五香咸蛋（續集）

今日終於到左收成嘅大日子，話說15/4果日浸左樽咸蛋，而今日係14/5，剛剛好一個月啦！心情既緊張又興奮，吾知成吾成功呢？！雖然話零失敗啫，但我都驚會破紀錄，成為零的突破。哈哈。

迷底終於可以打開，係。。係。。係大成功啊！我終於相信零失敗的預言啦！嘻嘻。

鴨蛋用五香鹽水浸左一個月，蛋殼都黏滿了一層薄薄的青苔般面層（滑滑地黏黏地）。需要用百潔布才可以將佢刷甩，最後又回復番白淨啦！至於樽五香鹽水，就變得深色同混濁。將蛋洗乾淨後，仲要抹乾，然後放入雪櫃保存。

我再為大家介紹一下，蛋黃橙紅亮麗，實的的。而蛋白晶瑩通透（忘記影相），不混濁。至於味道，就同街買到嘅冇分別，只係冇街買咁咸。

今晚我就即興用左4隻蛋黃嚟煮黃金蝦啦（蛋白冇要）！淨低嘅都會留番嚟包咸肉粽，下個禮拜見。

五香咸蛋

今年復活節，雖然冇復活蛋，但就有好另類嘅蛋，佢就係咸蛋啦！

響網上會搜尋到不同醃浸咸蛋嘅方法，但我一直都未敢試浸，亦可以話未有機會。

尋日同阿女撐完檯腳，就分道揚鑣（佢約左friend shopping） ，我無聊地去左行街市（北角春映街市），行吓行吓，咦！到左麵廠門口，佢地擺晒Ｄ雞蛋響度，混亂亦有序咁擺左一堆鴨蛋喺度。靈機一動，下個月就端午節啦！不如就自家製整Ｄ咸蛋嚟包粽啦！就係咁，就買左廿隻鴨蛋啦！其實，買鴨蛋係貴過買咸蛋架！一隻鴨蛋$2.5，一隻咸蛋都係$2.5。諗真Ｄ，係咪搵自己笨呢？！仲要做一餐大龍鳳，哈哈。

尋日掛住買鴨蛋，根本忘記左要買香料。所以，今日唯有行多轉，再去遠Ｄ（馬寶道天然椰子號）買香料。平時我一定會去香料鋪買香料架，吾會是但求其買。因香料鋪夠專，夠多，夠齊，又夠新鮮（因流量快），所以搭車都會去買。依家Ｄ香料鋪都好細心，pack到細細包，幾蚊有交易（$5／$8包），吾洗好似以前大大包，實用吾晒，掉多過用。今日買齊5款香料，都只係$28咋。材料準備好啦！計吓數，香料$16.5（除丁香用晒一包外，其他只用了半包），鴨蛋$50，粗鹽$6.5，加加埋埋$73（平均$3.7隻），一Ｄ都吾平呀！

預告，今年端午節咸肉粽價格，因成本增加，而作出適當調整（單咸蛋已升幅50%），嘻嘻。一個月後就可以知到成果啦！好期待呀！最怕就係等。。。等。。。等。

自家浸荔枝桂花陳酒

其實上年已想浸荔枝酒，但因季尾買吾到靚荔枝，所以始終都浸吾成。

時間過得真快，又係荔枝開鑼嘅季節啦！早幾日惠康購物時，見到有荔枝「妃子笑」，青BB，細細粒，要$3X盒（約一磅多d），好似都幾貴咁，所以最後都冇買到。

今日經過街市，又見到有「妃子笑」，$18磅，見檔主切開左幾粒陳列，見佢大粒d，核仔又細細（好似糯米糍），所以買左兩磅，跟手再去埋惠康買左兩枝桂花陳酒。

返到屋企，當然立即開工啦！首先浸洗荔枝，然後消毒玻璃樽，再。。。。。荔枝去殼時，已聞到陣陣飄香，阿女仲忍吾住偷食左幾粒添。

吾知生果檔係咪呃人，因為d荔枝起碼有一半係大核架。其實大核同細核嘅荔枝除左粒核吾同大細外，仲有味道都吾同架。大核荔枝味道係清甜帶微酸（似桂味），細核就濃甜（似糯米糍）。

講吓桂花陳酒先，顏色係偏紅，聞落估吾到又幾香喎（我覺得比米酒同清酒香好多）。將桂花陳酒加埋荔枝浸，出嚟嘅成品，我估應該都幾好飲（浸緊都已咁香），不過要等半年後至可以報告給大家知，好啦！半年後就有得飲啦！

醃酸青瓜

見天氣開始轉熱，又係醃製食物好時機了。可以平時無無聊聊時咬兩舊，不知幾爽呀！而且仲超易做添。除左浸青瓜外，仲可以浸白蘿蔔、木瓜同紫薑架。

材料：
青瓜 2條
白米醋 500g
冰糖 500g
玻璃樽 1個

做法：

1. 白米醋加冰糖煮溶，攤凍備用。
2. 青瓜洗乾淨，切件，加鹽拌勻醃15分鐘。
3. 沖洗青瓜（鹽），再用飲用水浸洗一下。
4. 瀝乾水份後，將青瓜放入玻璃樽，然後注入已放涼糖醋水（浸過青瓜面）。
5. 存入雪櫃一至兩日即可食用。

水果酵素

上次同大家分享過浸梅酒，係咪好好玩呢？不過要等半年真係好難忍呢！其實係講我自己啫。因為我份人比較性急，所以要我等咁耐真係好辛苦架。哈哈！

不過都有Ｄ吾洗浸咁耐嘅，之吾係「水果酵素」囉！今日就等我同大家介紹／分享下啦！

水果酵素其實都好容易做，佢除左味道香甜外，仲有好多益處架。睇書話水果酵素可以改善體質，促進新陳代謝，又有助排出體內毒素（樣都靚Ｄ），仲有仲有。。。可以改善便秘呀！

大家可以浸自己鍾意嘅水果，蘋果，木爪，奇異果，火龍果，諗得出都得。其中有幾種水果要特別推介，一）菠蘿：抗炎、袪濕、幫助消化、舒緩喉嚨痛。二）雪梨：促進心臟和血管健康、排出體內毒素。三）火龍果：補血、抗衰老。仲有好多好多，講吾到咁多，吾好懶，自己上網搜尋吓，因網絡資訊實在太勁啦！

今次我就一次做左兩款味道，有雜果酵素和菠蘿酵素。

梅酒

～　分享往年作品　～

清明前後，又係青梅的季節，又到左浸梅酒嘅時候啦！

不過今年我冇浸，因為舊年浸嘅都仲未飲晒。

如果大家都想試吓浸嘅話，就好快ｄ手，趁仲有青梅賣嘅時候，遲左得番黃梅就冇得浸啦！

原味梅酒（加冰）

伯爵茶梅酒（加冰）