黑芝麻頂角吐司

除了咖啡包，我亦好鍾意黑芝麻包，兩款包我都喜歡塗上有鹽牛油，再配杯咖啡就完美啦！

酥皮芋蓉包

太耐冇做過墨西哥包啦！今日再重溫，主要係為左消滅屋企嘅芋蓉。其實心目中都有幾個idea，一）芋蓉西米布甸，二）芋蓉包（中式），三）香芋瑞士卷。結果，三樣都吾係，竟然變左個酥皮芋蓉包。哈哈。

真心話，呢個包真係好好味，就算冇個芋蓉餡，只係一個墨西哥包，味道都係一樣咁正。

山形牛油吐司

其實原本係想做頂角吐司㗎，不過點知二發得太高（轉左韓粉），所以閂吾到蓋，於是唯有即刻轉款囉。

因為山形關係，所以我響麵糰表面加掃一層牛油，希望成品會靚仔d。原來掃左牛油後，係會好快上色㗎 (亦可能冇蓋，太近發熱線)。

因好早已夠色 (15分鐘左右)，所以中途我將吐司模直接放爐底 (原先最低一層)，然後再加一個焗盤響最高一層 (擋火)，再減10度爐溫 (170度)。

咖啡吐司

雖然已換左4S半年，但焗吐司只係第一次。

其實4S同水波同樣都有蒸氣發酵，但4S有分30，35及40度，而水波只得40度。所以今次我可以試吓用30度蒸氣發酵，低溫Ｄ，發酵時間長Ｄ，希望可以做到更軟綿綿。

今次同以往吐司有少許吾同，就係麵糰擺位方向吾同。以往我會將麵糰旋轉方向單向一個方向，而今次就參考了一位老師，將麵糰左及右的部分都向外（中間冇所謂），吾知大家明吾明我講咩呢？哈哈。

吾明吾緊要，可參考以下條片，但食譜我冇跟佢：

https://www.youtube.com/watch?v=dyxOlpJbrsE

放涼一晚後，今朝切開，真係好軟綿綿，效果好滿意呀！

材料：

高筋粉　　　300g　　　

奶粉　　　　10g
咖啡粉　　　8g
黑糖　　　　20g

砂糖　　　　20g

鹽　　　　　3g

無鹽牛油　　20g
煉奶　　　　20g
水　　　　　180g

快速酵母　　5g

做法：

1. 麵包機製作麵糰及一發，完成後取出麵糰，平均分割3份，排氣，滾圓，醒麵15分鐘。
2. 將麵糰碌平長舌形，反轉再碌平長舌形，然後捲起，收口向下。
3. 再將麵糰碌平長舌形，反轉再碌平長舌形，然後捲起，收口向下，放入吐司模內。
4. 將模放入4S（不須蓋上模蓋），30度蒸氣發酵至八九成滿（60-75分鐘）。
5. 完成發酵後，蓋上模蓋，放入已預熱180度焗爐最低層，上下火加熱風焗35分鐘。
6. 出爐後在檯面凳一下，然後脫模，放上烤架，待完全放涼後可切片。

菠蘿包

好耐冇整過菠蘿包啦！可惜屋企冇叉燒，如果有就可以整埋菠蘿叉燒包啦！

今次係4S第一次焗菠蘿包，效果同水波爐冇太大分別，但就須要中途轉位一次，因為近風扇位置特別上色。

新鮮出爐菠蘿包係最好食，所以我都忍吾住，一口氣食左兩個。竟然連阿女都係，忍吾住都食左兩個，令願今晚吾食飯，哈哈。

香草墨汁法式麵包

原來（我）已經有兩個月冇整麵包啦！為左消滅屋企包墨魚汁，但又吾夠整意粉，咁就唯有整麵包囉。今次我混入左法包粉同粿麥粉，令口感比較實在。如食時搽少少鹽味牛油，味道會更好。

黑糖粿麥吐司

每逢星期六，先有機會做吐司，今日就揀左黑糖粿麥口味。我覺得黑糖粿麥麵包，無論個裝或磅裝，都一樣咁好味。第一次做呢款吐司，可能加左粿麥粉同法包粉，所以發酵時間比以往多左10分鐘，足足發酵左一小時（水波爐only）。

頂角吐司

因為買左個吐司模，所以試吓學人整吐司，好彩都吾太差啫，嘻嘻。

第一次學人做吐司，所以感覺似做實驗，一步一步考驗，一步一步過關，講真，真係有少少緊張，仲有少少期待，哈哈。

因為話晒第一次，所以吾敢跟足份量，驚爆瀉呀！由於只係估估吓，所以先試做300g粉。開蓋果一刻，噢！爭少少添！吾夠頂角呀！吾緊要啦！其實都吾錯啦！下次我識做啦！要做320g粉，就應該可以頂角。

＊以下食譜已更正320g粉
＊本食譜以Panasonic麵包機製作麵糰及一發（可用手搓或廚師機製作麵糰，及室溫發酵，須注意時間及溫度。）
＊本食譜以東芝水波爐二發及烤焗（可室溫發酵及使用焗爐，須注意時間及溫度。）

