冰糖陳皮檸檬膏

我又嚟燉檸檬啦！上次燉嘅又飲晒啦！不過其實今次仲有令一個目的，就係燉嚟送禮呀！因為我細妹想飲，而佢又會嚟緊個星期日（29/7）返香港（趁D女放暑假），所以我要準備定啦！話說細妹舊年已講定，今年會返香港，仲話到時要試我嘅燉檸檬，所以一早我已買定真空玻璃樽同包裝，今日終於可以用到啦！雖然只係做比屋企人，但我都要做得好好睇睇，吾好失禮。

今次燉法同以往有少少吾同，我在燉到10個鐘時，用攪拌棒（直接放入燉盅）將全部材料打爛，然後再繼續燉多3個鐘，之後工序就同以往一樣，如入樽，倒轉，放涼等。

而製成品經雪過後（自己食果d），可以見到同平時嘅好大分別，係杰身好多，好似醬／膏咁樣。顏色方面，會比較實，不通透。而味道亦有分別，比以前較濃厚。最重要，係啱阿妹飲，因佢吾愛食渣，依家可以連渣都飲埋，咁就吾怕蹝嘢啦！

爵士湯

記得第一次煲呢個湯，因為買吾到蜜瓜，所以轉左用哈蜜瓜，點知味道竟然出怪地好。啖湯基本係吾會飲到哈蜜瓜味，哈蜜瓜嘅味道好低調，但就可提升湯嘅鮮味，湯既清甜，仲好香，真係一試難忘。

今日行超市，見到有蜜瓜開箱（$31.90），所以就吾執書買番個。如果大家都想試吓，記住要揀個生d，皮要青，瓜按落要硬。吾好揀皮已變黃及淋身，因已太熟啦！

不過今次我吾係煲呀！今次係燉呀！因為我買左燉盅嗎！當然要用多d啦！平時好少出街飲湯，因為湯梗係要飲住家囉！不但真材實料，而且仲經濟好多添。

呢個燉湯如果出街飲，4人份要三四百蚊，依家自家燉8人份，都只不過二三百，平左又多左，吾洗教都識揀掛！燉湯仲要吾洗理，禁個制就可以有湯飲。

點樣令你屋企嘅男人（老公同阿仔）愛回家，除左識煮飯，煮餸，甜品，仲要靠啖靚湯架！

冰糖陳皮燉檸檬（禮盒裝）

話咁快又係時候燉檸檬啦（因為派晒同就嚟飲晒）！

近期新奇士檸檬價格仍然維持高位（$4個），但比上次size大左10%左右，咁就當佢平左啦！哈哈。

今次冰糖並吾係用太古原蔗冰糖（$12.X/250g），亦吾係街市買到果種袋裝冰糖（$7/600g），而係太古盒裝黃冰糖（$8.X/350g）。因姐姐買左檸檬，但又吾記要買冰糖，所以唯有臨急去左U Select買（屋企附近）。

今次份量比上次多，搞到燉盅放吾晒，唯有將一盒冰糖放入大碗，蓋上保鮮紙，然後將冰糖蒸溶（實驗成功），再倒入燉盅（其實有空間可注入液體），哈哈，咁又比我過到骨啦！咁就可以一次過燉晒，吾洗中途加冰糖啦！今次都係用電燉盅，都係燉左13個鐘，效果真係超正。

其實今次燉檸檬仲有另一個目的，因為今年有幾位親友健康都出現問題，所以我打算今年拜年吾再送糖果或自制花生酥/曲奇/鳥結糖等。因為我希望收到嘅親友，都可以食得更健康。

材料：
老陳皮　　　　1兩
新奇士檸檬　　1320g（12個）｛去兩端／白芯／核後｝
碎冰糖　　　　1400kg

其他：
食用梳打粉　　2茶匙
清水　　　　　適量
粗鹽　　　　　適量
已消毒玻璃瓶　2000ml

做法：

1. 清水加梳打粉拌溶，放入檸檬浸泡30分鐘（水要蓋過檸檬）。
2. 檸檬用清水洗淨，然後用粗鹽擦拭檸檬表面，再用清水洗淨。
3. 用廚紙抹乾檸檬水份，放架風乾一晚。
4. 陳皮浸泡至軟身，用刀仔刮乾淨果囊，然後清洗乾淨，用廚紙抹乾水份，放架風乾一晚。
5. 第二日，將檸檬切走兩端，然後切開一半，取走中間白芯。
6. 將檸檬切片及去核，陳皮切絲。
7. 將檸檬，陳皮，冰糖順次序放入燉盅內，然後隔水燉12小時（中途可拌勻一次）。
8. 完成後趁熱注入已消毒玻璃瓶內，蓋好立即將瓶反轉（製造真空狀態）， 整瓶完全冷卻後，反正及儲存陰涼處。

