粒粒芝麻糕

今晚被阿女強迫我整野食，仲要有規限，太過份。事關明天佢要見將離開香港的朋友，所以要 "我" 做Ｄ野喎！其實，真係吾係幾明，點解？會關我事嘅！依家做阿媽真係吾易做，除左要照顧家庭（老公，仔女，姐姐）外，連朋友都要照顧埋。哈哈！算啦！冇計啦！都係開工算把啦！

因規限實在太多，首先吾可以做凍品，因行街拎住怕溶，跟住又吾可以整普通野，因冇特式，就係咁，講整咩都講左一段時間。哎呀！想我點呀？！最後，就決定整呢樣吾怕熱，又吾怕凍，仲吾怕撞得嚟又帶有香港特式，傳統而又充滿懷舊嘅『芝麻糕』啦！

＊今次芝麻粉沒有隔渣，所以會食到點點／粒粒芝麻（高纖），同以往滑滑口感吾同。

低溫慢煮秘製叉燒

做叉燒都吾係第一次，但想做出好味又淋滑嘅叉燒，就吾係咁簡單。記得對上一次整叉燒，不但淋滑，仲好juice添，人人食完都讚佢係最好食嘅一次。

時間過得真快，原來已經差不多一年冇整過啦！因為如果想整叉燒食，真係不可假手於人，每次都必定要親身去買，去街市揀舊靚豬肉至買。所以如果買吾到，就令願吾做。點解咁耐都冇整？一話賣晒，一話冇時間。。。就係咁啦！嘻嘻。

今日好好彩，兩點去到街市，隨口問吓豬肉佬（心諗都冇啦），有冇靚梅頭做叉燒用梅頭呀？點知佢竟然答：你好彩，我收埋左一舊。然後佢就去雪櫃拎左舊梅頭出嚟（每次都係收埋，今次都吾例外），仲話費事掛出嚟，切散晒冇人買（因佢吾切開，想成舊賣，所以收埋。），經我左望右望後，驗過後，都過得去嘅，好過冇啦！咁咪買起佢囉！

其實大家會問，點為之係靚梅頭呢（啱整叉燒）？咁就等我介紹吓啦！首先，揀一舊靚梅頭，然後就係要識切。點切至啱？就係要直紋切，吾好似牛扒咁逆紋切，雖然切開好靚，油花分佈好好，但絕對吾適合做叉燒。因為吾好忘記，當你焗完切片時，每片都會係順紋，一Ｄ都吾肥美，食落仲會覺得粗鞋添。所以一定要將梅頭順紋切開，切開會見到一間間打直白色肥豬肉（如圖）。當焗完切片時，就會見到逆紋，食落吾會覺我韌，亦吾會覺得粗糙啦！

大家食／買叉燒，有冇食過三粒肉呢？係叉燒最好食嘅部份，一粒肉，一間肥，一粒肉，一間肥，一粒肉。不過一舊梅頭，最多都係得兩三條。所以想要買到，最好就同豬肉檔訂定啦！

