枝竹羊腩煲

原來已有三年冇煮過羊腩煲啦！

1月頭網購凍肉，見到有新產品＂紐西蘭羊腩＂，而且仲做特價，所以就買左兩包試吓。仔女知我買左羊腩，就一直不停吹我煮，足足提住三個禮拜。

因為冰箱已被打爆，所以我專登安排遲D送貨（29/1送貨），大家比Ｄ耐性，吾好咁心急啦！今日終於可以煮啦！大家終於有得食啦！

今次煮法同3年前吾同，除左醬料外，仲加左竹蔗，陳皮同檸檬葉。估吾到味道又真係幾好味喎！不過就功夫多Ｄ囉。

低溫慢烤蜜汁豬仔脾

最近瘋狂網購凍肉，冰箱都被打爆晒啦！搞到阿仔都吾可以買雪糕，哈哈。

為左我可以繼續買，所以就要盡快清貨。今晚先清左豬仔脾同羊架先，聽晚就繼續清雞脾同梅頭扒。咁我又有位放聽日送嚟嘅貨啦！哈哈。

嗯.....應該係時候要收手啦！

低溫慢烤叉燒（4S）

自從上年豬瘟後, 已好耐冇買過新鮮梅頭做叉燒啦！呢段時間，當然有做過叉燒，仲試過急凍同冰鮮（柳梅、豬腩、五花腩），但始終都同新鮮冇得比。

最近HKTVmall購物，無意中發現有呢隻梅頭芯，喂呀！就係佢啦！以前我去肉檔，就係買呢個部份啦！

今次呢舊梅頭都幾大舊，有成3斤重呀！我係第一次切咁大舊肉，真係有Ｄ呢HEA啊！好彩把孖人牌夠利咋。哈哈。

慢烤叉燒真係超淋，慢工出細貨，真係冇講錯。

低溫慢煮羊架 (惠而浦4S)

今次試左4S慢煮模式，冇浸浴，將真空左嘅羊架成袋放上架，60度蒸氣90分鐘 (下次要改60分鐘)。

仲試埋原排焗，230度焗23分鐘 (下次改焗15 分鐘)，估吾到效果又幾好喎，不過就over左d（太熟）。

好彩用左慢煮方法，所以就算過熟，d肉都吾會鞋，仲好淋滑㗎。

低溫慢煮叉燒（惠而浦4S）

為左呢舊叉燒，真係落足本架。因之前部抽真空機抽吾到濕材料，所以唯有用密實袋。但密實袋始終抽得冇咁好，所以唯有轉做慢烤。但慢烤要睇實冇得行開，所以搞到好困身。

直至最近買左4S，可以長蒸三小時吾洗加水關係，所以又搞到我心郁郁，想買過部好d嘅抽真空機啦！

講真，雖然慢烤同慢煮效果都一樣咁好，但慢煮可以吾洗睇，由得4S自己搞3個鐘，真係爽好多。以後有4S同真空機，就可以做多D慢煮叉燒啦！

低溫慢烤腩叉燒

豬肉價格仍然高企，作為慳家的C9，由於自制成本高，所以都係停一停諗一諗。

如果想食叉燒，就唯有幫親燒臘檔啦！但試過咁多間（連食神叉燒都試埋），都買吾到一間令屋企人滿意。吾通想食舊正叉燒都咁難？答案：係！真係好難。都係怪我屋企人對叉燒要求太高，太奄尖吧！哈哈。

星期五晚，放工去左惠康shopping，買左3盒「泰正」冰鮮豬腩肉（共1050g，折後$89.5），諗住買嚟焗叉燒。等星期六醃定，星期日咪有得食囉。

第一次用4S焗叉燒，基本上同水波差不多，只係溫度去吾到240度，最高只有230度，但好彩並無影響效果。今次係4S第3次焗，暫時表現都非常理想，效果亦超滿意（絕對比水波有過之而無不及）。

其實自家制叉燒，真係好花時間／心機／功夫，基本上會冇左一晝（三四個鐘）。由其係慢烤，真係少Ｄ心機都吾得，冇得行開架，真係要企定定，全程好忙好忙好忙（真係好忙，所以要講3次）。

雖然真係好麻煩，冇晒時間，但當屋企人食完，個個都讚口不絕嘅時候，就乜都值番晒啦！哈哈。可以誇口講句，我整嘅叉燒真係出面食吾到架，哈哈。

**試過中國同澳洲冰鮮豬，覺得今次泰國冰鮮豬最好，下次可以繼續。但吾建議用急凍豬，無論效果同味道都差好遠，吾好味（已試過）。**

超淋超滑超正（真心的買吾到）

臘味糯米飯（電飯煲版）

今日好特別，竟然教大家煮飯，不過吾係普通白飯，而係糯米飯。

其實買左個電飯煲咁耐（可煮糯米飯），但都未試過用嚟煮糯米飯，所以今次都有D擔心，驚失敗呀！

其實以前都有煮過糯米飯，不過要將糯米浸三個鐘，然後隔水用明火或水波爐蒸熟，蒸大約一個鐘。由準備到完成，大約須時4小時。

因為今次係第一次關係，所以我5點半就開始煮，如萬一失敗，都有時間比我補飛嗎（再煮過白飯）！

當聽到電飯煲完成響聲時，我第一時間進行測試（試食同試質感），好彩完全掂呀！冇生米，又冇爛patpat，簡直perfect呀！以後想食糯米飯，真係好方便呀！吾洗預先浸米，想食可以即刻煮，正！

