美式曲奇

第一次做焦化牛油，第一次加黑朱古力，估吾到又幾好味喎，真係好似Mrs Fields 🍪呀！

軟心朱古力麻糬曲奇 (綠茶、朱古力)

今日已經連續第三日做麻糬曲奇啦！今日吾想再一樣，所以轉轉做法。首先餅皮做左兩款口味（綠茶同朱古力）。另外，就係個餡，將麻糬包入70%黑朱古力，變為軟心朱古力麻糬。雖然材料大致相同，但今次又係另一種食法，都吾錯呀！

呢批曲奇係阿女order，所以佢嘅朋友又有口福啦！

屋企嘅麻糬餡已沽清啦！得閒又要做定一批看門口啦！

燕麥朱古力曲奇

吾記得有幾耐冇整過呢？！

自從冇左專頁後，真係提吾起勁去整嘢食，因為好似冇左一份寄託。眨吓眼，專頁都被停左半年啦！其實已開始習慣.....懶。

依家整嘢食心態變左，完全冇壓力，會等到好無聊...好無聊...好無聊先願郁。今次其實都係徇眾要求，萬眾期待，三吹四請下，我先肯做咋。哈哈。

今時吾同往日，我已經吾會再好似以前一樣，比壓力自己，強迫自己，一定要交功課（post facebook page）。亦吾想屋企人已成習慣，不懂珍惜。從今已後，我會學習釣高嚟賣，想食就要等吓啦！冇得想要就有，哈哈。

一口迷你曲奇

朱古力杏仁燕麥曲奇（零失敗）

仲有兩日又聖誕啦！襯住今日假期，梗係要做d嘢啦！

諗起聖誕就會諗起朱古力聖誕蛋糕，不過用嚟送禮就吾係咁方便，同埋做大量有難度。所以都係揀樣方便快捷，容易又好味嘅曲奇比較適合呢！

今次我加左可可粉同杏仁，未焗已經聞到好香啦！

杏仁花生朱古力曲奇

今日雖然係假期，但我冇出街，因為兩仔爺返左工，阿女又飛左，得番自己一條友，見出面又鬼咁曬，所以都係留響屋企，歎住冷氣整曲奇好過啦！

話時話，其實呢款曲奇，我都從未在網誌出過。對上一次做，都已是十年前嘅事啦！記得第一次做，既係唯一一次，印象中，覺得好難控制/掌握，因為當時冇戴手套(吾興/吾識)，所以麵糰非常黏手，就係咁，我再冇興趣/想再做啦！

今日之所以重溫，係因為屋企有包杏仁，同有包朱古力。本來我係想做Brownie，但最後都係改變主意。

其實原食譜係用腰果，但我覺得杏仁香D，所以轉左用杏仁。如大家屋企有腰果，合桃或花生，都可以自由轉用。

杏運曲奇（黑糖杏仁曲奇）

下次要再跟呢個食譜做呀！因為今次無論係味道，顏色同口感，都比以前做嘅更好呀！

過兩日又要返工啦！依家吾做仲等幾時。哈哈。

收吾到利是嘅已婚朋友吾好吾開心，因為仲有幸運曲奇利是補番數。

唧花牛油曲奇

早幾日睇東張西望，見到介紹舊式餅鋪曲奇，原來佢地係用左植物牛油溝牛油，仲加左吉士粉，只用蛋白冇蛋黃。仲有講每樣材料嘅作用，如大家想知詳細，可以去Youtube睇番。不過材料份量就冇講到啦！所以我唯有自己調教。其實片段入面並無加入粟粉同雲呢拿油，只係我自己試吓咋。仲有，相信以前嘅年代，應該仲未有無鹽牛油出現，所以我將材料裡面嘅牛油用左有鹽牛油囉！

等我同大家講吓今次有咩分別啦！首先講吓麵糊，麵糊質地同以往冇太大分別，一樣會唧爆袋囉，哈哈。至於焗嘅情況，就同以往有好明顯吾同，今次真係冇焗到出油，仲吾會溶晒一pat（冇晒花紋走晒樣），花紋仲可以保持得好靚。由於今次係試驗性質，所以冇影過程，而且仲唧得有d Hea添，哈哈。最後，味道雖然吾似舊餅店曲奇，但都好好味架。

