古早蛋糕（4S）

再來古早，一樣的食譜，換左個深模，出嚟真係高大靚仔D喎，只可惜因為影相果兩分鐘，遲左少少出爐，就搞到個蛋糕面爆左添。

低溫慢烤叉燒（4S）

自從上年豬瘟後, 已好耐冇買過新鮮梅頭做叉燒啦！呢段時間，當然有做過叉燒，仲試過急凍同冰鮮（柳梅、豬腩、五花腩），但始終都同新鮮冇得比。

最近HKTVmall購物，無意中發現有呢隻梅頭芯，喂呀！就係佢啦！以前我去肉檔，就係買呢個部份啦！

今次呢舊梅頭都幾大舊，有成3斤重呀！我係第一次切咁大舊肉，真係有Ｄ呢HEA啊！好彩把孖人牌夠利咋。哈哈。

慢烤叉燒真係超淋，慢工出細貨，真係冇講錯。

鳳梨餡

今日25/9星期五，是日放假一天，先去銀行處理吓帳戶，然後再去和富fusion shopping吓，睇吓有冇荀貨。一入門口，就見到又平又大又新鮮嘅地們金菠蘿，最後忍吾住買左3個。結果shopping就要在此結束。因為拎住3個菠蘿，邊度都吾洗去啦！哈哈。抬住3個大菠蘿返屋企，沿途只能掂行掂過，專心向前，因為我實在無力挽了，哈哈。

幾經辛苦，終於安全返到屋企，不過雙手已吾屬於自己啦！實在太重，太重，太重呀！以後買嘢真係要量力而為，吾好再做傻事啦！嗚嗚嗚！

希望放多兩日，等菠蘿熟Ｄ，就可以做定鳳梨餡，等遲Ｄ放長假，就可以做鳳梨酥啦！

後記：今日1/10（星期四），尋晚30/9（星期三）終於等到菠蘿熟啦（估吾到要擺咁耐）！可以開工做鳳梨餡啦！不過其中一個仲未熟，所以只係做左兩個。

如見到靚菠蘿，我會買嚟做定餡，等遲D想食鳳梨酥嘅時候，就可以即時有得用。

待鳳梨餡雪一晚後，我會用保鮮紙包成條狀，再放入真空袋，然後抽真空放入冰箱儲存（可保持新鮮又吾怕串味）。