糯米粒粒分明

德國脆皮咸豬手

第一次買高雲牌咸豬手，理由好簡單，因為特價囉，哈哈。平時60蚊一隻，依家特價40吾洗一隻，吾買對吾住自己啦！如果冰箱有位，買夠十隻添呀！哈哈。

以前一直買開金豬o麥，不過佢嘅包裝成日都漏氣入晒雪，豬手表面有層結霜，所以我都冇買好耐啦！

其實兩隻牌子嘅豬手分別吾大，最明顯都係顏色同形狀啫。不過家人食過後，都話高雲牌好食D，因為肉嘅層次，味道同濕潤度，都比金豬o麥較好。

如果下次再有特價，我都會買定幾隻看門口。

低溫慢烤拖地叉燒

雖然我都吾係第一次焗叉燒，但用拖地腩嚟焗叉燒，又確實係第一次喎。

因為最近豬肉價格仍然高企，來貨又減少（幫襯開嘅豬肉檔每日只分得半隻豬），所以我們這一家都減少食新鮮豬肉，叉燒就更加冇得做啦！

今日突然心血來潮，好想食叉燒，所以即管去街市踫吓運氣，吾知有冇機會買到靚梅頭呢？結果與預期一樣 "冇" 囉，哈哈。最後，唯有轉而目標，買舊拖地腩（豬腩肉）嚟頂住先啦！

今日舊豬腩肉就貴囉，比平時貴左成倍呀！$80買得500g咋！

##轉載網上資料:

拖地叉燒是五十年代的大盛，失傳的味道。

拖地叉燒，四層瘦三層肥。拖地叉燒已有多年歷史，起源于以前香港元朗地區。所謂「拖地叉燒」，據說是以前元朗燒味師傅，指定用肥到肚腩拖地的大花白豬來做叉燒而得名。燒成後，因狀似草鞋，故有另一外號「草鞋底」。

拖地叉燒用的是腩肉排骨相連的部位，肥瘦相間，特別肥美。以前拖地叉燒一定要用上大花白豬，抵抗力強，特別肥，肉味偏濃。但是現今普遍人怕肥膩，所以導致拖地叉燒銷路少，成本高，逐漸的被時代淘汰。

拖地叉燒一斤燒成後約有12兩重，但因拖地油份足，燒期間不斷滴油，其中只剩餘下得10兩半能用上。拖地叉燒表面共四層瘦三層肥，腩肉沒一般叉燒難嚼，原來在醃製時有技巧。挑骨腩本身肥脂多，所以要加重糖，減肥膩之餘，入口即化。燒製時火力不能太猛，因為糖份易燒焦。##

低溫慢烤叉燒

因為我有儲備梅頭習慣（當遇到靚梅頭時，一定會買左先講），所以今晚吾洗食貴豬啦！其實想食叉燒又有幾難，只係預早買定，預早雪定，然後預早解凍，預早醃定，咁就有得食啦！係咪吾難呢（講就易囉，食果個，嘻嘻）？

其實咁焗法都吾係（我）第一次，只係blog度冇出現過啫（當時未成立）。記得果次買梅頭做叉燒，以為第一刀就係正（最好），點知.....味道係OK嘅，但肉質同口感就.....有D強差人意囉。最慘仲要被屋企人彈三彈四，呢個話好嚡，果個又話乾，總之多多聲氣咁囉，唉！

不過我冇因為咁而放棄，反而繼續鑽研嘗試不同方法，雖然效果始終未如人意（屋企人要求太高）。直到有日，突然醒覺，了解到肉嘅紋路，終於.....皇天不負有心人，比我學識到點揀啱嘅肉啦！仲要配合埋啱嘅切法喎。就係咁，從此開始了我嘅「叉燒」歷程啦！

今日其實冇諗過會出post，所以冇影到相，不過食完後，竟然好有驚喜，覺得有必要記綠在案（重做）。

＊＊只影到一張食淨幾舊嘅相咋，哈哈！

西汁三文魚扒

最近睇到蘋果報導（詳細內容），原來三文魚可以有助預防脂肪肝，咁以後就要食／煮多ｄ啦！

雖然我都有煮過三文魚，但魚扒就未試過，今次都係第一次。以前煮法不外乎煎又或者炸，但今日就吾同，都係第一次咋。

老實講，煮三文魚扒真係從未試過，今日我都係初哥嚟咋。心諗，急凍三文魚扒一定比冰鮮三文魚腥，點知.....打開包裝.....竟然.....一d都吾腥喎。

雖然只係急凍三文魚扒，但無論賣相、色澤、味道同肉質，都同冰鮮冇分別。最難得係，一向吾鍾意食三文魚嘅爸爸（怕腥），反而係最棒場果一個。

低溫慢煮叉燒 - 慢煮棒做法

因為新聞報導話年三十至年初二會停售新鮮豬肉，所以我上星期四就一早去街市買定舊靚梅頭（放冰格），目的就係為左今日拎去拜年（加料），哈哈。

早排同同事傾開整年糕，然後講吓講吓又講到慢煮（傾嘅範圍可以好闊），點知原來佢已買左慢煮神棍，之不過佢新屎坑，用過兩次就冇再用啦！所以我咪問佢借嚟玩吓囉（佢話借比我用先）。

