鮮搾蔗汁糕

吾知大家有冇飲過中環荷李活道果間「公利」蔗汁呢？佢地嘅蔗汁係我童年回憶嚟㗎。話時話，我都有年幾冇飲過啦！

今日除夕放早，路過天后一間涼茶鋪 (電器道147號海城洋樓地鋪)，竟然比我發現到有我兒時嘅蔗汁賣呀！仲要大大枝只係賣$26/1L咋，公利細枝賣緊$38/500ml呀！

其實間涼茶鋪係有兩款蔗汁，除左我超愛果款外（粉綠色），仲有另一款係青綠色。青綠色果款，大部份涼茶鋪都會買到，不過我個人就吾like啦！因為冇蔗味，得個甜字，而且仲有澀味添。

2019仲有半個鐘就過，希望大家都好似呢款糕點，喻意『掂過碌蔗』。

臘味糯米飯（電飯煲版）

今日好特別，竟然教大家煮飯，不過吾係普通白飯，而係糯米飯。

其實買左個電飯煲咁耐（可煮糯米飯），但都未試過用嚟煮糯米飯，所以今次都有D擔心，驚失敗呀！

其實以前都有煮過糯米飯，不過要將糯米浸三個鐘，然後隔水用明火或水波爐蒸熟，蒸大約一個鐘。由準備到完成，大約須時4小時。

因為今次係第一次關係，所以我5點半就開始煮，如萬一失敗，都有時間比我補飛嗎（再煮過白飯）！

當聽到電飯煲完成響聲時，我第一時間進行測試（試食同試質感），好彩完全掂呀！冇生米，又冇爛patpat，簡直perfect呀！以後想食糯米飯，真係好方便呀！吾洗預先浸米，想食可以即刻煮，正！

糯米粒粒分明

紫薯椰汁眉豆糕

因之前做眉豆糕淨左D眉豆（已煮淋），所以今日就隨意做左呢個糕啦！

話說屋企有d淨餘物資（眉豆、椰子粉、紫薯粉、馬蹄糕），於是將佢地溝溝埋埋，咁又做左一款新口味嘅糕啦！其實真係好隨意架，哈哈。

蜂蜜咖啡戚風蛋糕

今日又有新出品，吾試又點知咁好味呢！

本來係諗住做咖啡蛋糕，但搞搞吓又想做蜂蜜蛋糕，最後就變成『蜂蜜咖啡戚風蛋糕』啦！二合一，一次滿足兩個願望，哈哈。

眉豆糕

幾年前曾經買嚟食過，但自家制就真係第一次。

因為想消滅堅企盒馬蹄粉，又想消滅埋包紅糖，但又吾想再做馬蹄糕喎，於是就諗起呢個眉豆糕啦！

講真，我對眉糕成份並不肯定，只係靠自己感覺同經驗，估吓估吓囉。其實中式糕點都係萬變不離其宗，所以大家可以吾洗擔心，個糕一定吾會難食嘅，哈哈。

朱古力杏仁燕麥曲奇（零失敗）

仲有兩日又聖誕啦！襯住今日假期，梗係要做d嘢啦！

諗起聖誕就會諗起朱古力聖誕蛋糕，不過用嚟送禮就吾係咁方便，同埋做大量有難度。所以都係揀樣方便快捷，容易又好味嘅曲奇比較適合呢！

今次我加左可可粉同杏仁，未焗已經聞到好香啦！

腰果奶露

第一次煮腰果露，估吾到又幾好味喎（比想像中好）。以前一直都覺得腰果味淡，如做糖水驚吾夠香濃，所以一直都只係煮芝麻糊或合桃露。試過今次後，以後又多樣選擇啦！

今次用嘅係印度腰果，冇過濾過，所以會食到微細腰果粒，如果介意的話，亦可以用篩過濾隔渣一次先煲。

椰汁紫薯糕

今日試玩新嘢，用左紫薯配馬蹄粉，估吾到效果又幾夾喎，味道仲吾錯添。

點解我會咁樣試？係因為之前睇 "香港原味道" 有介紹，所以一直記住，直到今日突然心血來潮，咁咪即刻買料試吓囉。雖然片中並無講份量，但應該吾會難到我掛。

伯爵茶奶凍（無火煮食）

伯爵茶甜品係阿女至愛，所以無論我做乜，只要加左佢（伯爵茶），阿女就實捧場。

其實旱幾日已整過一次，因為用左模，竟然脫吾到，搞到樣衰衰，所以冇post到。今日再嚟一次，用番個樽裝，咁就冇問題啦！仲做左兩杯外賣請人食添。

呢個甜品好簡單，吾洗開火，只要用微波爐加熱就搞掂，認真快靚正。

紅糖薑汁紅棗千層糕

其實我本身就吾太喜好紅棗糕，但有粉絲就非常鍾意，仲想我教吓佢地整添。徇眾要求，就滿足吓你地啦！哈哈。

記得好耐之前，都曾經做過棗泥糕，但今次就有Ｄ吾同，因冇再壓棗蓉啦！今次算係簡易版，讓大家都可以做得舒服Ｄ。如果大家吾怕功夫多，或者鍾意勁紅棗味，亦可以參考番我嘅舊食譜「棗泥糕」。

今次做法相比簡單，只須要煲紅棗水，加糖加粉，就係咁簡單咋。另外，糖方面，可跟個人喜好，鍾意用咩糖都冇所謂（如：冰糖、片糖、黑糖、紅糖、棗糖等）。仲有，呢個做法，成品嘅賣相會比棗泥糕通透，感覺好似靚Ｄ。

*吾知大家睇吾睇到有5層呢？因太細個模，做吾到9層咁多呀！😅

貓爪大菜糕

最近真係好懶，完全冇心情／動力去整嘢食，如果吾係為左個模，應該都吾會肯郁呀！

橫掂都整開啦，就整夠三隻色啦！其實事前我都冇諗過要做色架，只係煮溶大菜後，想搵d嘢玩吓。咁咪隨意抓吓，見屋企有咩咪加咩囉。哈哈。

嘩！期待嘅畫面出嚟啦！真係好靚呀！

（白色＋花奶／紅色＋紅桑子粉／綠色＋綠茶粉）

材料：

大菜絲　10g

水　　　600g (偏實) 900g (偏淋)

蔗冰糖　90g (900g水 : 130g糖)

做法：

1. 大菜絲，糖，水同煮溶。（如喜歡其他味道，可加果粉或茶粉，亦可加椰汁代替部份水，也可改用其他糖。）
2. 倒入模具，放入雪櫃雪至凝固即可食用。