貼士：

• 如開封後，要放雪櫃儲存，而未開封的可儲存陰涼處3個月。
• 全部食材及器具都不能有一點水
• 陳皮越老，功效越好。
• 容器清洗乾淨後，用大火烚10分鐘消毒，然後抹乾及風乾。

步驟：冰糖陳皮檸檬

桂圓紅棗燉雪蓮子

今日我繼續都係燉野，因秋冬天氣吾燉仲等幾時。今次燉嘅吾係湯，係 "糖水" 呀！做法超簡單，勁容易，最難？咪就係要預早浸定雪蓮子囉，哈哈。

其實今次都係我第一次買/食/燉咋，之前曾經在海味店見過，仲誤以為係天山雪蓮添！原來雪蓮子價錢都吾叫平（$70/100g），但比起燕窩，當然平到笑啦！事關雪蓮子又名植物燕窩，識食一定知點食啦！用一盒牛奶價錢，可以食到燕窩效果，以後食多D都吾怕啦！

食後感：

雪蓮子口感有點像雪蛤膏，黏黏地淋淋地，gelgel地，所以吾好煮太耐。其實雪蓮子本身並冇味道，單靠糖水個底味。如果鍾意飲清D，可以學我燉桂圓紅棗，或者蓮子百合，如鍾意重口味，就可燉杏仁汁/椰汁/薑母等，其實好隨意，自己鍾意飲乜就燉乜啦！

為大家略略介紹下雪蓮子：

雪蓮子又名皂角米，純天然無害果實，含多種維生素，營養價值豐富，無色無味。屬高能量，高碳水化合物，低蛋白，低脂肪食物。具有養心通脈，清肝明目，健脾滋腎，袪痰開竅，疏腸利尿，潤膚養顏，提神補氣等。男女老幼皆宜，特別適合糖尿病患者食用。

桂圓花旗參鮑魚燉乳鴿

尋日放工行惠康見到有冰鮮乳鴿賣（好少見到），咁我就諗可以買嚟燉湯喎，所以我就買定一隻（$38），返屋企至慢慢諗點燉。

尋晚上網搵過有關乳鴿燉湯，點知原來冇乜選擇架，最後我諗到呢款湯，其實當佢雞咁燉咪得囉，應該冇問題嘅，哈哈。

於是叫左姐姐今日買舊豬展，然後加少少配料，咁就完成左呢煲燉湯啦！真心講，燉湯真係好飲好多架。

蟲草花姬松茸響螺雞腳燉豬展

買左燉盅，梗係要用多d啦！今日就等我試埋燉湯啦！

其實好少機會飲到燉湯，飲得最多應該都係N年前坐月果時啦！

本來想燉鮑魚響螺雞湯㗎，但屋企原來冇晒金華火腿，所以最後燉左呢款湯。

燉完都嚇一跳，點解會咁黑嘅？！可能係松茸同蟲草花定啦！

雖然我係用大燉盅燉，但阿女話要用燉盅裝住飲，先至似係燉湯喎！咁咪滿足吓佢要求，用個小燉盅當碗裝比佢飲囉！哈哈。

冰糖陳皮燉檸檬（完美篇）

正所謂『工欲善其事，必先利其器。』，其實我一直都好相信。所以為左日後方便繼續燉。燉。燉。唯有向現實屈服，終於買左部燉盅啦！希望以後可以做得更好，將最好的。。。給家人。

最始我打算今次用西西里檸檬燉，仲訂埋貨（貨會8/12到油麻地果欄），可惜果欄話暫停送貨，仲係冇得留貨，要先到先得，咁冇法啦！唯有放棄。不過重點係，我未有燉盅呀！哈哈。

其實買一個電燉盅吾難，但要買一個合我要求就有ｄ難。我要求其實好簡單，一> 隔水蒸燉（非明火，容器不能直接受熱，否則就不是燉），二> 容量大（3L以上），三> 外型（吾老套，吾太大件）。電子瓦罉，壓力煲，智能煲等，全部都吾啱要求，因為佢地都係明火。

最後，比我揀左呢部「樂信牌」陶瓷蒸燉湯煲（最新款），佢外型吾老套，容量又夠大（3.5L），仲係多功能添。上述幾點已滿足晒我嘅要求。

如果大家吾介意普通檸檬嘅苦澀味，又吾介意普通檸檬嘅口感，咁就吾一定要搵／買西西里檸檬啦（聽講西西里皮厚，肉汁多同味濃，口感煙韌有咬口）！西西里檸檬不但難買到，而且價錢仲好貴添（西西里$60/400g：新奇士$4/110g）。

