雜錦牛油曲奇

今日終於到左最後一日假期啦，雖然只得一個人，但我都吾會悶，因為已習慣晒啦！其實留響屋企hea吓都吾錯呀！

不過。。。其實。。。我今日係有個特別任務，就係幫阿女準備D小禮物，做比佢派街坊。哈哈，其實阿女平時都好鍾意同我落order架。但今次就誇D，佢話要派三日喎，仲吩咐我要整D擺得，可以keep得耐D嘅野。（咁我又點出到街呢！嗚嗚嗚！）

講番今次嘅手作，原本我係想整唧花曲奇，但屋企又冇金桶牛油，所以咪轉用無鹽牛油囉！點知。。。加完粉。。。攪完團。。。之後。。。直覺話比我知，應該係唧吾出嘅！哈哈。因為太杰啦！要唧！一定會手殘兼爆袋。所以，算把啦！放棄啦！

呢個故事係教訓我，以後要做唧花曲奇，一定要用番金桶牛油。但今次都吾會嘥左嘅，都可以做其他曲奇嗎！

當做完第一條朱古力時，感覺好似有d單調，於是做第二條咖啡時，就即刻補飛，加左d原粒已烘杏仁（之前用淨），到第三條綠茶啦！又加乜好呢！哈哈！好彩有d食淨嘅韓國蜜糖杏仁啫，咁又可以順便清倉啦！

用一個麵團，做齊3種味道（朱古力、咖啡杏仁同綠茶蜜糖杏仁），可以一次過滿足晒你嘅胃口掛。

今次都係第一次用唧花材料嚟做切片曲奇，真係錯有錯著，估吾到效果又吾錯喎。口感鬆化，好似食緊唧花曲奇一樣，只係外型吾同啫，以後可以繼續做呢個食譜。

材料：（15-18塊）

無鹽牛油　240g
糖粉　　　90g
低筋粉　　195g
粟粉　　　75g

配料：
已烘杏仁，開心果或其他果仁

＜咖啡味＞

咖啡香油1/2茶匙 + 低筋粉5g + 粟粉5g
或 咖啡粉8g

＜朱古力味＞

無糖可可粉10g

＜綠茶味＞
烘烤用綠茶粉8g

做法：

1. 牛油加糖粉打發至乳白
2. 篩入低筋粉及粟粉拌勻
3. 平均分3份，分別加入咖啡香油或咖啡粉，可可粉及綠茶粉拌勻。
4. 將麵團造型（長，圓或三角等），放入冰格雪一小時以上至硬。
5. 取出曲奇，用利刀切片（約5mm厚），然後排放在已鋪牛油紙的焗盤上，放入已預熱150度焗爐，焗20分鐘至熟。