一口脆皮奶黃月餅（4S蒸焗爐）

今日又有焗，今年第二輪奶黃月餅，同時亦係最後一輪。

今次試左全程230度，淨上火焗，效果都好滿意，明年可以照跟，無須試爐啦！

朱古力脆皮奶黃月餅 - 2020

 今日繼續試爐，試吓只用淨上火，結果真係比用上下火好。今次全程冇溶化（象腳）跡象，不過吾知關吾關轉左朱古力餅皮事，可能又要等下次再試先知真相。

今次嚟個中西合壁，朱古力餅皮配奶黃餡，估吾到味道又幾夾喎，仲好好味添。今次除左味道好之外，其實焗法更簡單方便，吾洗掃蛋，又吾洗掃糖水，一take過，完全冇技巧，成功機會仲係極高呢！

出爐

焗前

餅皮分佈均勻

迷你脆皮金莎奶黃月餅 - 2020

換左4S後，都係第一次焗月餅咋，希望部爐生生性性啦！好彩都不過不失，仍有進步空間。

自從舊facebook被停用後，已冇以前咁積極煮嘢食，會等到真係好想好想食先肯出手。現在煮食心態同以前好吾同，會睇有冇時間，盡量吾會迫自己去做，而且亦會放慢嚟做，令自己可以放鬆，盡量享受過程。雖然人變得懶惰，但吾再有壓力，感覺係良好嘅，哈哈。

迷你脆皮奶黃月餅 - 2019

上星期已送出第一批奶黃月餅，今日再嚟第二批，不過就變左迷你版，因為要送比好多人（正常吾夠分）。

紅菜頭脆皮奶黃月餅（2019新口味）

每年中秋，月餅嘅重頭戲，一定係奶黃月餅，而今年都吾例外，不過就吾係傳統果隻，而係新嘗試『紅菜頭』呀！我都係第一次用紅菜頭煮食咋。

計埋今次，我已用過三隻紅色粉，紅麴粉，紅桑子粉同紅菜頭粉。三隻比較，我覺得今次紅菜頭粉最sharp，最紅，最出色。上次嘅紅桑子粉就偏粉，比較可愛。舊年用過嘅紅麴粉，就比較暗沉，偏瘀。依家屋企仲有包藍莓粉未開，吾知遲D用嚟配咩好呢？！

事關我實在太多花片啦！所以每款只能印一個花，咁先吾會用漏嗎！哈哈。個人認為，如果印花型，不宜掃蛋或糖水，因會出爐後花紋會吾明顯，睇我d就知啦！出爐前後係咪差好遠？反而字就比較明顯D。當掃埋蛋及糖水後，一定會更失真。

獨立包裝

雖然只是簡約包裝，但都好有體面掛！

脆皮奶黃月餅 2019

尋日都講過我有好多月餅模花片啦！吾係吾信呀！今日就同大家晒冷啦（大部份）！嘻嘻。

今日終於輪到傳統奶黃月餅啦！為左襯番傳統兩隻字，就配合吓用晒文字花片啦！全部都係我嘅大名嚟架。

我覺得50g模做月餅最好，吾太大亦吾太細，月餅大小剛剛好，所以我大部份嘅花片都係50g架。

紅桑子脆皮棗仁月餅（2019新口味）

今日約左媽咪去煤氣公司上堂，所以尋晚焗定月餅，今日就可以有禮送啦！

因時間關係，又因我已預先準備定個餡，所以今次可以做得好輕鬆。

加埋包裝，可以送出啦!

焦糖棗仁餡（少油少糖）

時間過得真快，眨吓眼又一年啦！仲有一個多月又到中秋，係時候諗吓有咩新搞作啦！

其實心裡面一直有個疑惑，點解老人家咁鍾意食金腿五仁月呢？吾怕咬到牙都軟咩（果仁咁硬）？好似我奶奶同媽咪咁，佢地每年都會買一個自私食架，哈哈。係咪真係咁好味呢？

話時話，記憶裡，我真係從未食過金腿五仁月，因為我覺得月餅應該係甜，而金腿五仁月又咸又甜，好古怪，我接受吾到囉，哈哈。

最近見fb宣傳一款焦糖果仁月餅，所以引起我注意，因而令我產生興趣。網上都參考過幾個食譜，但最後都係跟自己舊作（狀元核桃酥），左改右改，再臨場加減，終於比我做出一款啱自己嘅食譜啦！

由於自家製關係，所以好多嘢都可隨意改變，如材料，份量，調味（果仁、棗、油同糖等），隨意加加減減，自由配搭。目的只係想食得健康，希望媽咪會鍾意我嘅隨意啦！

講番呢款月餅，除左有自己鍾意嘅五款果仁外，仲加左椰棗。如果大家想了解多d椰棗，也可上網搜尋（椰棗介紹）。椰棗除左可以煮食，煲湯，小食外，其實仲可以節食減肥呢！好多印尼姐姐齋戒月，就係靠佢咋！

靜雞雞話你知，原來做五仁月一d都吾簡單，仲好麻煩添，因為單係切果仁，都切到手軟（頭都暈）呀！吾怪得出面賣得咁貴啦！真係粒粒皆辛苦呀（除非原粒免切）！朋友們，吾好意思（太可惜），你地冇機會試到啦！因為只得限量14個咋，嘻嘻。

＊因為材料全部都係熟，所以可以即時試甜味，如鍾意多d甜，可以加適量麥芽糖。而果仁粗粒／幼粒可跟個人愛，因我做比老人家食，所以會切得比較細(吾係碎)，但仍可保留粒粒口感。

脆皮鳳梨月餅 (2019新口味)

其實只係轉個造型，咁就可以將鳳梨酥變為月餅啦！雖然今次用嘅係50g月餅模，但其實只係做左33g咋，同鳳梨酥一樣份量，但就比正常月餅薄d，細細個，一人一個啱啱好。

眨吓眼，仲有一個月又到中秋啦！嚟緊呢段時間，要繼續諗吓有咩新嘗試啦！

紅麴脆皮奶黃月餅（2018新口味）

最後一爐啦！今次都係懶人版，總算為2018中秋劃上完美句號。

第一次做紅麴月餅皮，大家有冇覺得，顏色好似紅酒桃山皮呢？下次可以減少紅麴粉，因想試吓粉紅色囉。

今年試做過幾種粉，真係各有各靚，各有各特色。吾講你吾知（我估），原來吾同嘅粉，做出嚟嘅麵糰，都會有吾同質感。如南瓜粉同紫薯粉，麵糰係比較乾，包餡時容易裂開同散，所以要比Ｄ耐性嚟修整。而紅麴粉就比較濕，可能要加少少麵粉，否則會癡模爛皮。所以要靠自己隨機應變啦！