低溫慢煮羊架 (惠而浦4S)

今次試左4S慢煮模式，冇浸浴，將真空左嘅羊架成袋放上架，60度蒸氣90分鐘 (下次要改60分鐘)。

仲試埋原排焗，230度焗23分鐘 (下次改焗15 分鐘)，估吾到效果又幾好喎，不過就over左d（太熟）。

好彩用左慢煮方法，所以就算過熟，d肉都吾會鞋，仲好淋滑㗎。

慢煮烤羊架

今年聖誕大食會，我煮左一款出得大場面嘅菜色『慢煮烤羊架』，呢個菜都見得下人掛？又香又滑又淋，我地全家都好喜愛呢！

想食可以早一兩日預備（當日做也可以），做定慢煮部份，然後放雪櫃，到食當日取出回溫，然後煎香就搞掂啦！今日媽咪同家姐都係第一次食咋，佢地真有口福，有機會試吓我嘅手勢。

其實切開係粉紅色，冇血水的，但放左一陣竟然變左深紅色。

做法可參考＞慢煮羊架做法

雜菜燴牛展

一款好啱大食會嘅菜色，可以配麵包，薄餅，白飯或意粉。甜甜酸酸，材料簡單，每個家庭都可以容易做到，仲係零失敗架。連我阿媽都做到，你地一定做到啦！

芝士焗薯蓉

為聖誕party準備左一度好好味嘅配菜，材料超簡單，但就有出乎意料嘅好味。

本來打算做薯仔沙律，但阿仔就話想食薯蓉多Ｄ，咁我就滿足吓佢啦！

秘製醬燒豬肋骨

呢個食譜醬料種類比較多，每次做完屋企又會多幾樽醬，哈哈。所以每次買完，都會做多幾次。其實我都好耐冇整啦！因為吾想買咁多醬囉，哈哈。

今次為左搞聖誕大食會，又想食得高級Ｄ，所以就揀左佢啦！其實自己整好經濟咋，一條豬肋骨都只係$60（吾計醬），出街食冇兩舊都食吾到啦！所以呢味菜我都係自己整多過出街食（即係其實好少食）。

米話吾講你知呀！呢個做法係非一般做法，非一般味道，絕對稱得上大師級架，因為佢並非叉燒醬，中式醬（簡單醃）。呢個係西式做法，仲係餐廳做法嚟架。吾信？咁就要自己試吓啦！雖然醃料多，但一定要跟足呀！值得買架，幾十蚊食到餐廳效果，抵啦！

香茅雞翼

出街食閒閒地都要$4/50得5隻，自己做$30有12隻，真係抵食到呢！今日姐姐放假，又係太太出埸客串嘅時候啦！

今日晚餐由我話事，所以梗係越簡單越好啦！最好就係一鑊熟。首先用焗爐焗個香茅雞翼（免油炸），然後再煮個雪菜肉絲烏冬＋菜芯＋黑松露鮮蝦迷你水餃（一煲搞掂）。其實如果吾係阿仔話返嚟食飯，相信今晚應該會食飯盒，爸爸知道又會話媽媽偏心都似，哈哈。

話說早兩日facebook見到灣仔碼頭有免費試食「黑松露鮮蝦迷你水餃」，而且取貨點又近屋企，取貨日期又夾到，所以我幫阿女登記埋，今日可以一齊去攞。而烏冬又係免費架，係買李錦記產品滿$40送架，仲有4個添。今晚餐飯好抵食，等於半價呀！

鹵水拼盤（牛腱、雞翼、雞腎、雞蛋）

今日第一次自家製鹵水汁，過往只會買現成鹵水汁嚟用咋。

話說星期四，去惠康睇吓有咩新鮮生果買，點知裝修緊（局部），D貨重新擺位，蔬果位置竟然變左凍肉櫃。而凍肉櫃又放左好多新款凍肉，全部$79.9/2件，所以我都吾執書，揀吓有乜啱食，最後揀左兩包牛腱同兩包羊胸。

尋日咁啱又經過馬寶道，所以就去左椰子號行吓啦！每次去都會買番少少野，今次就買左黑白胡椒粉同孜然粉，都係十蚊樽，平靚正。跟住就買埋黑芝麻（已烘，特價$22/300g，原價$25），用嚟整芝麻糕夠晒香。當我想比錢時，見到收銀機旁有好多雜貨，如乾薑粉，陳皮粉，薏仁粉，雪梨乾等等。無意中見到一包包鹵水料，心諗可以用嚟鹵牛腱喎，於是就買埋佢啦（$15）。因為未試過，所以問吓老闆娘點處理，跟住佢就比張紙仔我（做法），叫我跟住做就得啦！佢仲話，鹵水汁可以留番下次用，越舊越正，好似潮州鋪果D咁，可以用過百年以上呢！不過。。。最大問題係。。。屋企個雪櫃邊有位可以長期keep住煲鹵水汁呢！

