冰糖陳皮檸檬膏

我又嚟燉檸檬啦！上次燉嘅又飲晒啦！不過其實今次仲有令一個目的，就係燉嚟送禮呀！因為我細妹想飲，而佢又會嚟緊個星期日（29/7）返香港（趁D女放暑假），所以我要準備定啦！話說細妹舊年已講定，今年會返香港，仲話到時要試我嘅燉檸檬，所以一早我已買定真空玻璃樽同包裝，今日終於可以用到啦！雖然只係做比屋企人，但我都要做得好好睇睇，吾好失禮。

今次燉法同以往有少少吾同，我在燉到10個鐘時，用攪拌棒（直接放入燉盅）將全部材料打爛，然後再繼續燉多3個鐘，之後工序就同以往一樣，如入樽，倒轉，放涼等。

而製成品經雪過後（自己食果d），可以見到同平時嘅好大分別，係杰身好多，好似醬／膏咁樣。顏色方面，會比較實，不通透。而味道亦有分別，比以前較濃厚。最重要，係啱阿妹飲，因佢吾愛食渣，依家可以連渣都飲埋，咁就吾怕蹝嘢啦！

冰糖陳皮燉檸檬（禮盒裝）

話咁快又係時候燉檸檬啦（因為派晒同就嚟飲晒）！

近期新奇士檸檬價格仍然維持高位（$4個），但比上次size大左10%左右，咁就當佢平左啦！哈哈。

今次冰糖並吾係用太古原蔗冰糖（$12.X/250g），亦吾係街市買到果種袋裝冰糖（$7/600g），而係太古盒裝黃冰糖（$8.X/350g）。因姐姐買左檸檬，但又吾記要買冰糖，所以唯有臨急去左U Select買（屋企附近）。

今次份量比上次多，搞到燉盅放吾晒，唯有將一盒冰糖放入大碗，蓋上保鮮紙，然後將冰糖蒸溶（實驗成功），再倒入燉盅（其實有空間可注入液體），哈哈，咁又比我過到骨啦！咁就可以一次過燉晒，吾洗中途加冰糖啦！今次都係用電燉盅，都係燉左13個鐘，效果真係超正。

其實今次燉檸檬仲有另一個目的，因為今年有幾位親友健康都出現問題，所以我打算今年拜年吾再送糖果或自制花生酥/曲奇/鳥結糖等。因為我希望收到嘅親友，都可以食得更健康。

材料：
老陳皮　　　　1兩
新奇士檸檬　　1320g（12個）｛去兩端／白芯／核後｝
碎冰糖　　　　1400kg

其他：
食用梳打粉　　2茶匙
清水　　　　　適量
粗鹽　　　　　適量
已消毒玻璃瓶　2000ml

做法：

1. 清水加梳打粉拌溶，放入檸檬浸泡30分鐘（水要蓋過檸檬）。
2. 檸檬用清水洗淨，然後用粗鹽擦拭檸檬表面，再用清水洗淨。
3. 用廚紙抹乾檸檬水份，放架風乾一晚。
4. 陳皮浸泡至軟身，用刀仔刮乾淨果囊，然後清洗乾淨，用廚紙抹乾水份，放架風乾一晚。
5. 第二日，將檸檬切走兩端，然後切開一半，取走中間白芯。
6. 將檸檬切片及去核，陳皮切絲。
7. 將檸檬，陳皮，冰糖順次序放入燉盅內，然後隔水燉12小時（中途可拌勻一次）。
8. 完成後趁熱注入已消毒玻璃瓶內，蓋好立即將瓶反轉（製造真空狀態）， 整瓶完全冷卻後，反正及儲存陰涼處。

貼士：

• 如開封後，要放雪櫃儲存，而未開封的可儲存陰涼處3個月。
• 全部食材及器具都不能有一點水
• 陳皮越老，功效越好。
• 容器清洗乾淨後，用大火烚10分鐘消毒，然後抹乾及風乾。

步驟：冰糖陳皮檸檬

冰糖陳皮燉檸檬（完美篇）

正所謂『工欲善其事，必先利其器。』，其實我一直都好相信。所以為左日後方便繼續燉。燉。燉。唯有向現實屈服，終於買左部燉盅啦！希望以後可以做得更好，將最好的。。。給家人。

最始我打算今次用西西里檸檬燉，仲訂埋貨（貨會8/12到油麻地果欄），可惜果欄話暫停送貨，仲係冇得留貨，要先到先得，咁冇法啦！唯有放棄。不過重點係，我未有燉盅呀！哈哈。

其實買一個電燉盅吾難，但要買一個合我要求就有ｄ難。我要求其實好簡單，一> 隔水蒸燉（非明火，容器不能直接受熱，否則就不是燉），二> 容量大（3L以上），三> 外型（吾老套，吾太大件）。電子瓦罉，壓力煲，智能煲等，全部都吾啱要求，因為佢地都係明火。

最後，比我揀左呢部「樂信牌」陶瓷蒸燉湯煲（最新款），佢外型吾老套，容量又夠大（3.5L），仲係多功能添。上述幾點已滿足晒我嘅要求。

如果大家吾介意普通檸檬嘅苦澀味，又吾介意普通檸檬嘅口感，咁就吾一定要搵／買西西里檸檬啦（聽講西西里皮厚，肉汁多同味濃，口感煙韌有咬口）！西西里檸檬不但難買到，而且價錢仲好貴添（西西里$60/400g：新奇士$4/110g）。

