班蘭椰汁年糕2018

邊個話年糕冇新意？其實我覺得年糕可塑性不知幾高呀！今日就趁有一日假期，又試左款新口味年糕啦！我將班蘭汁混入糯米粉，就變出呢個中印crossover嘅『班蘭椰汁年糕』啦！

為左可以令大家更清楚明白古法搓年糕做法，所以特別搵左印尼姐姐友情客串（隻手），親手示範一次比大家睇啦！

因為今次用左熱糖水，所以只可用棒攪拌，如糖水放暖，就可以用手直接搓。不過有老人家教，話用熱糖水搓，糯米糰會變成半生熟，成品口感會加有彈性喎。俗語有話「不聽老人言，吃虧在眼前」，只要信不要問。哈哈。

補充：雪左兩日後，可以脫模啦！

幸運馬蹄糕 - 2018

年糕入面，我最愛就係馬蹄糕啦！所以無論過年或平日，我都會整嚟食架。而且仲要落勁多馬蹄，要啖啖都可以食到。雖然看似簡單，但其實都好睇自己控制同掌握，一煮over左就冇得救啦（太杰）！其實我都係一個正常人，所以一樣會犯同一錯誤，嗚嗚嗚。今日就由我示範一個反面教材，就係over左嘅效果啦！睇到嗎？糕面呀！吾滑漏囉。

今日本來係諗住做一底馬蹄糕縕習吓，點知姐姐擺烏龍（睇錯300g做1300g），所以仲買夠3斤馬蹄添（佢以為要刨完皮後有1300g）。不過我知嘅時候已經太遲了，因姐姐已刨晒全部馬蹄啦！冇計啦！怕吾留得，唯有煮晒佢。好彩屋企有兩盒新買馬蹄粉，吾係就弊傢伙啦！咁快又KO一盒馬蹄粉，聽日又要補倉啦！講真，我真係未試過玩咁大，500g馬蹄粉，3斤馬蹄，2包原蔗冰糖，工程實在太偉大啦！哈哈。

最後，成品一共做左10盒小（200ml）加3盒大（1000ml）呀！因為在飯後製作，所以廚房有d混亂，冇空間比我一邊影相一邊煮糕，如想睇詳細D，可以去 👉 馬蹄糕做法

(200ml)

(1000ml)

瑤柱臘味蘿蔔糕 - 2018

在『糕』瘋會未正式開始前，必須爭取時間嘗試新口味賀年糕，但同時亦須要溫故知新。今個星期功課特別多，先有古法紅糖年糕（舊瓶新酒），再有富貴黃金糕（新嘗試），最後就係蘿蔔糕（往年一樣）。

全家人口味不同，一人有一個夢想，搞到阿媽越嚟越惆悵。老公要食傳統年糕，阿仔要食芋頭糕，而阿女就要食蘿蔔糕，一家之煮真係吾易做呀！

邊個地位最高？睇吓我做咩糕就知啦！。。。其實係阿女為食指數最高咋！

前排我淘寶買左幾個7"土碗，目的就係為左用今日（裝賀年糕）。今日終於可以用到啦！賣相同我預期一樣咁吸引，連阿女見到都話 "咁搞笑嘅"。

富貴黃金糕（奶黃年糕） - 2018

又試玩新嘢啦！仲係第一次試做，第一次試食添。估吓係乜東東？就係咸蛋 + 椰汁 + 老冰糖 = 金莎椰汁奶黃年糕啦！

不過我嫌個名吾夠威，所以幫佢改左個名，仲要好意頭嘅名，『富貴黃金糕』啦！

因為姐姐放假，所以又係得我一條友搞咋，不過今次比上次攰，攪到手仔軟，可能夜晚至嚟做，冇晒精力，唯有慢手慢腳去完成啦！

雪過一晚後，估吾到竟然比想像中更易脫模。今次好貪心，一次做幾款模，有維尼小熊，Hello Kitty，仲有小花添（仲有D未脫），全部都會明天送出。

古法紅糖年糕 - 2018

最近淘寶買開雪蓮子，順便買埋老冰糖同古法紅糖。因香港買嘅雪蓮子都係雲南生產，所以我咪試吓淘寶雲南雪蓮子囉，應該都一樣啫，但價錢就平香港20%以上喎，如果好食就再encore。另外，見介紹嘅老冰糖同古法紅糖，好似都好好味，所以就買埋嚟試吓囉！其實價錢一d都吾平架，分分鐘仲貴過香港添，不過見佢標籤個“老”同“古法”字句，又講到天然煮製，所以就吸引左我買囉。

收到貨後，立即檢查吓，雪蓮子真係同香港差不多（食過如一樣可再買）。老冰糖就同香港黃冰糖分別不大，所以吾洗再買。至於古法紅糖，望落顏色比片糖深，但就比蔗片糖淺，聞落好有蔗香（平時嘅片糖聞落冇味），如果好食會再encore。

趁今日放假，有少少時候，即刻整番個古法紅糖年糕試吓啦！仲有，要講吓今次嘅糖水，好明顯比片／蔗糖混濁，而味道亦好明顯不同，食到有蔗汁味，而且糖水係冇雜質/渣（沉底），吾洗過濾，可以直接開粉用。

今次係我自己一手一腳由頭到尾做晒架，冇姐姐幫手，所以冇手影相囉！想睇製作過程？就快D去片睇👉古法年糕做法

雪左兩日，非常容易脫模。

（矽膠模，無須掃油）

鴛鴦（伯爵茶／咖啡）慕士蛋糕

今日係我『珍珠婚』結婚30週年紀念日，所以特登請左一日假嚟準備呢個蛋糕。近幾年，我都會預備一個自家製愛心蛋糕，今年都吾例外。我想做一個新口味，又要冇重複，都要動下腦筋架！

最後，我諗到做一個伯爵茶慕士蛋糕，用埋伯戚茶蛋糕做夾心，成件事就好伯爵啦！點知中途出事，就係慕士份量同業職表現一樣.....吾夠數！哈哈。因為今次用左新模，所以份量都係估估吓，結果.....OMG！吾緊要，好彩屋企仲有忌廉淨，仲有牛奶同咖啡粉，呢個配搭就夠我做一份咖啡慕士啦！總算有驚冇險。

原先嘅伯爵茶慕士蛋糕，就變為鴛鴦慕士蛋糕啦！嘻嘻。鴛鴦我就飲過，但鴛鴦蛋糕就真係第一次啦！咁今次一定吾會重複啦！其實蝦碌經常會出現，只要靈活變通，就冇有怕啦！哈哈哈哈（自我安慰）。