其實上年已想浸荔枝酒，但因季尾買吾到靚荔枝，所以始終都浸吾成。
時間過得真快，又係荔枝開鑼嘅季節啦！早幾日惠康購物時，見到有荔枝「妃子笑」，青BB，細細粒，要$3X盒（約一磅多d），好似都幾貴咁，所以最後都冇買到。
今日經過街市，又見到有「妃子笑」，$18磅，見檔主切開左幾粒陳列，見佢大粒d，核仔又細細（好似糯米糍），所以買左兩磅，跟手再去埋惠康買左兩枝桂花陳酒。
返到屋企，當然立即開工啦！首先浸洗荔枝，然後消毒玻璃樽，再。。。。。荔枝去殼時，已聞到陣陣飄香，阿女仲忍吾住偷食左幾粒添。
吾知生果檔係咪呃人，因為d荔枝起碼有一半係大核架。其實大核同細核嘅荔枝除左粒核吾同大細外，仲有味道都吾同架。大核荔枝味道係清甜帶微酸（似桂味），細核就濃甜（似糯米糍）。
講吓桂花陳酒先，顏色係偏紅，聞落估吾到又幾香喎（我覺得比米酒同清酒香好多）。將桂花陳酒加埋荔枝浸，出嚟嘅成品，我估應該都幾好飲（浸緊都已咁香），不過要等半年後至可以報告給大家知，好啦！半年後就有得飲啦！
材料：
荔枝 900g（淨肉 536g）
桂花陳酒 1L
2L玻璃樽 1個
做法：
- 荔枝洗乾淨，放架上風乾。
- 玻璃樽洗乾淨，用滾水烚10分鐘（我用左水波爐100度蒸氣蒸10分鐘）。
- 蒸完倒轉放架上風乾
- 荔枝去殼去核
- 用材料以外桂花陳酒（100-150g），將每粒荔枝肉沖洗一下（清洗表面），然後放入玻璃樽。
- 倒入桂花陳酒（最多7-8成滿）
- 密封好，存放陰涼地方，待半年後可飲用（1年後會更純）。
註：荔枝 ：酒 （1 ：1至2，隨意）
荔枝洗乾淨
風乾
玻璃樽消毒
風乾
荔枝去殼
去核
核大細相差好大
用酒沖洗吓荔枝
然後入樽
倒入酒至7/8成滿
密封好，存放陰涼地方半年。
＊12/6/2016 買多兩磅荔枝（今次係姐姐買，$20兩磅，吾係妃子笑，吾知係咩名堂。），一枝桂花陳酒（阿女幫我買），再浸多一樽，半年後可以送一樽比媽媽。