伯爵茶燕麥曲奇

第一次試加伯爵茶葉，但茶味吾太突出，可能我加得吾夠重手，下次要再加多d至得。呢頭加左茶葉，轉頭又忘記加朱古力粒，太失魂啦！

因為想早D搞掂，所以吾理姐姐，照入廚房同佢爭地頭，佢有佢煮飯，我有我整餅。事關廚房地方有限，我唯有左攝右攝玩借位，有少少甩漏都係正常啫，哈哈。

雜果仁朱古力餅

都吾知幫佢改個咩名好呢！唯有跟材料照改一個啦（材料有杏仁，榛子，合桃，消化餅，黑朱古力）！其實呢個應該算朱古力？定係餅？其實都冇所謂啦！最緊要好食就得啦！

呢個做法其實好簡單，不單止步驟少，而且仲免焗添，不過材料費就貴ＤＤ囉！嘻嘻。

雜錦牛油曲奇

今日終於到左最後一日假期啦，雖然只得一個人，但我都吾會悶，因為已習慣晒啦！其實留響屋企hea吓都吾錯呀！

不過。。。其實。。。我今日係有個特別任務，就係幫阿女準備D小禮物，做比佢派街坊。哈哈，其實阿女平時都好鍾意同我落order架。但今次就誇D，佢話要派三日喎，仲吩咐我要整D擺得，可以keep得耐D嘅野。（咁我又點出到街呢！嗚嗚嗚！）

講番今次嘅手作，原本我係想整唧花曲奇，但屋企又冇金桶牛油，所以咪轉用無鹽牛油囉！點知。。。加完粉。。。攪完團。。。之後。。。直覺話比我知，應該係唧吾出嘅！哈哈。因為太杰啦！要唧！一定會手殘兼爆袋。所以，算把啦！放棄啦！

呢個故事係教訓我，以後要做唧花曲奇，一定要用番金桶牛油。但今次都吾會嘥左嘅，都可以做其他曲奇嗎！

當做完第一條朱古力時，感覺好似有d單調，於是做第二條咖啡時，就即刻補飛，加左d原粒已烘杏仁（之前用淨），到第三條綠茶啦！又加乜好呢！哈哈！好彩有d食淨嘅韓國蜜糖杏仁啫，咁又可以順便清倉啦！

用一個麵團，做齊3種味道（朱古力、咖啡杏仁同綠茶蜜糖杏仁），可以一次過滿足晒你嘅胃口掛。

今次都係第一次用唧花材料嚟做切片曲奇，真係錯有錯著，估吾到效果又吾錯喎。口感鬆化，好似食緊唧花曲奇一樣，只係外型吾同啫，以後可以繼續做呢個食譜。

Micky's Cookies（唧花牛油曲奇）

今日做左 Micky's Cookies（唧花牛油曲奇），同之前做過嘅完全吾同，食譜吾同，做法吾同，連效果都吾同，今次真係好好多呀！靚仔好好好好多呀！

今次冇加蛋，所以個麵糊比較杰，有D難唧，真係唧到手仔軟。第一次試咁低溫焗曲奇，初時都驚驚地（因大部份人都話要高溫焗，可以keep住花紋，低溫焗就會下塌），點知出爐。。。嘩！睇到啦！乜事都冇呀！花紋仲保持得好靚。

藍莓燕麥曲奇 + 朱古力燕麥曲奇

一款超容易做，又好味，又感覺冇咁罪惡嘅曲奇，首選必定係你啦！。。。「燕麥曲奇」。。。

今晚食完飯，見屋企冇甜品小食，所以做左個攪兩野就完成嘅簡易曲奇啦！今次半份加左藍莓粒（乾粒），另外半份就加入爐朱古力釘，一次過可以歎齊兩款味道，正！！

焦糖杏仁曲奇

早排買材料時，發現有包杏仁粉過左期，所以我就叫老闆不如送比我，等我試吓有冇壞，有壞至吾要。（因老闆通常會mark有效期好短，所以應該吾怕。）

今日放假，見時間尚早，阿女又未瞓醒，橫掂無無聊聊冇事做，不如就搵D野整吓啦！

記起之前有包過期杏仁粉，試過冇問題，就用左佢先啦！吾好嘥。

呢個曲奇同平時曲奇口感完全吾同，咬落吾係脆，又吾係淋，有Ｄ肉英國牛油曲奇，又有Ｄ似英式鬆餅，好鬆化架，真係估佢吾到。

Jumbo 燕麥曲奇

有粉絲試食過我整嘅燕麥曲奇後，都話味道比欣X同XX芝兩間好（其實各有捧場客啫），仲叫我考慮吓網上買賣，不過我真係冇諗過做生意，因我怕煩又怕有壓力。雖然身邊有好多朋友會不停push我做呢樣野，但我始終都冇go go go。

我個人比較緊張，平時會用烹飪來減壓。最重要係我吾鍾意shopping，怕戈多，又怕亂洗錢，所以鍾意留響屋企。但老公又要忙於工作，仔女又各自有自己節目，所以我唯有寄情於烹飪，一個低消費娛樂，又可以消磨時間。

但如果轉了型式的話，將娛樂變工作，相信我會對烹飪而感到壓力啦！所以都係偶爾客串一下好，整少少當滿足下小客戶，同時亦可當娛樂下自己，過下心/手引，可謂一舉兩得。

未試過整咁大塊曲奇，好得意呀！靜雞雞話你知啦！欣X賣緊$25一塊架。