鳳梨餡

今日25/9星期五，是日放假一天，先去銀行處理吓帳戶，然後再去和富fusion shopping吓，睇吓有冇荀貨。一入門口，就見到又平又大又新鮮嘅地們金菠蘿，最後忍吾住買左3個。結果shopping就要在此結束。因為拎住3個菠蘿，邊度都吾洗去啦！哈哈。抬住3個大菠蘿返屋企，沿途只能掂行掂過，專心向前，因為我實在無力挽了，哈哈。

幾經辛苦，終於安全返到屋企，不過雙手已吾屬於自己啦！實在太重，太重，太重呀！以後買嘢真係要量力而為，吾好再做傻事啦！嗚嗚嗚！

希望放多兩日，等菠蘿熟Ｄ，就可以做定鳳梨餡，等遲Ｄ放長假，就可以做鳳梨酥啦！

後記：今日1/10（星期四），尋晚30/9（星期三）終於等到菠蘿熟啦（估吾到要擺咁耐）！可以開工做鳳梨餡啦！不過其中一個仲未熟，所以只係做左兩個。

如見到靚菠蘿，我會買嚟做定餡，等遲D想食鳳梨酥嘅時候，就可以即時有得用。

待鳳梨餡雪一晚後，我會用保鮮紙包成條狀，再放入真空袋，然後抽真空放入冰箱儲存（可保持新鮮又吾怕串味）。

迷你脆皮金莎奶黃月餅 - 2020

換左4S後，都係第一次焗月餅咋，希望部爐生生性性啦！好彩都不過不失，仍有進步空間。

自從舊facebook被停用後，已冇以前咁積極煮嘢食，會等到真係好想好想食先肯出手。現在煮食心態同以前好吾同，會睇有冇時間，盡量吾會迫自己去做，而且亦會放慢嚟做，令自己可以放鬆，盡量享受過程。雖然人變得懶惰，但吾再有壓力，感覺係良好嘅，哈哈。

芋蓉餡（適合：蛋糕／饅頭／三文治）

吾知大家有冇食過台灣香帥芋頭蛋糕呢？因疫情關係，自己或身邊朋友都冇得飛，所以好耐冇食過啦！

最近整完個原味戚風蛋糕（做法），覺得如果襯埋個芋頭餡，味道應該都會幾吾錯。

材料：

芋頭肉　　400g（100%）

砂糖　　　40g（10%）

鹽　　　　少撮

牛奶　　　80g（20%）

煉奶　　　12g（3%）

做法：

1. 芋頭去皮洗淨，切粒放碟蒸淋（約20分鐘）。
2. 加鹽及糖壓蓉，倒入半份牛奶撈勻，再加入剩下牛奶撈勻（喜歡杰可以減少牛奶）。
3. 放入保鮮盒，芋蓉面緊貼上保鮮紙，放雪櫃雪一晚才使用。

迷你脆皮奶黃月餅 - 2019

上星期已送出第一批奶黃月餅，今日再嚟第二批，不過就變左迷你版，因為要送比好多人（正常吾夠分）。

紅菜頭脆皮奶黃月餅（2019新口味）

每年中秋，月餅嘅重頭戲，一定係奶黃月餅，而今年都吾例外，不過就吾係傳統果隻，而係新嘗試『紅菜頭』呀！我都係第一次用紅菜頭煮食咋。

計埋今次，我已用過三隻紅色粉，紅麴粉，紅桑子粉同紅菜頭粉。三隻比較，我覺得今次紅菜頭粉最sharp，最紅，最出色。上次嘅紅桑子粉就偏粉，比較可愛。舊年用過嘅紅麴粉，就比較暗沉，偏瘀。依家屋企仲有包藍莓粉未開，吾知遲D用嚟配咩好呢？！

事關我實在太多花片啦！所以每款只能印一個花，咁先吾會用漏嗎！哈哈。個人認為，如果印花型，不宜掃蛋或糖水，因會出爐後花紋會吾明顯，睇我d就知啦！出爐前後係咪差好遠？反而字就比較明顯D。當掃埋蛋及糖水後，一定會更失真。

獨立包裝

雖然只是簡約包裝，但都好有體面掛！

脆皮奶黃月餅 2019

尋日都講過我有好多月餅模花片啦！吾係吾信呀！今日就同大家晒冷啦（大部份）！嘻嘻。

今日終於輪到傳統奶黃月餅啦！為左襯番傳統兩隻字，就配合吓用晒文字花片啦！全部都係我嘅大名嚟架。

我覺得50g模做月餅最好，吾太大亦吾太細，月餅大小剛剛好，所以我大部份嘅花片都係50g架。

焦糖棗仁餡（少油少糖）

時間過得真快，眨吓眼又一年啦！仲有一個多月又到中秋，係時候諗吓有咩新搞作啦！

其實心裡面一直有個疑惑，點解老人家咁鍾意食金腿五仁月呢？吾怕咬到牙都軟咩（果仁咁硬）？好似我奶奶同媽咪咁，佢地每年都會買一個自私食架，哈哈。係咪真係咁好味呢？

話時話，記憶裡，我真係從未食過金腿五仁月，因為我覺得月餅應該係甜，而金腿五仁月又咸又甜，好古怪，我接受吾到囉，哈哈。

最近見fb宣傳一款焦糖果仁月餅，所以引起我注意，因而令我產生興趣。網上都參考過幾個食譜，但最後都係跟自己舊作（狀元核桃酥），左改右改，再臨場加減，終於比我做出一款啱自己嘅食譜啦！

