做叉燒都吾係第一次，但想做出好味又淋滑嘅叉燒，就吾係咁簡單。記得對上一次整叉燒，不但淋滑，仲好juice添，人人食完都讚佢係最好食嘅一次。
時間過得真快，原來已經差不多一年冇整過啦！因為如果想整叉燒食，真係不可假手於人，每次都必定要親身去買，去街市揀舊靚豬肉至買。所以如果買吾到，就令願吾做。點解咁耐都冇整？一話賣晒，一話冇時間。。。就係咁啦！嘻嘻。
今日好好彩，兩點去到街市，隨口問吓豬肉佬（心諗都冇啦），有冇靚梅頭做叉燒用梅頭呀？點知佢竟然答：你好彩，我收埋左一舊。然後佢就去雪櫃拎左舊梅頭出嚟（每次都係收埋，今次都吾例外），仲話費事掛出嚟，切散晒冇人買（因佢吾切開，想成舊賣，所以收埋。），經我左望右望後，驗過後，都過得去嘅，好過冇啦！咁咪買起佢囉！
其實大家會問，點為之係靚梅頭呢（啱整叉燒）？咁就等我介紹吓啦！首先，揀一舊靚梅頭，然後就係要識切。點切至啱？就係要直紋切，吾好似牛扒咁逆紋切，雖然切開好靚，油花分佈好好，但絕對吾適合做叉燒。因為吾好忘記，當你焗完切片時，每片都會係順紋，一Ｄ都吾肥美，食落仲會覺得粗鞋添。所以一定要將梅頭順紋切開，切開會見到一間間打直白色肥豬肉（如圖）。當焗完切片時，就會見到逆紋，食落吾會覺我韌，亦吾會覺得粗糙啦！
大家食／買叉燒，有冇食過三粒肉呢？係叉燒最好食嘅部份，一粒肉，一間肥，一粒肉，一間肥，一粒肉。不過一舊梅頭，最多都係得兩三條。所以想要買到，最好就同豬肉檔訂定啦！
嘩！超正呀！好食到冇朋友呀！冇呃你架，快Ｄ試吓親手做啦！
不過，咪話吾提你，食過後，真係冇得返轉頭。哈哈！
梅頭 2斤（約10"長x1"厚）
生粉 4湯匙
醃料：
生粉 4湯匙
砂糖 5湯匙
幼鹽 1湯匙
雞粉 1/2湯匙
海鮮醬 2湯匙
蠔油 2湯匙
芝麻醬 1/2湯匙
生抽 1/2茶匙
老抽 1/2茶匙
乾葱茸 1/2湯匙
蒜茸 1茶匙
玫瑰露 1/2湯匙
雞蛋 1隻
掃面：
麥芽糖 適量
熱水 適量
做法：
- 梅頭洗乾淨（不用瀝乾水），加生粉拌勻醃4小時（放雪櫃）。
- 4小時後，取出沖洗乾淨，瀝乾。
- 梅頭先抹上生粉，然後放入醃料（先混合）拌勻，放入保鮮盒存雪櫃醃一晚。
- 梅頭放入密實袋，汁留用（放雪櫃），袋口向上（不要入水），放入70度水裡面，將袋緊貼肉將空氣排壓出，然後拉鏈封口。
- 蒸氣70度浸煮2.5小時（或慢煮棒），取出梅頭放烤架上，掃上留起的醃汁（兩面），放入已預熱240度焗爐，焗10分鐘。
- 取出反轉，再掃一次醃汁（兩面），再焗10分鐘。
- 取出掃上糖漿（兩面），放入已預熱240度焗爐焗5分鐘。
- 取出反轉，再掃一次糖漿（兩面），再焗5分鐘。
- 出爐後，可將淨餘糖漿掃上叉燒，放涼後切件即可。
梅頭洗乾淨
呢舊就係三粒肉啦！
加生粉醃4小時，作用是代替啤水，去血味。
將生粉沖洗乾淨
加醃料醃一晚
梅頭放入密實袋，放入70度水中，將袋緊貼肉排壓出空氣，拉鏈封口，可用夾固定袋口。
蒸氣浸煮2.5小時後，取出梅頭放烤架上。
掃上醃汁