嘩！超正呀！好食到冇朋友呀！冇呃你架，快Ｄ試吓親手做啦！

不過，咪話吾提你，食過後，真係冇得返轉頭。哈哈！

焦糖香蕉蛋糕

如果屋企Ｄ香蕉出晒梅花點，最好用途一定係用嚟整蛋糕。今次有Ｄ吾同，改變一下，試吓加我最愛焦糖，吾知效果又會點呢？！一家好好味啦！

因為忙住整叉燒，所以冇影到過程，如果想睇，可以參考牛油蛋糕（做法），都係差不多啫。

藍莓朱古力拿破崙

一包急凍酥皮有六塊，如果每次用一塊，閒閒地都做到六款甜品咁多架，真係好襟食。上次就做左士多啤梨拿破崙，而今次就試吓另一款口味啦！

今晚做左樣從未做過嘅拿破崙【藍莓朱古力拿破崙】，其實只要花少少心思，就可以變出多款口味啦！

今晚除左有拿玻崙外，仲有【朱古力酥皮杯】呀！大家look落去就可以見到啦！

士多啤梨拿破崙

話咁快又放完四日復活節假啦！明天又要繼續返工，要等下次放假至可以再做甜品啦！

呢款係我超愛嘅甜品『拿破崙』，佢不但外型靚，而且仲好好味，絕對可以比美酒店餅房呀！吾信？！即管試吓囉。哈哈！

講起呢個甜品，真係吾講得笑架，因為佢曾經幫我攞過獎，仲係第二名添，我永遠都吾會忘記，真係一個好難忘回憶。

時間過得好快，都有年多冇做過啦！今日再做番，一樣冇難度，難度只係時間。不過只要時間分配得好，就一定冇問題。好似我咁，今朝煮定個餡，然後同阿女出街歎茶，之後仲去埋街市買餸，返到屋企仲可以他他調調，慢手慢腳咁去繼續搞埋個皮。今日可算是在零壓力下，完成左一款精美又美味嘅『士多啤梨拿破崙』。

狀元核桃酥

記得好多年前，見到電視介紹呢款點心（小南國核桃酥），就一直留響我腦裡面。咁多年來，連間野都執埋，但都未有機會食過。直至年幾前，見谷友上堂學完，賣相又搞到我心癢癢，好想學呀！所以我就搜尋各式各樣做法，連工具都買埋，但就一直吾敢開始。因為我擔心製作很複雜，又怕步驟好麻煩。而另一原因，就係冇其中一樣材料《椰棗》。

咁啱尋日買香料時，比我見到椰棗真身啦！原來它的外貌同紅棗類同，有Ｄ似乾果。另外，老闆話我聽，椰棗營養價值豐富，不但可以當涼果吃，亦可以用嚟煲湯（代替蜜棗）。仲有，椰棗含天然果糖，糖尿病人也可以食用。不過椰棗一Ｄ都吾平，仲有Ｄ貴，一盒250g賣$28，500g賣$55架。

今日磅材料時，工人姐姐見到，仲話佢地印尼都有好多，會在新年前一個月開始齋戒，而佢地就係食椰棗充饑啦（吾食飯）！吾怪得椰棗功效話可以抵禦饑餓感啦！

我呢個核桃酥，其實冇用核桃，而係用左腰果，因我吾鍾意核桃種甘味。自家製就係有呢度好，可以彈性處理，吾鍾意就out，哈哈。

今次做完吾知仲有冇可能會再做，因為真係好嘥時間同心機，如果有幸食到嘅，真係要好好珍惜啦！

五香咸蛋

今年復活節，雖然冇復活蛋，但就有好另類嘅蛋，佢就係咸蛋啦！

響網上會搜尋到不同醃浸咸蛋嘅方法，但我一直都未敢試浸，亦可以話未有機會。

尋日同阿女撐完檯腳，就分道揚鑣（佢約左friend shopping） ，我無聊地去左行街市（北角春映街市），行吓行吓，咦！到左麵廠門口，佢地擺晒Ｄ雞蛋響度，混亂亦有序咁擺左一堆鴨蛋喺度。靈機一動，下個月就端午節啦！不如就自家製整Ｄ咸蛋嚟包粽啦！就係咁，就買左廿隻鴨蛋啦！其實，買鴨蛋係貴過買咸蛋架！一隻鴨蛋$2.5，一隻咸蛋都係$2.5。諗真Ｄ，係咪搵自己笨呢？！仲要做一餐大龍鳳，哈哈。

尋日掛住買鴨蛋，根本忘記左要買香料。所以，今日唯有行多轉，再去遠Ｄ（馬寶道天然椰子號）買香料。平時我一定會去香料鋪買香料架，吾會是但求其買。因香料鋪夠專，夠多，夠齊，又夠新鮮（因流量快），所以搭車都會去買。依家Ｄ香料鋪都好細心，pack到細細包，幾蚊有交易（$5／$8包），吾洗好似以前大大包，實用吾晒，掉多過用。今日買齊5款香料，都只係$28咋。材料準備好啦！計吓數，香料$16.5（除丁香用晒一包外，其他只用了半包），鴨蛋$50，粗鹽$6.5，加加埋埋$73（平均$3.7隻），一Ｄ都吾平呀！