低溫慢煮秘製叉燒

做叉燒都吾係第一次，但想做出好味又淋滑嘅叉燒，就吾係咁簡單。記得對上一次整叉燒，不但淋滑，仲好juice添，人人食完都讚佢係最好食嘅一次。

時間過得真快，原來已經差不多一年冇整過啦！因為如果想整叉燒食，真係不可假手於人，每次都必定要親身去買，去街市揀舊靚豬肉至買。所以如果買吾到，就令願吾做。點解咁耐都冇整？一話賣晒，一話冇時間。。。就係咁啦！嘻嘻。

今日好好彩，兩點去到街市，隨口問吓豬肉佬（心諗都冇啦），有冇靚梅頭做叉燒用梅頭呀？點知佢竟然答：你好彩，我收埋左一舊。然後佢就去雪櫃拎左舊梅頭出嚟（每次都係收埋，今次都吾例外），仲話費事掛出嚟，切散晒冇人買（因佢吾切開，想成舊賣，所以收埋。），經我左望右望後，驗過後，都過得去嘅，好過冇啦！咁咪買起佢囉！

其實大家會問，點為之係靚梅頭呢（啱整叉燒）？咁就等我介紹吓啦！首先，揀一舊靚梅頭，然後就係要識切。點切至啱？就係要直紋切，吾好似牛扒咁逆紋切，雖然切開好靚，油花分佈好好，但絕對吾適合做叉燒。因為吾好忘記，當你焗完切片時，每片都會係順紋，一Ｄ都吾肥美，食落仲會覺得粗鞋添。所以一定要將梅頭順紋切開，切開會見到一間間打直白色肥豬肉（如圖）。當焗完切片時，就會見到逆紋，食落吾會覺我韌，亦吾會覺得粗糙啦！

大家食／買叉燒，有冇食過三粒肉呢？係叉燒最好食嘅部份，一粒肉，一間肥，一粒肉，一間肥，一粒肉。不過一舊梅頭，最多都係得兩三條。所以想要買到，最好就同豬肉檔訂定啦！

嘩！超正呀！好食到冇朋友呀！冇呃你架，快Ｄ試吓親手做啦！

不過，咪話吾提你，食過後，真係冇得返轉頭。哈哈！

韓式炒粉絲

是咁的，話說一個月前，阿女去韓國買左包粉絲返嚟，但一直都仲未整，而尋晚突然醒起，所以今日就處置左佢啦！

一包粉絲有300g，原來煮起嚟都幾多吓，夠晒一家四口食。

涼拌貓耳朵

一個非常簡單嘅前菜／冷盤，雖然並不是名貴菜色，沒有高級食材，但它卻非常可口美味，一年四季都啱食，重點係食極都吾肥，嘻嘻！

材料：
貓耳朵（已浸洗）1飯碗
蒜蓉4粒
糖2茶匙
陳醋2湯匙
生抽2茶匙
鹽1/2茶匙
雞粉1/2茶匙
麻油1茶匙
胡椒粉1/4茶匙

做法：

1. 貓耳朵浸軟，烚1分鐘。
2. 隔走水份，浸冰水1分鐘。
3. 瀝乾水份及揸乾水。
4. 將全部調味料混合，加入貓耳朵拌勻，存入雪櫃兩小時以上或過夜，即可食用。

＊如喜歡青芥末，可加入1-2湯匙。

慢煮烤羊架

屋企冇慢煮機？又冇真空機？通通都冇問題，只要有密實袋同可以keep溫度嘅爐具就可以做到。

而我係用東芝水波爐65度蒸氣浸煮，呢個方法效果真係很不錯，外面焦香裡面嫩滑。

芝士煙肉焗大蘑菇

吾知點解阿女咁鍾意食鮮菌類食物，其實我冇乜買嚟煮，但乾菌佢又吾好喎！

成日叫我買比佢食，好啦！今日就買盒大蘑菇整比佢食啦！

第一次買咁大隻，仲係第一次焗，哈！又點會難到我呢！無論味道同賣相，我都好滿意。