相信呢個應該係本年度最後一場年糕show，因為嚟緊嘅假期無多，都係時候輪到蘿蔔糕同芋頭糕出場啦！
今次轉用左天然古法紅糖，顏色明顯比用其他糖深色好多（亦可能冇椰漿關係）。其實今次除左轉用紅糖外，最特別係用左麵包機幫拖呀！哈哈。
首先，第一步將糯米粉放入包筒，然後逐少加入暖糖水，慢慢搓成團，做到幼滑麵團，第二步就係將麵團再加暖糖水開成粉漿。今次全程都係靠晒麵包機，一手一腳全包宴，無需要我出「手」。
雖然製作過程同時間比手搓耐，但其實又好似好方便。講真，麵包機搓有咩好？好咪好在粉漿好幼滑，又冇粒粒囉，重點係吾洗攪到手殘呀！而缺點就係每次份量吾可以多，一來裝吾晒，二來傷機嗎（負荷太重）！對於今次嘅表演／表現，算係我今年最滿意嘅年糕，因為有我最愛的卡通人物同場加影囉！
*22/1補充：
雪左一晚後脫模（冇掃油，冇技巧），你睇，米奇同吉蒂嚟啦！嘩！好。。好。。好。。好靚呀！真係忍吾住要講多幾個好呀！仲係超級無敵「帥、靚、正」啊！Super Q！
我最愛嘅Mickey同Kitty，你地靚成咁，我又點捨得食左你地呀！嘻嘻。
材料：
古法紅糖 400g
糯米粉 600g
熱水 300g
凍水 300g
做法：
- 紅糖加熱水煮溶（不需煮滾），熄火後加入凍水拌勻成暖糖水。
- 糯米粉加暖糖水用手或廚師機搓成團，然後再逐少加入暖糖水開成粉漿。
- 粉漿過濾2-3次，然後倒入模至9成滿，大火隔水蒸1小時至熟。
貼士：年糕最好雪一晚才脫模
天然古法紅糖
古法紅糖樣貌比較粗糙（似沙粒同碎石）
古法紅糖加熱水煮溶（不需煮滾），熄火後加入凍水拌勻成暖糖水。
糯米粉放入包筒，然後加適量暖糖水，搓成麵團。
搓成麵團
再逐少加入暖糖水，開成粉漿。
將粉漿過濾2-3次（可更幼滑）
倒入模（卡通模可倒到邊位）
大火隔水蒸45分鐘時至熟，出爐後放涼一晚，然後放雪櫃儲存。
