迷你三色豆素糭

呢款糭主要係為媽媽已包，感覺好有意義。

雖然街可能有得賣，但未必係呢三種豆，就算有都肯定冇咁多料啦！不過我都會循例問吓媽媽，今年仲食吾食呀？想要幾多隻呀？答案當然係食啦！

除左媽媽鍾意食豆糭外，工人姐姐都好鍾意架（因冇得揀，鬼叫佢吾食豬咩！哈哈）。

瑤柱咸肉糭

一年一度大工程，今日正式開鑼啦！今年除左主打咸肉糭，三色豆素糭外，仲加多款瑤柱咸肉糭呀！

是咁的，因為舊年食過朋友媽媽包嘅瑤柱咸肉糭，覺得都幾夾，幾好味，所以今年自己都試吓包囉。不過我包得比較細隻，所以每隻糭只加半粒瑤柱，如大家包五角糭的話，就可以比原粒啦！除左瑤柱，仲可以包小鮑魚，亦可以加冬菇，栗子添。

咸肉糭

吾知我算吾算大陣象呢！因為。。。我今日。。。專登請假嚟包糭呀！哈哈。

舊年開始HEA包糭，吾會再似前兩年咁，地獄式咁去包，搞到第日腰痛手痛。依家學識慢活，做事吾會再比咁大壓力自己，學識放慢手腳，做得幾多得幾多囉，哈哈。仲要限量生產，冇得encore，食到係你嘅福氣，食吾到嘅千奇咪嬲嬲豬呀！

今年本來預算包24隻咸肉糭，6隻花生眉豆糭，總共30隻。點知/可能/或者包得細隻左，最後竟然包左29隻咸肉糭，8隻花生眉豆糭，3隻冇肉冇蛋黃綠豆糭，一共40隻呀！

今次有阿女同媽媽，加媽媽嘅媽媽，三個女人一個墟齊齊包糭。不過佢地都係當玩，所以我只批准佢地包花生眉豆糭，就算失手都可以重新包過。

包完就當然要等食啦！今次都你用智能煲，set左40分鐘，所以好快有得食，順便試吓烹調40分鐘是否足夠。結果係，花生同眉豆都好夠淋，所以即是代表時間OK，咸肉糭就一定冇問題啦！不過穩陣起建，都係試埋好d，結果梗係冇問題啦！但咬口同質地都比花生眉豆糭好，因為係我包囉！我紮得夠實呀！

題外話：婆婆早兩日食過XX酒樓嘅糭，話好難食，試食完我包嘅糭後，大讚好味過街買，話調味啱啱好，就咁食都已經夠晒味，吾洗再點糖/豉油。繼古法年糕後，對我又一激讚。呢d咪就係叫賣口乖囉，下年我識做啦！哈哈。

（前）粉紅繩：花生眉豆糭（媽咪獨愛）

（後）白繩：咸肉糭

迷你咸肉粽／三色豆粽

今日包粽日，包都包到洽眼瞓呀！事關我慢慢包，足足包左三個鐘😅。

今年冇包梘水粽，亦冇包燒肉粽，只係包左35隻咸肉粽同15隻紅豆粽（冇肉冇蛋黃），總共包左50隻。

今年我再用智能煲幫手，因為真係好方便，又慳時間，最重要係效果好嗎！。用智能煲最吾好就係內膽吾夠大，吾可以一次搞掂。

我個智能煲係5公升，每次可煲到15隻粽（每次30分鐘），所以一共煲左四轉，加加埋埋總共煲左兩個鐘。

如果用明火嘅話，就要開齊兩個爐頭，烚三個鐘。明火除左煤氣費貴之外，仲要睇火，又要中途加水，廚房仲會好熱添。最最最麻煩係，阻住姐姐煮飯呀囉！哈哈。

我最鍾意包迷你粽，細細隻又得意，食晒一隻都吾會漏，仲吾怕肥添。

豆沙鹼水糭

為左滿足老公嘅要求，唯有加開特別場，再推出一款「鹼水糭」。

好彩屋企仲有十片葉同食用鹼水，不過就爭咁樣餡囉。好彩屋企又有紅豆啫，可以自製紅豆饀，咁餡方面就可以解決左啦！

加埋加埋，依家手頭上嘅材料夠我變出幾隻「豆沙鹼水糭」啦！哈哈。

三色豆糭

呢款豆糭係專為媽媽而包嘅，因媽媽喜歡豆糭，依家街好少有得賣啦！

簡單食材，做到古老味道，一年一次，比媽媽懷舊吓啦！

咸肉糭

其實我本身吾係太好食糭，包糉只係為左家人。我家人比較麻煩，一個話要食咸肉糭，一個又話要食上海糭，鹼水糭。不過鹼水糭得老公食，而且仲係話食兩隻，點包呀大少！咁少！最後，我只係包左三款，鹼水糭No啦！（或者，可能會加開）

燒肉糭

今日放假一天，就係為左包糭囉。

近幾年端午節，我都會親手包粽，「糭」會有你。

今年都吾例外，不過真係包都傻，人都癲呀！哈哈。

今次蒸糯米用左水波爐，再用跟機焗盤，薄薄地鋪平咁蒸，真係快過舊年用深盤蒸好多。

首先介紹第一款【燒肉糭】，算係最麻煩一款，但阿女要求到，冇計啦！