極品瑤柱臘味蘿蔔糕

2021年最後一爐「Double Turnip Cake 雙重蘿蔔糕」

估吾到都最後一日啦！仲夠敢嚟試新嘢，真係服左自己，咁有膽色。

話說有次睇到美心蘿蔔糕廣告，佢標榜自己用8mm蘿蔔條，加上蘿蔔蓉糕底，搞到我心思思想試吓。

所以趁住今日年三十放早，把握最後機會，做少少嚟證實吓啦！

食後感：蘿蔔糕不但食到一條條蘿蔔條，仲食到啖啖蘿蔔甜味，比起淨用蘿蔔絲嘅蘿蔔糕，真係濃郁好多，正呀！

瑤柱臘味芋頭糕 - 2021

仲有幾日就過年啦！今年又點會少得佢。登...登...登...凳...阿仔至愛「芋頭糕」呀！

今年有d改變，就係變左少量製作啦！因為少食多滋味嗎！

一出爐就急不及待試食，點知試食都試左1/4底啦！因為實在太好味呀！哈哈。

鳳凰馬蹄糕 - 2021

其實今年打算吾整馬蹄糕，但因為今日要煮羊腩煲，要用馬蹄，所以咪買多Ｄ整埋囉。今日買到又大又靚嘅馬蹄，$14斤，仲一粒都冇爛呀！

今次加左吉士粉同椰漿，顏色真係靚好多。

傳统古法年糕 - 2021

今年第一批年糕比爐啦！1大6細，全部將會陸續送出。屋企當然有得食，就係兩個迷你裝啦！

今年都係去渣華道街市買糖，但檔口原來已經已結業，咁唯有去第二間買啦！不過其實全場得兩間有賣咋，仲要淨低好少貨，冇乜選擇，感覺亦吾太靚。

今年蔗糖價格貴左好多，要$28斤呀！大糖就$10包(大小同價)，比舊年貴左$2。返到屋企即刻秤吓，點知(蔗糖)原來比人呃秤，得520g，少左80g，吾會再幫襯，冇下次。

瑤柱臘味蘿蔔糕 - 2021

話咁快，仲有一個月又過年啦！希望疫情盡快消失，大家可以從回正常生活。

雖然仲有一個月先過年，但阿女已急不及待，日日吹住我整蘿蔔糕同芋頭糕啦！佢話吾想過年時食糕，要在過年前食喎，究竟呢個係咩玩法！？

今年最特別係，阿女竟然為我準備埋臘腸呀！好啦！既然佢咁想食，就早Ｄ整比佢食啦！今日先嚟整個蘿蔔糕，下星期先整芋頭糕啦！

今年想轉吓新口味。所以食譜內加入左蝦米（希望香Ｄ），同埋改左少少調味（希望顏色白Ｄ）。

出爐啦！等我即刻試吓味先，味道比往年嘅嚟得簡單和清淡，又是另一種食法。雖然蘿蔔份量比以往少了一半，但出嚟又吾多覺（少）喎。

OK，呢個味道我都幾滿意，可以再encore。

米制『瑤柱臘味芋頭糕』- 2020

今日買左個靚芋頭，夠晒粉呀！用嚟做芋頭糕就最理想不過。

今年有左4S幫手，蒸糕吾洗再不停加水啦！可以一take過，認真爽呀！

雖然每年都會蒸糕，但每年都一定提早預演，因每年材料都吾會一模一樣（味道），所以都會驚失準囉！

米制『傳統古法年糕』- 2020

一如既往，指定動作.....「年糕」，一款冇得輸嘅｛古法年糕］。

年糕、年高、年年高，年糕對中國人嚟講，係象徵意頭，所以拜神一定要有年糕，如果擺到發毛就更好，象徵發、發、發，發財大吉呀！

年糕是我家大老爺至愛，所以每年我都會為左滿足佢個胃，而諗諗新意思，發掘更多新口味，但.....原來.....始終.....傳統先至係佢杯茶。

而我家的小王子與小公主，就對年糕完全冇特別興趣，可能少年太年輕吧！未知「老」的味道就是寶。所以大家明白點解我要做咁多款糕啦！一人做一款，是最基本常識吧！哈哈。哈哈。

其實每個人都會有屬於自己的味道，可能這就是回憶（味道/感覺）。所以食物吾一定要花巧，亦吾須要複雜，最重要係對的食物遇上對的人。所以希望我煮的食物，就是家人的回憶（味道/感覺）。正如我網誌的標題｛媽媽的味道，幸福的感覺｝。

