰可加少許水）。
4. 將粉漿過濾兩三次，然後加入紅豆拌勻，倒入糕模，大火隔水蒸1小時或至熟（要視乎模具大小）。
5. 出爐後，待完全放涼，然後放入雪櫃儲存。
6. 食前取出，切件煎食即可。

【增城蔗糖】增城黑皮蔗，每年只得冬季一造，收割時間一般在農曆10月至農曆新年前。蔗糖以純竹蔗榨汁煮煉而成。純正蔗糖有竹蔗味道，而且一滅就斷。

【大糖】顏色帶橙紅，帶有麥芽糖香味，勝過一般片糖做年糕，通常會在農曆新年前買到。

糖水加椰漿

糯米粉加澄麵

煮淋熟紅豆

完成粉漿，加入紅豆拌勻。

用淨嘅大糖同蔗糖，最好抽真空包裝，然後放冰格儲存。