我都係第一次用慢煮棒，原來係用手機藍芽開關同控制，真係好高科技呀！哈哈。好彩Youtube有人教學，一睇就識得用啦！今次試左65度2個半小時，效果真係吾錯。

其實慢煮棒都幾方便幾好用，但就大枝左Ｄ囉，要收埋佢都係一個問題。

低溫慢煮叉燒

今次終於試左訂豬肉（梅頭），咁大個人都係第一次訂豬肉咋，好彩冇比豬肉佬呃我啫（比次貨我）。

是咁的，由於我每次去到豬肉檔，梅頭總會是賣晒，所以豬肉佬就叫我下次訂定，吾洗白走一趟。所以，星期五睇完醫生，就順路即管去試吓訂貨。今次同豬肉檔訂左2-3斤梅頭，明天取貨，而且係取貨時才付款，因未知實際重量。

試過今次後，下次想整叉燒，吾洗驚買吾到靚梅頭啦！只要早一日訂定就得啦！真係超方便呀！不過最重要都係搵間有信譽嘅豬肉檔。

低溫慢煮秘製叉燒

已經有半年冇整叉燒啦！原因係買吾到啱梅頭，所以令願吾做，免得嘥時間兼嘥心機。如想食到好味道嘅叉燒，其實一Ｄ都吾容易。首先由買舊靚梅頭開始，然後就係時間啦！最重要當然係心機啦！

依家出街買到嘅叉燒，多數都係冰鮮豬肉，都要賣$90-100斤。如想食新鮮豬肉做嘅叉燒，吾係話冇，只係比較難，而且仲好貴，要$150-180斤呀！

尋日同阿女撑完檯腳（食早餐），見時間尚早，所以去街市走一趟，睇吓仲有冇緣遇到舊靚梅頭啦！好好彩，仲有一舊，於是我就叫豬肉佬切左兩斤比我啦（淨番尾瘦果舊吾要）！

提提大家，吾係全部梅頭都啱做叉燒，因梅頭都有肥有瘦。重點係切嘅方法，豬肉佬一般都會將舊肉橫切，咁係錯架，其實應該係要直切架。橫切雖然係有好多油花，但當焗完之後，油份就會消失，切片後會見到順紋，所以食落會又嚡又乾。相反直切的話，會見到肉係順／直紋，中間仲間住一條條肥（直條），即是一間肉一間肥，當焗完切片後，會見到肉係逆紋，所以食落會又鬆又軟。

想鬆軟當然要下Ｄ功夫啦！因梅頭肉比較結實，如果跟一般焗法，肉質會比較有彈性，有趙口。所以我比較鍾意慢煮方法，因叉燒做出嚟會比較淋滑鬆化。

要食就吾好懶啦！首先早一日做足準備，然後將肉醃一晚，跟住第日就慢煮3個鐘，再焗就得啦！每個步驟都好講心機架。可惜，食嘅人永遠吾會感恩，亦吾會明白做嘅人有幾咁用心呢！

今次用左半樽百花蜜（之前BBQ用淨）

爵士湯

記得第一次煲呢個湯，因為買吾到蜜瓜，所以轉左用哈蜜瓜，點知味道竟然出怪地好。啖湯基本係吾會飲到哈蜜瓜味，哈蜜瓜嘅味道好低調，但就可提升湯嘅鮮味，湯既清甜，仲好香，真係一試難忘。

今日行超市，見到有蜜瓜開箱（$31.90），所以就吾執書買番個。如果大家都想試吓，記住要揀個生d，皮要青，瓜按落要硬。吾好揀皮已變黃及淋身，因已太熟啦！

不過今次我吾係煲呀！今次係燉呀！因為我買左燉盅嗎！當然要用多d啦！平時好少出街飲湯，因為湯梗係要飲住家囉！不但真材實料，而且仲經濟好多添。

呢個燉湯如果出街飲，4人份要三四百蚊，依家自家燉8人份，都只不過二三百，平左又多左，吾洗教都識揀掛！燉湯仲要吾洗理，禁個制就可以有湯飲。

點樣令你屋企嘅男人（老公同阿仔）愛回家，除左識煮飯，煮餸，甜品，仲要靠啖靚湯架！

白汁煙肉蘑菇意粉

要自己煮飯喎，梗係揀d簡單又易嘅煮啦！呢款意粉，應該係史上最簡單之冠，簡單到連阿女都會話。。。吓！乜咁容易咋！？

靜靜雞話你知啦！呢個汁係阿女煮㗎，佢要爭住煮囉！哈哈。