功效：
冰糖跟陳皮都有健脾和胃、潤肺止咳作用，而檸檬可消解胃氣，咽痛喉乾，燉足13小時的老陳皮冰糖燉檸檬對喉嚨痛\咳嗽濃痰 \咽喉炎\慢性支氣管炎有顯著的改善作用。對於體內濕氣重\長用喉嚨\煙酒過多\熬夜上火也有保健作用。

~ 送禮用 ~

~ 加多件外套 ~

~ 老公嘅 ~

冰糖雪耳燉蘋果

新玩具終於到手啦！我真係急不及待要立即開箱（試機）。可惜屋企冇鴨梨啦！只得加拿蘋果，都照殺啦！求其加d配料（紅棗、雪耳、南北杏），快快趣開工（燉）啦！

我連說明書都未睇，所以只係斷估用快燉模式，見滾起又轉用燉湯模式，嘻嘻。

其實呢個係我第一次買嘅電燉盅，原因就係為左燉檸檬，所以下集就會見到啦！

冰糖陳皮燉檸檬

原來上次燉檸檬，已經係四月啦！其實早排已經飲晒，只係未有心情再做。

尋晚突然心血來潮，所以咪再encore囉。而且都係時候要燉番d氹吓老公啦！

上次同今次一樣都係我親手刮果皮，一樣刮餐懞。但今次吾同係d果皮風乾後，竟然乾到脆卜卜，冇可能切到絲，唯有剪。

今次吾再多介紹啦！有興趣可睇番第一次post（冰糖陳皮燉檸檬做法）。

冰糖陳皮燉檸檬

記得第一次見人整呢款燉檸檬，已經係一年前嘅事啦（可能我未見過啫）！好似都幾特別，味道應該都會吾錯（比咸柑桔咸檸檬）。不過製作時間就。。。真係好花時間，而且仲有難度，難係難在要睇實，吾可以行開（出街）。假如用水波爐燉，連續燉12小時，每隔25分鐘加水及倒水一次，咁咪好吾得閒！坐定定係度，企定定係度囉！明火又點呢？一樣要定時加水，仲要睇火添。所以。。。我都係放棄算啦！

直至兩星期前，上網無意再見到燉檸檬，不過佢係賣嘅！仲要吾平，$150/300g。所以我就再搜尋吓做法，見到大致都差不多，只是材料份量不同，燉法不同啫。最吸引我其實係佢嘅功效（大家想知，可上網搜尋），因為好啱老公飲，所以我就立即行動，親手買材料，親手做每個step，確保冇甩漏，絕對食得放心及安心。

識我嘅都知我嘅作風，一係吾做，做就當然要做到最好啦！首先，我要從材料入手，第一樣就係要買好料，咁就可以食好料啦！求其就不如吾好做啦！吾好嘥錢，嘥時間，最慘係嘥心機。所以今次用了十年老陳皮，新鮮大檸檬，仲有原蔗冰糖。

好啦！一切準備就緒，就可以開得工啦！我與坊間做法最吾同，就係用左真空煲。足足燉超過24小時，出爐啦！你睇。。。色香味全。自家製燉檸檬，天然無添加，色澤晶瑩，味道醇厚回甘，益處仲多多添。Cheers！

姬松茸響螺雞湯

我除鍾意整野食外，仲好鍾意玩吓煲湯架，因為我家主人好like湯水，無湯不歡。基本上每餐晚飯，都會係三餸一湯，除非吾係，哈哈。

上星期日，專登落銅鑼灣安記（新開張）買海味湯料，今次買左美國響螺頭乾，試吓吾買急凍，睇吓會吾會甜d呢？！

加埋屋企之前買落嘅姬松茸同其他配料，就煲左呢個好好味嘅湯啦！

杏汁白肺湯

今日係開頁以來，第一次同大家講湯水篇，仲係我咁大個女第一次煲嘅湯水添！飲就飲得多，親手煲真係未試過，亦未諗過。

以前都係媽咪幫我買，幫我煲。點解今次我會自己煲？因為尋晚突然想煲比老公飲囉，嘻嘻。

所以今朝一早起身就去行街市，諗住親自去買豬肺，應該會好過叫姐姐去買掛（怕姐姐比人呃或吾識買）。

去到豬肉檔，吾見有豬肺掛出嚟，所以開聲問豬肉佬有冇，佢話有，問我要幾多個？我問番佢轉頭應該要幾多個？佢答四人份量買一個就夠，於是我就買一個啦！

豬肉檔多數會幫人洗埋，所以我至會買咋。依家一個豬肺洗埋要$35，其實我都吾知算吾算貴。再買埋豬脊骨$55（冇咁油）同雞腳一齊煲，應該都好夠甜啦！