極品瑤柱臘味蘿蔔糕

2021年最後一爐「Double Turnip Cake 雙重蘿蔔糕」

估吾到都最後一日啦！仲夠敢嚟試新嘢，真係服左自己，咁有膽色。

話說有次睇到美心蘿蔔糕廣告，佢標榜自己用8mm蘿蔔條，加上蘿蔔蓉糕底，搞到我心思思想試吓。

所以趁住今日年三十放早，把握最後機會，做少少嚟證實吓啦！

食後感：蘿蔔糕不但食到一條條蘿蔔條，仲食到啖啖蘿蔔甜味，比起淨用蘿蔔絲嘅蘿蔔糕，真係濃郁好多，正呀！

瑤柱臘味芋頭糕 - 2021

仲有幾日就過年啦！今年又點會少得佢。登...登...登...凳...阿仔至愛「芋頭糕」呀！

今年有d改變，就係變左少量製作啦！因為少食多滋味嗎！

一出爐就急不及待試食，點知試食都試左1/4底啦！因為實在太好味呀！哈哈。

鳳凰馬蹄糕 - 2021

其實今年打算吾整馬蹄糕，但因為今日要煮羊腩煲，要用馬蹄，所以咪買多Ｄ整埋囉。今日買到又大又靚嘅馬蹄，$14斤，仲一粒都冇爛呀！

今次加左吉士粉同椰漿，顏色真係靚好多。

傳统古法年糕 - 2021

今年第一批年糕比爐啦！1大6細，全部將會陸續送出。屋企當然有得食，就係兩個迷你裝啦！

今年都係去渣華道街市買糖，但檔口原來已經已結業，咁唯有去第二間買啦！不過其實全場得兩間有賣咋，仲要淨低好少貨，冇乜選擇，感覺亦吾太靚。

今年蔗糖價格貴左好多，要$28斤呀！大糖就$10包(大小同價)，比舊年貴左$2。返到屋企即刻秤吓，點知(蔗糖)原來比人呃秤，得520g，少左80g，吾會再幫襯，冇下次。

瑤柱臘味蘿蔔糕 - 2021

話咁快，仲有一個月又過年啦！希望疫情盡快消失，大家可以從回正常生活。

雖然仲有一個月先過年，但阿女已急不及待，日日吹住我整蘿蔔糕同芋頭糕啦！佢話吾想過年時食糕，要在過年前食喎，究竟呢個係咩玩法！？

今年最特別係，阿女竟然為我準備埋臘腸呀！好啦！既然佢咁想食，就早Ｄ整比佢食啦！今日先嚟整個蘿蔔糕，下星期先整芋頭糕啦！

今年想轉吓新口味。所以食譜內加入左蝦米（希望香Ｄ），同埋改左少少調味（希望顏色白Ｄ）。

出爐啦！等我即刻試吓味先，味道比往年嘅嚟得簡單和清淡，又是另一種食法。雖然蘿蔔份量比以往少了一半，但出嚟又吾多覺（少）喎。

OK，呢個味道我都幾滿意，可以再encore。

一口脆皮奶黃月餅（4S蒸焗爐）

今日又有焗，今年第二輪奶黃月餅，同時亦係最後一輪。

今次試左全程230度，淨上火焗，效果都好滿意，明年可以照跟，無須試爐啦！

朱古力脆皮奶黃月餅 - 2020

 今日繼續試爐，試吓只用淨上火，結果真係比用上下火好。今次全程冇溶化（象腳）跡象，不過吾知關吾關轉左朱古力餅皮事，可能又要等下次再試先知真相。

今次嚟個中西合壁，朱古力餅皮配奶黃餡，估吾到味道又幾夾喎，仲好好味添。今次除左味道好之外，其實焗法更簡單方便，吾洗掃蛋，又吾洗掃糖水，一take過，完全冇技巧，成功機會仲係極高呢！

出爐

焗前

餅皮分佈均勻

迷你脆皮金莎奶黃月餅 - 2020

換左4S後，都係第一次焗月餅咋，希望部爐生生性性啦！好彩都不過不失，仍有進步空間。

自從舊facebook被停用後，已冇以前咁積極煮嘢食，會等到真係好想好想食先肯出手。現在煮食心態同以前好吾同，會睇有冇時間，盡量吾會迫自己去做，而且亦會放慢嚟做，令自己可以放鬆，盡量享受過程。雖然人變得懶惰，但吾再有壓力，感覺係良好嘅，哈哈。

紅糖薑汁紅棗千層糕

其實我本身就吾太喜好紅棗糕，但有粉絲就非常鍾意，仲想我教吓佢地整添。徇眾要求，就滿足吓你地啦！哈哈。

記得好耐之前，都曾經做過棗泥糕，但今次就有Ｄ吾同，因冇再壓棗蓉啦！今次算係簡易版，讓大家都可以做得舒服Ｄ。如果大家吾怕功夫多，或者鍾意勁紅棗味，亦可以參考番我嘅舊食譜「棗泥糕」。

今次做法相比簡單，只須要煲紅棗水，加糖加粉，就係咁簡單咋。另外，糖方面，可跟個人喜好，鍾意用咩糖都冇所謂（如：冰糖、片糖、黑糖、紅糖、棗糖等）。仲有，呢個做法，成品嘅賣相會比棗泥糕通透，感覺好似靚Ｄ。

*吾知大家睇吾睇到有5層呢？因太細個模，做吾到9層咁多呀！😅

脆皮鳳梨月餅 (2019新口味)

其實只係轉個造型，咁就可以將鳳梨酥變為月餅啦！雖然今次用嘅係50g月餅模，但其實只係做左33g咋，同鳳梨酥一樣份量，但就比正常月餅薄d，細細個，一人一個啱啱好。

眨吓眼，仲有一個月又到中秋啦！嚟緊呢段時間，要繼續諗吓有咩新嘗試啦！

迷你三色豆素糭

呢款糭主要係為媽媽已包，感覺好有意義。

雖然街可能有得賣，但未必係呢三種豆，就算有都肯定冇咁多料啦！不過我都會循例問吓媽媽，今年仲食吾食呀？想要幾多隻呀？答案當然係食啦！

除左媽媽鍾意食豆糭外，工人姐姐都好鍾意架（因冇得揀，鬼叫佢吾食豬咩！哈哈）。

瑤柱咸肉糭

一年一度大工程，今日正式開鑼啦！今年除左主打咸肉糭，三色豆素糭外，仲加多款瑤柱咸肉糭呀！

是咁的，因為舊年食過朋友媽媽包嘅瑤柱咸肉糭，覺得都幾夾，幾好味，所以今年自己都試吓包囉。不過我包得比較細隻，所以每隻糭只加半粒瑤柱，如大家包五角糭的話，就可以比原粒啦！除左瑤柱，仲可以包小鮑魚，亦可以加冬菇，栗子添。