阿婆年糕『竹葉年糕』

一直好想整呢款年糕，但本身未見過，亦未食過，只係聽阿媽講過。媽咪曾經同我講，呢款有葉包住蒸嘅年糕好好味（可能係佢兒時味道），所以我就幫個糕改左呢個名～『阿婆年糕』。雖然只係第一次，但賣相都算吾錯喎！

因為未見過實物，所以吾知用糭葉啱吾啱。我都有考慮過，究竟用蕉葉好？定係糭葉好？最後，我揀左糭葉（因買到），嘻嘻，駁一駁啦！鬼叫我心口有個勇字咩，（遲Ｄ再試蕉葉）。

今次除左加糭葉外，仲轉左用椰糖，椰糖味道比較香濃，還帶少少焦香味，而蔗片糖就缺少了一種獨特的味道，而且還少了一種香氣。

但如果鍾意清淡嘅，都可以繼續用片糖，蔗片糖或其他糖，因為自家製就係可以隨個人喜好而轉變，並無限制嘅。

材料：（6"）
糯米粉　260g
澄麵　　40g
椰糖　　220g
椰汁　　220g
熱水　　140g
糭葉　　3片

做法：

1. 椰糖加熱水煮溶，放涼備用。
2. 糭葉洗乾淨，烚10分鐘，抹乾，修剪頭尾，光滑一面向上，掃少許油，然後鋪入模。
3. 糯米粉，澄麵及椰漿混合，逐少倒入糖水，用手搓或廚師機攪拌至幼滑粉糰。
4. 成糰後，再逐少加入糖水，攪拌成粉漿。
5. 將粉漿過濾2-3次，然後倒入模（葉面），大火隔水蒸60分鐘至熟（用竹纖測試）。

貼士：
可在模面放一對筷子（左右兩邊），然後再放上錫紙蓋住（不要密封）。作用是阻隔倒汗水，亦可避免蒸氣從面打入造成凹陷。