低溫慢煮羊架 (惠而浦4S)

今次試左4S慢煮模式，冇浸浴，將真空左嘅羊架成袋放上架，60度蒸氣90分鐘 (下次要改60分鐘)。

仲試埋原排焗，230度焗23分鐘 (下次改焗15 分鐘)，估吾到效果又幾好喎，不過就over左d（太熟）。

好彩用左慢煮方法，所以就算過熟，d肉都吾會鞋，仲好淋滑㗎。

低溫慢烤腩叉燒

豬肉價格仍然高企，作為慳家的C9，由於自制成本高，所以都係停一停諗一諗。

如果想食叉燒，就唯有幫親燒臘檔啦！但試過咁多間（連食神叉燒都試埋），都買吾到一間令屋企人滿意。吾通想食舊正叉燒都咁難？答案：係！真係好難。都係怪我屋企人對叉燒要求太高，太奄尖吧！哈哈。

星期五晚，放工去左惠康shopping，買左3盒「泰正」冰鮮豬腩肉（共1050g，折後$89.5），諗住買嚟焗叉燒。等星期六醃定，星期日咪有得食囉。

第一次用4S焗叉燒，基本上同水波差不多，只係溫度去吾到240度，最高只有230度，但好彩並無影響效果。今次係4S第3次焗，暫時表現都非常理想，效果亦超滿意（絕對比水波有過之而無不及）。

其實自家制叉燒，真係好花時間／心機／功夫，基本上會冇左一晝（三四個鐘）。由其係慢烤，真係少Ｄ心機都吾得，冇得行開架，真係要企定定，全程好忙好忙好忙（真係好忙，所以要講3次）。

雖然真係好麻煩，冇晒時間，但當屋企人食完，個個都讚口不絕嘅時候，就乜都值番晒啦！哈哈。可以誇口講句，我整嘅叉燒真係出面食吾到架，哈哈。

**試過中國同澳洲冰鮮豬，覺得今次泰國冰鮮豬最好，下次可以繼續。但吾建議用急凍豬，無論效果同味道都差好遠，吾好味（已試過）。**

超淋超滑超正（真心的買吾到）

德國脆皮咸豬手

第一次買高雲牌咸豬手，理由好簡單，因為特價囉，哈哈。平時60蚊一隻，依家特價40吾洗一隻，吾買對吾住自己啦！如果冰箱有位，買夠十隻添呀！哈哈。

以前一直買開金豬o麥，不過佢嘅包裝成日都漏氣入晒雪，豬手表面有層結霜，所以我都冇買好耐啦！

其實兩隻牌子嘅豬手分別吾大，最明顯都係顏色同形狀啫。不過家人食過後，都話高雲牌好食D，因為肉嘅層次，味道同濕潤度，都比金豬o麥較好。

如果下次再有特價，我都會買定幾隻看門口。

低溫慢煮叉燒 - 慢煮棒做法

因為新聞報導話年三十至年初二會停售新鮮豬肉，所以我上星期四就一早去街市買定舊靚梅頭（放冰格），目的就係為左今日拎去拜年（加料），哈哈。

早排同同事傾開整年糕，然後講吓講吓又講到慢煮（傾嘅範圍可以好闊），點知原來佢已買左慢煮神棍，之不過佢新屎坑，用過兩次就冇再用啦！所以我咪問佢借嚟玩吓囉（佢話借比我用先）。