預告，今年端午節咸肉粽價格，因成本增加，而作出適當調整（單咸蛋已升幅50%），嘻嘻。一個月後就可以知到成果啦！好期待呀！最怕就係等。。。等。。。等。

藍莓芝士蛋糕（焗）

襯住復活節有連續4日假期，除左出街吃好野外，仲要去做想做又未做嘅事。

第一件事想做，就係要清雪櫃D芝士。因上次買果舊1Kg芝士，就算用埋今次，都仲有300g淨呀！所以一定要盡快食晒佢。

呢個蛋糕，已好多年冇做過啦！真係要慢慢歎真D。

木糠布甸

好多人買忌廉嘅時候，都會揀買大，因為會比細抵好多（$18/200ml，$45/1000ml）。但買左返屋企，又往往用吾晒喎，到最後都變晒大嘥鬼。而我話晒都係一位精明C奶，又點會咁浪費呢！

其實除左做蛋糕甜品外，忌廉仲有好多用途，例如乜乜忌廉湯，卡邦尼意粉，白汁雞皇飯等等。而我今次就會用嚟整一個超簡單，又易做，又快趣嘅甜品『木糠布甸』啦！

吾知大家鍾意邊隻牌子淡忌廉呢？我通常都會在烘烤店買，但牌子選擇吾多，來來去去都係總統、安佳或塔牌等等。今次好特別，終於可以吾同啦！因為買到Isigny淡忌廉呀！

個人喜好，我吾鍾意總統，亦吾鍾意安佳，至於塔牌，都係冇得揀之下揀咋。第一次用Isigny，價錢好合理，味道係好過晒以上講幾個牌子添。點解我吾鍾意果幾隻牌子？因為怕佢酥囉。

冰糖陳皮燉檸檬

記得第一次見人整呢款燉檸檬，已經係一年前嘅事啦（可能我未見過啫）！好似都幾特別，味道應該都會吾錯（比咸柑桔咸檸檬）。不過製作時間就。。。真係好花時間，而且仲有難度，難係難在要睇實，吾可以行開（出街）。假如用水波爐燉，連續燉12小時，每隔25分鐘加水及倒水一次，咁咪好吾得閒！坐定定係度，企定定係度囉！明火又點呢？一樣要定時加水，仲要睇火添。所以。。。我都係放棄算啦！

直至兩星期前，上網無意再見到燉檸檬，不過佢係賣嘅！仲要吾平，$150/300g。所以我就再搜尋吓做法，見到大致都差不多，只是材料份量不同，燉法不同啫。最吸引我其實係佢嘅功效（大家想知，可上網搜尋），因為好啱老公飲，所以我就立即行動，親手買材料，親手做每個step，確保冇甩漏，絕對食得放心及安心。

識我嘅都知我嘅作風，一係吾做，做就當然要做到最好啦！首先，我要從材料入手，第一樣就係要買好料，咁就可以食好料啦！求其就不如吾好做啦！吾好嘥錢，嘥時間，最慘係嘥心機。所以今次用了十年老陳皮，新鮮大檸檬，仲有原蔗冰糖。

好啦！一切準備就緒，就可以開得工啦！我與坊間做法最吾同，就係用左真空煲。足足燉超過24小時，出爐啦！你睇。。。色香味全。自家製燉檸檬，天然無添加，色澤晶瑩，味道醇厚回甘，益處仲多多添。Cheers！

黑糖粿麥麵包

講起呢個包，都算係我嘅代表作。記得之前初初加入一個麵包谷，當時有好多包友都嚟跟我學，到後期我更用呢款包去參加比賽添，所以呢款包好有記念價值。自從比實後，我都冇再做過啦！今日就同大家重溫吓啦！

桂花水晶球

今日上網見到圓碌碌透明嘅水玄信餅，晶瑩剔透，真係好靚，引死人。

但其實我吾係鍾意食，只做覺得佢好靚啫。之因為咁，所以我就買左兩個模番嚟玩啦！

之前曾經用嚟做過果汁蒟蒻，效果都好得，好靚仔。今日就搵番比嚟用吓啦！但今次吾係做蒟蒻，轉吓做桂花糕先。