黑糖粿麥麵包

兩年前曾經用呢款包參加過 Panasonic 麵包比賽，雖然攞吾到冠、亞或季軍，但就能入到最後8強。不過，最大喜悅係得到蘇玉華嘅讚賞，仲有實戰嘅經驗。講真，咁大個女都係第一次參加食譜比賽咋，真係超級難忘呀！

前一排同阿女去Outback歎下午茶，不過我地冇點到佢地嘅signature（黑糖包），因食tea set要加錢囉。

大家可能會問，自己整嘅同Outback食嘅係咪一樣味道呢？如果我答一樣，就呃緊你啦！不過，自己整其實都有七成相似，其實都算吾錯啦！

今次材料同以往有少少吾同，就係轉左麥芽精。以往一直用黑麥芽精粉末，而今次嘅係液體。食落兩者味道的確有分別，我覺得液體做出嚟像真度更高，有八／九成相似呀！吾信？！大家不防可以試吓。

法式軟包

咳左成個禮拜，都冇心情整嘢食，今日見精神好Ｄ，就隨意整個法包食吓啦！事關今晚煮左雜菜燴牛尾，吾想食飯嘅，就可以食麵包。

材料：

高筋粉　180g

法包粉　60g

砂糖　　18g

鹽　　　5g

菜油　　15g

酵母　　3g

水　　　140g

做法：

1. 麵包機麵糰模式（或手搓），完成後排氣，滾圓，鬆弛15分鐘，造型。
2. 第二次發酵至兩倍大，麵包面篩上法包粉，然後鎅花。
3. 放入已預熱200度焗爐，焗15-20分鐘。

菠蘿叉燒包

每次焗親叉燒，我都會留起偏瘦部分（約200g），用嚟做叉燒餐包餡。因我鍾意食叉燒餐包多d，所以多數都會將叉燒整餐包餡，好少會做中式餡。早幾日整定左個餡，等幾時想食都可以隨時有得用。

今日成日橫風橫雨，冇得出街，留響屋企有咩好做？！梗係整嘢食啦！中午先嚟個瑞士卷，下午再嚟個焗麵包。咁就可以娛樂一天啦！

其實都冇諗過會焗包架，只係阿女無端端話想食菠蘿叉餐包，又話想出去買（添好運），講到咁，我咪唯有整比佢食啦！

最開心嘅係。。。阿女食左一啖後。。。咦！幾好味喎！

焗叉燒餐包

因為焗左叉燒，所以有叉燒做叉燒包囉！

叉燒包有兩種，一種係焗，一種係蒸，今日就做款焗啦！兩款叉燒包嘅叉燒餡，做法吾一棣架，想做中式叉燒包，可睇我另一個post。

我比較鍾意食焗叉燒餐包，因為Ｄ餡吾會太多醬，而重點其實係包面層糖漿呀！糖糖地好好味架。

聖安娜品味法國Taste of France工作坊

好開心，今日被邀請出席「聖安娜品味法國Taste of France工作坊」，可以跟專業餅師一齊製作法國麵包同酥點。

除左可以親手製作兩款麵包酥點外，更可在麵包發酵空檔時，試食了3款法國酥，3款迷你法國酥及2款法國麵包。導師還示範如何處理放置一段時間嘅酥點，就算隔日也可吃到新鮮出爐嘅味道。

另外，大會和聖安娜也非常貼心，不但為每位blogger準備樽裝水，更安排每組一位導師，全程從旁細心指導（每個步驟），讓每位blogger都可以容易掌握。

工作坊完結後，大會更準備了8款麵包酥點給各參加者，仲係隨意揀隨意攞添。各人都揀得好興奮，攞得好開心呢！可惜只得一對手啊！哈哈。今日真係玩得好開心，好滿足，人人都滿載而歸。

T55（麵包）及T65（酥點）麵粉

場地佈置

品味法國系列

在麵糰發酵空檔時，大會安排大家試食。

還有介紹如何處理已放置一段時間的酥點

牛角酥切開，會看到內部蜂巢紋路，即代表「正」。

再試看橫切面，都係一樣「正」。

食品生產副董事總經理Jason，為大家示範朱古力包。

更示範酥皮製作過程
（機器輾薄及人手加工）

繼續為大家示範牛角酥造型

終於輪到自己動手做啦！

（因時間關係，大會已預先準備了麵糰，我們只需造型及後期加工。）

Jason的成品出爐啦！

大會亦準備了很多新鮮出爐麵包

個個都又圓又大呀！（1個已佔1/4個盒）

嘩！今日不但有得玩有得食，仲有得拎添。睇吓！包，全部都係包，真係好滿足呀！大家估吓有幾多個？。。。。。答案係24呀！！哈哈。

～ 4x牛角酥／4x朱古力包／4x牛奶漩渦／5x朱古力酥／7x芝士煙腿酥 ～