我都係第一次用慢煮棒，原來係用手機藍芽開關同控制，真係好高科技呀！哈哈。好彩Youtube有人教學，一睇就識得用啦！今次試左65度2個半小時，效果真係吾錯。

其實慢煮棒都幾方便幾好用，但就大枝左Ｄ囉，要收埋佢都係一個問題。

水波爐低溫慢煮叉燒

今次特別為水波爐用家，詳細講解吓，如何使用水波爐代替慢煮棒，製作低溫慢煮叉燒。

呢種做法，叉燒超淋，正！

自家製叉燒小貼士（如何選擇靚梅頭）

想自家製到一舊靚叉燒，可以說易不易，說難不難。因好多時，大家都會以為好容易（如果吾講究的話），但對我嚟講，真係吾係易事。

記得第一次焗叉燒，雖然買到舊自以為好靚嘅梅頭肉，點知焗完出嚟，又嚡又乾，搞到比屋企班奄尖又嘴刁嘅食家（大老爺，大少，大小姐）彈到上天花，踩到落落地呀！

自此之後，我並無放棄，而且仍繼續試。直至到第三次，終於比我研究到原因，開始識得去選肉，選吾啱令願吾做，千奇吾好夾硬買，夾硬焗。雖然買啱肉，但都要煮法配合，所以我繼續再研究煮法。試過幾種做法後，最後，我發覺都係慢煮方法最好，又淋又滑又juice。所以，我以後都會用慢煮方法嚟做叉燒啦！

為左令大家可以買到啱嘅梅頭，所以今朝9點，我就特登去街市一趟，希望見到靚梅頭，可以影到比大家睇吓。雖然好彩比我見到，但第一刀就比人買左，所以今次呢舊比較短D，但都冇影響嘅。

原舊梅頭

＊約三斤重＊

低溫慢煮秘製叉燒

已經有半年冇整叉燒啦！原因係買吾到啱梅頭，所以令願吾做，免得嘥時間兼嘥心機。如想食到好味道嘅叉燒，其實一Ｄ都吾容易。首先由買舊靚梅頭開始，然後就係時間啦！最重要當然係心機啦！

依家出街買到嘅叉燒，多數都係冰鮮豬肉，都要賣$90-100斤。如想食新鮮豬肉做嘅叉燒，吾係話冇，只係比較難，而且仲好貴，要$150-180斤呀！

尋日同阿女撑完檯腳（食早餐），見時間尚早，所以去街市走一趟，睇吓仲有冇緣遇到舊靚梅頭啦！好好彩，仲有一舊，於是我就叫豬肉佬切左兩斤比我啦（淨番尾瘦果舊吾要）！

提提大家，吾係全部梅頭都啱做叉燒，因梅頭都有肥有瘦。重點係切嘅方法，豬肉佬一般都會將舊肉橫切，咁係錯架，其實應該係要直切架。橫切雖然係有好多油花，但當焗完之後，油份就會消失，切片後會見到順紋，所以食落會又嚡又乾。相反直切的話，會見到肉係順／直紋，中間仲間住一條條肥（直條），即是一間肉一間肥，當焗完切片後，會見到肉係逆紋，所以食落會又鬆又軟。

想鬆軟當然要下Ｄ功夫啦！因梅頭肉比較結實，如果跟一般焗法，肉質會比較有彈性，有趙口。所以我比較鍾意慢煮方法，因叉燒做出嚟會比較淋滑鬆化。

要食就吾好懶啦！首先早一日做足準備，然後將肉醃一晚，跟住第日就慢煮3個鐘，再焗就得啦！每個步驟都好講心機架。可惜，食嘅人永遠吾會感恩，亦吾會明白做嘅人有幾咁用心呢！

今次用左半樽百花蜜（之前BBQ用淨）

慢煮烤羊架

今年聖誕大食會，我煮左一款出得大場面嘅菜色『慢煮烤羊架』，呢個菜都見得下人掛？又香又滑又淋，我地全家都好喜愛呢！

想食可以早一兩日預備（當日做也可以），做定慢煮部份，然後放雪櫃，到食當日取出回溫，然後煎香就搞掂啦！今日媽咪同家姐都係第一次食咋，佢地真有口福，有機會試吓我嘅手勢。

其實切開係粉紅色，冇血水的，但放左一陣竟然變左深紅色。

做法可參考＞慢煮羊架做法

雜菜燴牛展

一款好啱大食會嘅菜色，可以配麵包，薄餅，白飯或意粉。甜甜酸酸，材料簡單，每個家庭都可以容易做到，仲係零失敗架。連我阿媽都做到，你地一定做到啦！

秘製醬燒豬肋骨

呢個食譜醬料種類比較多，每次做完屋企又會多幾樽醬，哈哈。所以每次買完，都會做多幾次。其實我都好耐冇整啦！因為吾想買咁多醬囉，哈哈。

今次為左搞聖誕大食會，又想食得高級Ｄ，所以就揀左佢啦！其實自己整好經濟咋，一條豬肋骨都只係$60（吾計醬），出街食冇兩舊都食吾到啦！所以呢味菜我都係自己整多過出街食（即係其實好少食）。

