冰糖陳皮燉檸檬

記得第一次見人整呢款燉檸檬，已經係一年前嘅事啦（可能我未見過啫）！好似都幾特別，味道應該都會吾錯（比咸柑桔咸檸檬）。不過製作時間就。。。真係好花時間，而且仲有難度，難係難在要睇實，吾可以行開（出街）。假如用水波爐燉，連續燉12小時，每隔25分鐘加水及倒水一次，咁咪好吾得閒！坐定定係度，企定定係度囉！明火又點呢？一樣要定時加水，仲要睇火添。所以。。。我都係放棄算啦！

直至兩星期前，上網無意再見到燉檸檬，不過佢係賣嘅！仲要吾平，$150/300g。所以我就再搜尋吓做法，見到大致都差不多，只是材料份量不同，燉法不同啫。最吸引我其實係佢嘅功效（大家想知，可上網搜尋），因為好啱老公飲，所以我就立即行動，親手買材料，親手做每個step，確保冇甩漏，絕對食得放心及安心。

識我嘅都知我嘅作風，一係吾做，做就當然要做到最好啦！首先，我要從材料入手，第一樣就係要買好料，咁就可以食好料啦！求其就不如吾好做啦！吾好嘥錢，嘥時間，最慘係嘥心機。所以今次用了十年老陳皮，新鮮大檸檬，仲有原蔗冰糖。

好啦！一切準備就緒，就可以開得工啦！我與坊間做法最吾同，就係用左真空煲。足足燉超過24小時，出爐啦！你睇。。。色香味全。自家製燉檸檬，天然無添加，色澤晶瑩，味道醇厚回甘，益處仲多多添。Cheers！

以下是參考網上多款食譜，經研究、推理、考慮、再加以斷估，終於創作左一個屬於自己嘅食譜。我嘅食譜既環保（慳水慳電慳煤氣），又慳時間（吾洗及實，可以出街），大家不妨參考吓啦！

材料：

新奇士檸檬　12個（大）

10年老陳皮　30g

原蔗冰糖　　900g

食用梳打粉　2茶匙

水　　　　　適量

工具：

玻璃樽　　　3個（500ml）

準備：

1. 食用梳打粉加水開勻（浸過檸檬），放入檸檬浸30分鐘，然後清洗乾淨，抹乾水份後風乾。
2. 陳皮浸軟，刮去囊，清洗乾淨，抹乾水份後風乾。
3. 檸檬切掉頭尾，然後切薄片，挑走中間白芯及核（芯同核會影響變苦）
4. 陳皮切去果椗，然後疊起捲起（可以快D）切幼絲。
5. 玻璃樽洗淨，滾水烚10分鐘消毒，然後風乾。

做法：

1. 先在細內鍋底鋪一層檸檬，然後放上陳皮絲，最後鋪上蔗冰糖。重複以上步驟直至完成。
2. 蓋好放入大內鍋，燉24小時（每隔4小時取出加熱15分鐘一次，睡眠時間除外。）
3. 使用真空煲，水份蒸發輕微，有需要可加少許熱水。（全程我只加了一湯勺）

貼士：

1）可選擇其他燉法：

　　- 明火：隔水燉12小時，中途要加水。

　　- 蒸爐：蒸12小時，中途要加水及倒水。

2）全部工具及食材都不可以有水份，必需澈底風乾，否則容易變壞或發霉。

3）室溫可儲存3個月

4）開封後要存雪櫃，用沒有水份的匙取出，開熱水飲用（可加蜂蜜）。

功效：
冰糖陳皮燉檸檬是傳統養生食品，因檸檬有清熱下火、化痰功效，同時檸檬皮嘅袪痰功效遠比柑橘還強，所以能對喉嚨痛、止咳祛痰、潤喉、預防咽喉炎、慢性支氣管炎、感冒後喉嚨癢有顯著改善作用。 

檸檬風乾中

檸檬切薄片及挑走核同芯

陳皮風乾中

陳皮切幼絲

將材料放入細內鍋

蓋好

放入大內鍋，要先試水位（不能太滿，要預留空間），然後可取出。

將水煲滾

然後放入細內鍋，滾起後轉細火煮30分鐘。

將大內鍋放入外鍋內，每隔4小時取出加熱15分鐘一次。

10小時後情況

只剩下一半

在外鍋內保存3小時後，溫度仍保持80度。

（一個有效的真空煲，能有效保持食物溫度在70度以上超過8小時。）

完成啦

已消毒玻璃樽，風乾中。

陳皮檸檬襯熱盡快入樽，關上蓋，然後倒轉（排走空氣造成真空狀態），待自然放涼後，可反轉存放陰涼位置。可保存3個月（如儲存得好，可保存半年），開封後就需存入雪櫃，盡快飲完。