功效：
冰糖跟陳皮都有健脾和胃、潤肺止咳作用，而檸檬可消解胃氣，咽痛喉乾，燉足13小時的老陳皮冰糖燉檸檬對喉嚨痛\咳嗽濃痰 \咽喉炎\慢性支氣管炎有顯著的改善作用。對於體內濕氣重\長用喉嚨\煙酒過多\熬夜上火也有保健作用。

~ 送禮用 ~

~ 加多件外套 ~

~ 老公嘅 ~

冰糖陳皮燉檸檬

原來上次燉檸檬，已經係四月啦！其實早排已經飲晒，只係未有心情再做。

尋晚突然心血來潮，所以咪再encore囉。而且都係時候要燉番d氹吓老公啦！

上次同今次一樣都係我親手刮果皮，一樣刮餐懞。但今次吾同係d果皮風乾後，竟然乾到脆卜卜，冇可能切到絲，唯有剪。

今次吾再多介紹啦！有興趣可睇番第一次post（冰糖陳皮燉檸檬做法）。

甘筍汁

今晚再試機，因我想試埋少水份嘅蔬果，所以就揀左佢「甘筍」。

今次製作材料非常簡單，只係得兩條甘筍。實驗證明，少水份蔬果榨出嘅汁會比較少，而渣就會多好多。

三果特飲（火龍果／奇異果／蘋果）

今日收到一份大禮，而且仲份量十足添，吾講得笑呀！哈哈。

佢係乜？之吾係『Philips創新微壓榨~慢磨榨汁雪葩機』囉！

講真，榨汁機對我嚟講，真係好陌生，我地從來冇做過朋友。今次係我人生中第一部「榨汁機」。因為我覺得榨汁機只得榨汁function，而且又大部又阻地方，用完後仲要洗餐死，所以。。。當然咪搞我啦！嘻嘻。

不過今次呢部就吾同啦！因為佢係一部一機兩用嘅榨汁機。除左榨汁外，仲可以做埋雪葩添。而且機身細少，容易收藏，吾會阻地方。配件清潔簡單，只要用清水沖洗，吾洗一分鐘就搞掂。最重要，佢係慢磨榨汁機呀！非一般榨汁機。慢磨有咩好？想知就睇吓介紹單張啦！

大家平時會飲／榨咩種類果汁？我個人就鍾意飲混合口味，雙拼，三拼，什至雜拼。只要D水果夠甜我就鍾意，淨係吾like D酸同冇乜味嘅水果。今次為左試驗新機效果，我就揀選三款比較多水份嘅水果，包括我吾鍾意嘅火龍果（冇乜味）同奇異果（酸味味），仲有我鍾意嘅Gala蘋果（清甜吾會澀）。聽落係咪覺得三款水果9吾搭8呢？如果呢三種水果mix起來，又會產生咩化學作用呢？哈哈。

當我榨緊第一杯，阿女已急不及待想試飲（做白老鼠）。佢飲完一啖，就馬上話好甜。。。好甜。。。真係好甜呀！但我當然吾相信啦！因佢連火龍果都話甜，奇異果又吾怕酸。點知我一試，咦！點解。。。點解。。。點解真係會咁甜架。太神奇啦！超乎想像，真係好正呀！甜到好似飲緊濃縮果汁咁呀！真係非一般果汁呀！

榨出嘅果汁，不會似普通榨汁機，放一陣會分成兩層（汁沉底，泡沫浮面），而且仲吾會變色（氧化）。

比一般果汁濃杰，高纖（飲到好多纖維）。

冰糖陳皮燉檸檬

記得第一次見人整呢款燉檸檬，已經係一年前嘅事啦（可能我未見過啫）！好似都幾特別，味道應該都會吾錯（比咸柑桔咸檸檬）。不過製作時間就。。。真係好花時間，而且仲有難度，難係難在要睇實，吾可以行開（出街）。假如用水波爐燉，連續燉12小時，每隔25分鐘加水及倒水一次，咁咪好吾得閒！坐定定係度，企定定係度囉！明火又點呢？一樣要定時加水，仲要睇火添。所以。。。我都係放棄算啦！

直至兩星期前，上網無意再見到燉檸檬，不過佢係賣嘅！仲要吾平，$150/300g。所以我就再搜尋吓做法，見到大致都差不多，只是材料份量不同，燉法不同啫。最吸引我其實係佢嘅功效（大家想知，可上網搜尋），因為好啱老公飲，所以我就立即行動，親手買材料，親手做每個step，確保冇甩漏，絕對食得放心及安心。

識我嘅都知我嘅作風，一係吾做，做就當然要做到最好啦！首先，我要從材料入手，第一樣就係要買好料，咁就可以食好料啦！求其就不如吾好做啦！吾好嘥錢，嘥時間，最慘係嘥心機。所以今次用了十年老陳皮，新鮮大檸檬，仲有原蔗冰糖。

好啦！一切準備就緒，就可以開得工啦！我與坊間做法最吾同，就係用左真空煲。足足燉超過24小時，出爐啦！你睇。。。色香味全。自家製燉檸檬，天然無添加，色澤晶瑩，味道醇厚回甘，益處仲多多添。Cheers！