第二輪年糕`

米制『瑤柱臘味蘿蔔糕』- 2020

相信蘿蔔糕一定係新年最受歡迎嘅賀年糕首選，因為差不多家家戶戶都會有番底看門口。

話咁快，仲有十日就過年啦！吾知大家開始左做糕未呢？襯住今日有時間，就練習吓先啦！順便試埋個新刨，又可以試埋個新爐（長蒸）。

好開心，今年終於可以蒸糕吾洗再加水啦！吾洗睇火，吾洗加水，真係好爽呀！哈哈。

紅糖薑汁紅棗千層糕

其實我本身就吾太喜好紅棗糕，但有粉絲就非常鍾意，仲想我教吓佢地整添。徇眾要求，就滿足吓你地啦！哈哈。

記得好耐之前，都曾經做過棗泥糕，但今次就有Ｄ吾同，因冇再壓棗蓉啦！今次算係簡易版，讓大家都可以做得舒服Ｄ。如果大家吾怕功夫多，或者鍾意勁紅棗味，亦可以參考番我嘅舊食譜「棗泥糕」。

今次做法相比簡單，只須要煲紅棗水，加糖加粉，就係咁簡單咋。另外，糖方面，可跟個人喜好，鍾意用咩糖都冇所謂（如：冰糖、片糖、黑糖、紅糖、棗糖等）。仲有，呢個做法，成品嘅賣相會比棗泥糕通透，感覺好似靚Ｄ。

*吾知大家睇吾睇到有5層呢？因太細個模，做吾到9層咁多呀！😅

紅糖馬蹄糕

原來已經好耐冇整甜品啦！應該都有個幾月啦！

其實我冇偷懶㗎，因為9月參加左兩個烹飪比賽，所以忙住設計菜色，試菜等，咪冇時間做甜品囉。

趁住今日得閒d，就整個簡單d嘅馬蹄糕啦（其實最難係刨皮）！

今日試左新糖「紅糖」(食豆腐花果種)，顏色比用其他糖晶瑩通透，真係靚仔好多呀！

其實街賣果d，咪就係用佢囉，以後大家吾洗再溝糖啦！

「米」豬年 - LET ME 糕『瑤柱臘味蘿蔔糕-粟粉版』- 2019

最後一CAKE，蒸埋呢轉自己食，就可以收爐啦！

因為自己食，所以可以試新食譜，成功嘅話，明年就可以多一個新做法啦！

今日試左阿媽N年前嘅做法，就係轉用粟粉做蘿蔔糕啦！配上簡單嘅調味，清清地，希望味道啱屋企人啦？！

「米」豬年 - 百子千孫【鮮椰汁年糕】- 2019

「椰子」寓意有爺有子，家庭幸福美滿，所以過年又點少得椰子呢！

是咁的，今日路過馬寶道，見到平時買開香料間鋪頭，門口貼左早幾日東張西望介紹嘅剪片，近門口仲放左好多糕響度，於是咪走入去八下囉。

雖然鋪內人吾多（仲有路行），不過原來年糕已全部沽清，而見到嘅糕只係等訂左嘅客人嚟攞咋。現場所見，只得椰汁馬豆糕可買，年糕就要訂先有，不過要初三先攞到。老闆話，佢地經電視介紹完，年糕供不應求，所以為左還糕債，今年初三就要開鋪呀！仲話佢地55年來未試過咁早開鋪呀！老闆仲提大家，如果出年想買糕，記住聖誕前訂定啦！其實我都有一刻衝動想買，好彩買吾到啫，哈哈。

佢地嘅年糕都吾平架，一盒要$90，睇落好似好平，但其實只得半盒滿咋（電視睇有一盒滿）。佢地有三款糕，椰汁年糕，班蘭年糕同椰糖年糕，而椰汁馬豆糕就全年都有。

一場嚟到，冇理由兩手fing fing㗎，咁我就.....買左一斤椰汁（$45）同一包椰子水（$10）啦！嘻嘻嘻，買吾到咪自己做囉。So easy，哈哈。

「米」豬年 - 紅運當頭『紅豆年糕』 - 2019

今晚其實想做生磨糯米年糕（攪拌機版），但驚時間有D趕，又吾想有壓力，所以最後放棄了。不過，我冇偷懶到，有做嘢架，只係轉番用糯米粉咋。哈哈。

今年做左幾款年糕，全部都係冇餡嘅，口感比較單調，所以今日特登做一個，加入紅豆嘅年糕，令口感更加豐富同實在。

其實呢款年糕，我吾係未做過，記憶中.....可能、應該、或者都有10年啦！

不過，十年人士幾翻身，今時今日嘅我，已經吾同晒啦！因人會進步，糕都會進步架！