今日好特別，竟然教大家煮飯，不過吾係普通白飯，而係糯米飯。
其實買左個電飯煲咁耐（可煮糯米飯），但都未試過用嚟煮糯米飯，所以今次都有D擔心，驚失敗呀！
其實以前都有煮過糯米飯，不過要將糯米浸三個鐘，然後隔水用明火或水波爐蒸熟，蒸大約一個鐘。由準備到完成，大約須時4小時。
因為今次係第一次關係，所以我5點半就開始煮，如萬一失敗，都有時間比我補飛嗎（再煮過白飯）！
當聽到電飯煲完成響聲時，我第一時間進行測試（試食同試質感），好彩完全掂呀！冇生米，又冇爛patpat，簡直perfect呀！以後想食糯米飯，真係好方便呀！吾洗預先浸米，想食可以即刻煮，正！
糯米粒粒分明
聲明先，我非東芝代言人，只係想分享吓用家心得啫。其實我已用過多個品牌電飯煲，但冇一個係吾甩塗層嘅。
唯獨東芝厚斧電飯煲（之前果部$5XX），竟然用左9年（直接內鍋洗米），個內膽都冇甩塗層。只係粒內置電磁用到冇電（5年），但又冇得換，所以先會考慮換部新咋（都考慮左4年，哈哈）。
其實年中Sogo大減價前兩個月，已睇中下面果部電飯煲（抵用），點知專櫃竟然話冇貨，話有貨通知我。到左大減價最後一日（咁啱經過），諗住上去睇吓有冇貨啦！竟然有呀（但冇人通知我）！仲減左$200，賣$798咋（原價$998），我就用左之前換嘅Sogo禮劵$800買啦（我特登用信用卡積分換定嚟買電飯煲），真係超抵，淨左$2仲用嚟買埋膠袋。
舊嘅都冇嘥架，我比左姐姐拎返印尼。
聽講銅鍋傳熱均勻
飯煲可煮白米、混合米、糯米、煲粥、發酵、焗蛋糕、溫泉蛋。
材料：
長糯米 2杯（平滿）
臘腸 2條
潤腸 2條
虎蝦乾 7隻
細冬菇 8粒
雞湯（或水）1.5杯
紹酒 半湯匙
甜豉油：
乾蔥片 1粒
生抽 4湯匙
老抽 1湯匙
砂糖 1茶匙
做法：
- 糯米洗淨，瀝乾水，倒入電飯煲內膽，加雞湯（或水），然後以白米模式煮熟。＊我個電飯煲煮白米須時45分鐘＊
- 冬菇浸軟，洗淨切粒備用。
- 蝦乾加水浸泡10分鐘，洗淨切粒備用。
- 臘腸潤腸用滚水浸泡5分鐘，洗淨切粒備用。
- 燒熱1湯匙油，加入乾蔥，細火炒至金黃色，加入生抽老抽及糖煮溶，隔走乾蔥。
- 燒熱白鑊，加入臘味，炒至出油，加入蝦乾及冬菇炒熟，再圍鑊邊加入紹酒炒勻，最後加入少許甜豉油炒勻。
- 飯熟後，將飯抓鬆，加入臘味撈勻，再逐少加入甜豉油（試味），撈勻即可。