由於自家製關係，所以好多嘢都可隨意改變，如材料，份量，調味（果仁、棗、油同糖等），隨意加加減減，自由配搭。目的只係想食得健康，希望媽咪會鍾意我嘅隨意啦！

講番呢款月餅，除左有自己鍾意嘅五款果仁外，仲加左椰棗。如果大家想了解多d椰棗，也可上網搜尋（椰棗介紹）。椰棗除左可以煮食，煲湯，小食外，其實仲可以節食減肥呢！好多印尼姐姐齋戒月，就係靠佢咋！

靜雞雞話你知，原來做五仁月一d都吾簡單，仲好麻煩添，因為單係切果仁，都切到手軟（頭都暈）呀！吾怪得出面賣得咁貴啦！真係粒粒皆辛苦呀（除非原粒免切）！朋友們，吾好意思（太可惜），你地冇機會試到啦！因為只得限量14個咋，嘻嘻。

＊因為材料全部都係熟，所以可以即時試甜味，如鍾意多d甜，可以加適量麥芽糖。而果仁粗粒／幼粒可跟個人愛，因我做比老人家食，所以會切得比較細(吾係碎)，但仍可保留粒粒口感。

士多啤梨 Confiture／果醬

今日教大家一個生字「Confiture」，Confiture 解釋係 Jam意思。

其實Jam係果醬嘅英文，而Confiture就係果醬嘅法文。雖然Confiture即是Jam，但其實Confiture同Jam係有分別的。

首先講吓Jam，Jam係經過長時間熬煮，質感比較稠，味道比較甜，果肉比較碎，食落會感到加左糖熬煮嘅味道。相反，Confiture冇經過長時間熬煮，質感吾會似醬，味道天然清甜，而且還保留原粒果肉同水果原味，食落有食緊水果嘅感覺。

其實Confiture做法同Jam都冇太大分別，只係須要早一晚準備，但味道就相比好好多（我覺得），重點係用少好多糖。

如果大家都鍾意食到果肉同水果原味嘅果醬，就一定要跟Confiture做法啦！

焦糖金粟紫薯月餅（2018新口味）- 廣式餅皮

舊年第一次自家製轉化糖漿，真係一試難忘，因為市面上買到嘅，絕對無法媲美。所以如果冇一手準備（自製糖漿），我絕對，絕對，絕對（講3次，因為好肯定）吾會整廣式月餅。

一個月前，我已準備轉化糖漿啦！因為諗住今年試做廣式月餅。餡料方面，我當然要自家製啦！不過做咩味道好呢？蓮蓉？咪搞，我怕怕啦（會手殘）！紅豆？芋泥？。。。。。

最後，我終於揀左紫薯。不過，我又點會咁簡單呢！今次我又試左新配搭「紫薯拼焦糖栗子」，係咪聽個名都已經覺得好味呢（我女係）？哈哈。

*食後感：阿仔即晚已食左一個（我瞓前發現少一個），因佢吾知要等回油，哈哈。於是我問佢評語，佢答：餅皮吾硬喎，個皮有老嘅味道！栗子質感與紫薯不夾（因原粒），應該切碎會夾d。結論：如果吾好食，佢應該即時出聲，吾會等我發現問佢至comment。

待三日回油後，食得啦！

紫薯餡

無論製作中式酥點、月餅、糯米糍、蛋糕、麵包或饅頭，呢個餡都一樣咁啱用架。

材料：（約500g）

紫心蕃薯　　450g（淨肉）

糖粉　　　　1湯匙

麥芽糖　　　2-3湯匙（試味）

無鹽牛油　　20g

淡忌廉　　　20g

做法：

1. 紫薯洗淨刨皮切片，大火隔水蒸淋。完成後，立即將紫薯壓蓉。
2. 將紫薯蓉、糖、牛油、淡忌廉及麥芽糖同放入易潔鍋中內，開中火炒勻至杰身。
3. 完成後，放入保鮮盒，餡面緊貼上保鮮紙（避免風乾），待冷卻後放入雪櫃雪一晚以上。

椰蓉餡

材料：
無鹽牛油　40g
砂糖　　　40g
椰絲　　　40g
蛋　　　　40g

做法：

1. 將全部材料拌勻，放雪櫃雪至凝固備用。

麻蓉包

趁買左中筋粉，就整多d中式包啦！尋日專登整定個麻蓉餡，雪左佢一晚，今晚就可以有餡做饅頭啦！

如果想快，其實搓完個餡後，可以放入冰箱雪兩個鐘，夠硬就包得㗎啦！

今次冇加泡打粉，效果感覺比有加嘅差少少。

中式饅頭做法

麻蓉餡做法