米話吾講你知呀！呢個做法係非一般做法，非一般味道，絕對稱得上大師級架，因為佢並非叉燒醬，中式醬（簡單醃）。呢個係西式做法，仲係餐廳做法嚟架。吾信？咁就要自己試吓啦！雖然醃料多，但一定要跟足呀！值得買架，幾十蚊食到餐廳效果，抵啦！

蟲草花姬松茸響螺雞腳燉豬展

買左燉盅，梗係要用多d啦！今日就等我試埋燉湯啦！

其實好少機會飲到燉湯，飲得最多應該都係N年前坐月果時啦！

本來想燉鮑魚響螺雞湯㗎，但屋企原來冇晒金華火腿，所以最後燉左呢款湯。

燉完都嚇一跳，點解會咁黑嘅？！可能係松茸同蟲草花定啦！

雖然我係用大燉盅燉，但阿女話要用燉盅裝住飲，先至似係燉湯喎！咁咪滿足吓佢要求，用個小燉盅當碗裝比佢飲囉！哈哈。

支竹羊腩煲

仲記吾記得我上個post講過？我咪話買左兩包羊腩嘅，今日終於有得食啦！因為我想等埋阿仔一家人一齊食，所以咪等到今日佢放假，留響屋企食飯我至煮囉。

原來我已經N年冇整過羊腩煲啦！連做左6年半嘅姐姐都話第一次見咋，仲係第一次食添，哈哈。

我都係第一次買急凍羊腩咋，味道比新鮮羊腩so（都可接受），但就快淋好多，炆左半個鐘就淋啦！一個鐘都吾洗就有得食啦！

鹵水拼盤（牛腱、雞翼、雞腎、雞蛋）

今日第一次自家製鹵水汁，過往只會買現成鹵水汁嚟用咋。

話說星期四，去惠康睇吓有咩新鮮生果買，點知裝修緊（局部），D貨重新擺位，蔬果位置竟然變左凍肉櫃。而凍肉櫃又放左好多新款凍肉，全部$79.9/2件，所以我都吾執書，揀吓有乜啱食，最後揀左兩包牛腱同兩包羊胸。

尋日咁啱又經過馬寶道，所以就去左椰子號行吓啦！每次去都會買番少少野，今次就買左黑白胡椒粉同孜然粉，都係十蚊樽，平靚正。跟住就買埋黑芝麻（已烘，特價$22/300g，原價$25），用嚟整芝麻糕夠晒香。當我想比錢時，見到收銀機旁有好多雜貨，如乾薑粉，陳皮粉，薏仁粉，雪梨乾等等。無意中見到一包包鹵水料，心諗可以用嚟鹵牛腱喎，於是就買埋佢啦（$15）。因為未試過，所以問吓老闆娘點處理，跟住佢就比張紙仔我（做法），叫我跟住做就得啦！佢仲話，鹵水汁可以留番下次用，越舊越正，好似潮州鋪果D咁，可以用過百年以上呢！不過。。。最大問題係。。。屋企個雪櫃邊有位可以長期keep住煲鹵水汁呢！

蜜汁叉燒

自家製叉燒，首要條件，就係買舊靚梅頭。如果買吾到又點？就梗係吾好做啦！無謂嘥時間同嘥心機嗎！

講真，靚梅頭真係可遇不可求，吾係話買就買到架。如果想買，一定要趁早，係晨早個早呀！晏Ｄ就冇架啦！如果有相熟豬肉檔，就梗係叫佢留比你啦！

呢舊梅頭其實已經買左一星期啦！因為難得遇到，所以我都會買定，雪左隨時可以做。知道今晚齊人食飯，所以早兩日已放回普通格回溫，尋晚就可以醃定啦！

今次我跟東芝水波爐（蜜汁叉燒）做法，揀左混合式焗法。結果，真係好濕潤，一Ｄ都吾乾，而且肉質淋滑。但賣相顏色比較偏淡，而且吾夠焦香。所以我加長左時間，然後再加埋燒烤，賣相至有咁吸引咋。

