牛油蛋撻

武漢肺炎疫情嚴重，聽政府呼籲，盡量留在家中，避免去人多地方。所以今日放假吾出街，乖乖地留響屋企，整吓甜品，打發吓時間。

原來都有Ｎ年冇整過蛋撻啦！今日雖然係重溫，但因為換左新爐，所以又變左一個新嘗試／新挑戰。

第一次用4S焗蛋撻，效果又幾好播。

一口合桃酥（牛油）

近幾年，我都會做大批曲奇或酥餅嚟送禮，今年當然都吾例外。

因為屋企冇豬油，所以我就轉用左牛油，雖然牛油冇豬油嘅酥，但就比豬油香。

鳳梨甘露酥

點解今次會叫鳳梨甘露酥呢？因為今次跟以往鳳梨酥吾同呀！

今次除左個鳳梨餡外，其他都變晒。首先係個外型，因為我想貪快，所以做左個最簡單做法。然後係個皮，因為我想夾番個造型，所以改左甘露酥個做法。令產品變成甘露酥外型，但其實係鳳梨餡（代替蓮蓉）。

最後，我想講吓個餡，其實係我兩三個月前做定，真空包裝放左冰箱到依家。第一次真空放冰箱，原來同新鮮真係冇分別。下次如果遇見靚菠蘿，都可以買嚟做定個餡，真空放冰箱，隨時想做就去做啦！

外型係咪有D似皮蛋酥呢？

包裝完成，可以送出。

生生猛猛（一口花生酥）

話咁快又放完三日假期，聽日又係返工日啦！不過，我仲未洗返住，因為我仲有幾日大假。

豬年第一爐焗左轉叉燒，今日第二爐就焗左花生酥，估吾到兩爐都係為左外送。

話說阿女最近轉左新工，而新公司文化係逗利是要回禮（糖果），所以阿女就諗住拎兩包糖果返去。

其實新年食左咁多糖果，加上人人都係派糖果，我為左可以特別D，吾想咁行貨，所以我提議派自家製花生酥囉，係咪攞苦嚟辛呢？哈哈。

準備就緒

士多啤梨芝士撻

今日係我結婚31週年「羊皮婚」紀念日，我當然會做d嘢啦！就係負責訂位食飯。

其實近幾年，我都有做蛋糕慶祝，今年也不例外。為左準備呢個蛋糕，一個月前我已買定模具，夠晒誠意掛。咁都未夠，尋日我仲請埋大假嚟準備呢！

講真，好彩前日可以買到士多啤梨，否則就做吾到呢款蛋糕啦！

正所謂慢工出細貨，即係會慢慢做啦！首先分兩階段，第一步，早兩日（前晚）預先醃製定士多啤梨，第二步（尋日朝早），就煮果醬，然後到中午，就他他調調，輕輕鬆鬆咁做埋餘下步驟。所以今日乜都吾洗做，除左un un腳等食外，仲可以周街走添！爽呀！

土鳳梨酥（吉士粉）

有時見到靚菠蘿，但又吾知幾時先用到，吾緊要，照買。因為可以買定，然後做定.....鳳梨餡。只要將煮好嘅鳳梨餡，密封好（包好），然後存放冰格（可keep半年），咁就可以隨時隨地，拿起手都用到啦！

最近忙住煮奶黃，掛住做月餅，搞到冇時間做鳳梨酥，但又吾想鳳梨餡擺咁耐，所以今日終於忍吾住要出手啦！

試過幾款餅皮味道鳳梨酥，我覺得呢個同芝士粉果個都比加杏仁粉好味，大家不防試吓比較吓，睇吓同我口味係咪一樣。

土鳳梨酥（有鹽＋值物牛油）

原來已有一般時間冇做過鳳梨酥啦！記得第一次正式做鳳梨酥，真係落足本錢。我並吾係指材料，而係講緊配件咋。

為左做到一個完美鳳梨酥，可以去到幾盡？真係吾講得笑㗎。首先，我搭同事嘅朋友從台灣幫我網購，買左廿個模加一個手壓棒，如果冇呢套模，我一定吾會開始做鳳梨酥。

有左靚外型後，又想有個靚包裝襯番，於是我再四處搜羅，不過香港實在搵吾到靚嘅包裝，最後唯有淘寶買番嚟，不過就貴左少少囉。為左要靚，成件事完美，都冇計啦！

最後，內涵有啦！賣相都有啦！但始終都覺得未夠完美。一向追求完美（盡量）嘅我，幾經掙扎，最終都屈服買埋部封口機，希望可以密封好d，keep好d，送比人都大體d嗎！嘻嘻。

話說上星期買左兩個菠蘿，本來打算做飯後果，點知原來屋企仲有好多橙同蘋果（擺左成個幾禮拜），見菠蘿已夠熟，遲d食又怕變質，所以想盡快解決個菠蘿，而最佳辦法就係用嚟整鳳梨餡啦！餡仲可以整定放冰箱（可以存半年）。不過我梗係吾會擺咁耐啦！只係雪左幾日啫。

今次我用左新買蘿蔔刨（7mm）刨粗絲，真係刨得好爽呀！吾洗切餐死啦！哈哈！

土鳳梨酥（杏仁粉）

最近有位朋友跟我的食譜試做鳳梨酥，竟然得到家人大激讚，最令佢驚喜係.....囡囡一口氣食左兩個。因為佢囡囡平時係吾吼台灣鳳梨酥架，今次竟然仲連食兩個添。食完仲要有讚，話好食過台灣果D多多聲。搞到我朋友（佢媽媽）超有成功感，超開心呢！聽到朋友咁講，連我都開心埋一份，因為我更有成功感。講開又講，其實我都好耐冇整啦！原來對上一次已經係8個月前啦！

早幾日中秋補假，去左fusion（百佳姊妹超市）逛逛，無意中見到佢地有地們金菠蘿，嘩！仲係超巨型呀。呀。呀。呀！未見過咁大個菠蘿架！一個有成2KG以上呀！都係只賣$23.9，咁抵冇理由吾買啫，吾執書嘅我，仲要買夠兩個添（可能個天都想我整鳳梨酥）。就係咁，就抬左兩個返屋企啦！好似拎住成包米咁重，仲要吾就手，好鬼死吉喎，拎死人啦！ 

等左兩日，見個菠蘿都熟得七七八八，就郁手整個鳳梨餡先啦！去完皮刨完絲後再磅吓，嘩！得番一半重量咋，仲隔出成公升汁，超甜呀！要加冰沖淡至飲得呢！都係第一次買到咁正嘅菠蘿，第日吾知仲買吾買到呢！

玫瑰蘋果批

雖然呢款蘋果批並吾係d咩新鮮野，最近連肥媽都做嚟，但對我嚟講就真係好新鮮，因為係我第一次，而且仲係第一次做蘋果批呀！

因為我自己吾太好蘋果批，因始終吾太接受生果做熱食，感覺有點怪。但吾知點解阿女又會咁鍾意，其實我都冇同佢去食過。

今日最後一日假期，見屋企有酥皮，有蘋果，又有齊材料，所以就試吓整比佢食囉。

玫瑰花造型，又確係幾靚嘅。

藍莓朱古力拿破崙

一包急凍酥皮有六塊，如果每次用一塊，閒閒地都做到六款甜品咁多架，真係好襟食。上次就做左士多啤梨拿破崙，而今次就試吓另一款口味啦！

今晚做左樣從未做過嘅拿破崙【藍莓朱古力拿破崙】，其實只要花少少心思，就可以變出多款口味啦！

今晚除左有拿玻崙外，仲有【朱古力酥皮杯】呀！大家look落去就可以見到啦！