本來我係諗住做日式芝士蛋糕架，但後嚟又想試吓玩新野播，所以咪整左呢個。。。從未試過/食過/做過嘅。。。戚風蛋糕囉！
因為隨意隨便咁亂試，所以都好想快Ｄ試啖咩效果。最後做出嚟都算成功，只係芝士味道比較清淡，吾夠出。而蛋味就比平時原味淡，但我鐘意（吾會太大蛋味）。下次可以重手Ｄ，又或者加Ｄ巴馬臣芝士增加芝士咸香味，希望令芝士味更突出。
材料：（8”）
［蛋黃糊］
蛋黃6隻
砂糖50g
牛奶40g
菜油40g
低筋粉100g
忌廉芝士100g
［蛋白霜］
蛋白6隻
砂糖50g
檸檬汁1茶匙
粟粉1茶匙
做法：
- 蛋白慢速打散，然後轉高速打至起泡，分3次加入糖打勻，最後一次同時加入檸檬汁及粟粉打勻至硬性泡沫，轉慢速打多一分鐘。
- 忌廉芝士室溫放軟，加糖用電動打蛋器打至幼滑。
- 逐少加入牛奶打勻，然後加入菜油打勻，再加入蛋黃打勻，最後篩入低筋粉拌勻。
- 將蛋白霜分3次拌入蛋黃糊內，拌勻後倒入模。
- 放入已預熱170度焗爐焗40分鐘，出爐後立即倒扣，放涼後可脫模。
蛋白慢速打散
然後轉高速打至泡沫狀（冇透明）
將糖分3次加入，打勻一次後才加第二次，最後一次同時加入檸檬汁及粟粉，繼續打至出現紋路，就要小心留意，不時檢測效果。當提起時會出現倒大三角鈎，就即代表差不多（要停手了），千萬不要打過龍。
蛋白霜表面細滑，有光澤，不粗糙。可以轉用慢速再打多一分鐘，打走大空氣，令蛋白霜更幼滑。
忌廉芝士加糖打至幼滑，加入牛奶打勻，然後加入菜油打勻，再加入蛋黃打勻，最後篩入低筋粉拌勻。然後將蛋白霜分3次加入蛋黃糊內拌勻。
倒入模，提起模在檯面敲兩下，然後放入已預熱170度焗爐，焗40分鐘。
出爐後放高架（離檯面約6"），放涼後可脫模。