經多次累積經驗，我都係最鍾意低溫慢煮秘製叉燒做法。低溫慢煮不但肉質濕潤，淋滑，而且仲好夠焦香。

靚梅頭

燒腩仔

有左光波爐，吾洗吓吓開焗爐。係咪好壓韻呢？哈哈。

今日要整一樣人人都覺得好難，又或者麻煩嘅燒腩仔啦！因為有好多人都會話焗親都吾夠脆。其實燒腩仔脆吾脆係關個皮爆吾爆事，要脆就要爆，吾爆咪吾脆囉。明我講咩嗎？嘻嘻。

首先五花腩要肥瘦適中，舊肉吾好咁太厚，如買到太厚吾緊要，將面帶骨果層肉切走就得（可用嚟煲湯，吾會嘥）。太厚會好難熟，同埋肉質會粗糙。燒之前最好將肉風乾吓，然後響豬皮度插好多好多好多孔，越多就越爆，但千其咪插得太深，小心插穿皮下脂肪就吾脆啦！

尋晚放工去惠康買吾到新鮮五花腩，所以買左舊冰鮮五花腩頂檔，醃左一晚後，要將舊肉表面醃料抹走（抹乾淨），仲要印乾水份，再風乾一陣就焗得啦！

因為我份人比較懶，驚焗完要洗餐死，所以我就加左兩塊錫紙墊底囉。嘩！好在我醒目咋，你睇，真係好多油滴出嚟呀！我好鍾意見到呢個效果，因為即是等於食少好多油落肚嗎！吾怪得咁多人都鍾意用光波爐焗豬／羊／雞啦！

低溫慢煮秘製叉燒

做叉燒都吾係第一次，但想做出好味又淋滑嘅叉燒，就吾係咁簡單。記得對上一次整叉燒，不但淋滑，仲好juice添，人人食完都讚佢係最好食嘅一次。

時間過得真快，原來已經差不多一年冇整過啦！因為如果想整叉燒食，真係不可假手於人，每次都必定要親身去買，去街市揀舊靚豬肉至買。所以如果買吾到，就令願吾做。點解咁耐都冇整？一話賣晒，一話冇時間。。。就係咁啦！嘻嘻。

今日好好彩，兩點去到街市，隨口問吓豬肉佬（心諗都冇啦），有冇靚梅頭做叉燒用梅頭呀？點知佢竟然答：你好彩，我收埋左一舊。然後佢就去雪櫃拎左舊梅頭出嚟（每次都係收埋，今次都吾例外），仲話費事掛出嚟，切散晒冇人買（因佢吾切開，想成舊賣，所以收埋。），經我左望右望後，驗過後，都過得去嘅，好過冇啦！咁咪買起佢囉！

其實大家會問，點為之係靚梅頭呢（啱整叉燒）？咁就等我介紹吓啦！首先，揀一舊靚梅頭，然後就係要識切。點切至啱？就係要直紋切，吾好似牛扒咁逆紋切，雖然切開好靚，油花分佈好好，但絕對吾適合做叉燒。因為吾好忘記，當你焗完切片時，每片都會係順紋，一Ｄ都吾肥美，食落仲會覺得粗鞋添。所以一定要將梅頭順紋切開，切開會見到一間間打直白色肥豬肉（如圖）。當焗完切片時，就會見到逆紋，食落吾會覺我韌，亦吾會覺得粗糙啦！

大家食／買叉燒，有冇食過三粒肉呢？係叉燒最好食嘅部份，一粒肉，一間肥，一粒肉，一間肥，一粒肉。不過一舊梅頭，最多都係得兩三條。所以想要買到，最好就同豬肉檔訂定啦！

嘩！超正呀！好食到冇朋友呀！冇呃你架，快Ｄ試吓親手做啦！

不過，咪話吾提你，食過後，真係冇得返轉頭。哈哈！

溫泉蛋臘味飯

今日冇做甜品，只煮左個臘味飯，但並不是一般嘅做法，係加左溫泉蛋同蕃薯架。

重點當然係隻蛋啦！嘻嘻。

水波爐做溫泉蛋，零失敗。做法簡單，只需將蛋放入爐，65度蒸40分鐘，靚晒。