又試玩新嘢啦！仲係第一次試做，第一次試食添。估吓係乜東東？就係咸蛋 + 椰汁 + 老冰糖 = 金莎椰汁奶黃年糕啦！
不過我嫌個名吾夠威，所以幫佢改左個名，仲要好意頭嘅名，『富貴黃金糕』啦！
因為姐姐放假，所以又係得我一條友搞咋，不過今次比上次攰，攪到手仔軟，可能夜晚至嚟做，冇晒精力，唯有慢手慢腳去完成啦！
雪過一晚後，估吾到竟然比想像中更易脫模。今次好貪心，一次做幾款模，有維尼小熊，Hello Kitty，仲有小花添（仲有D未脫），全部都會明天送出。
用左另一款嘅矽膠模，效果竟然完全吾同，我估大家都感覺到。
糯米粉 530g
澄麵 40g
沾米粉 30g
吉士粉 45g
椰汁 400g
清水 350g
老冰糖 450g
鹽 1/8茶匙
生油 1湯匙
咸蛋黃 4個
米酒 1湯匙
做法：
- 咸蛋黃洗淨表面黏液，滾上米酒，然後放上已鋪錫紙焗盤，放入已預熱150度焗爐，焗8分鐘。
- 出爐後，用叉將咸蛋黃壓碎，用篩隔一次備用。
- 老冰糖加水，中細火煮溶，最後加入生油拌勻，放暖備用。
- 糯米粉，澄麵，粘米粉，吉士粉及鹽混合，加入椰漿拌勻。
- 倒入1/3糖水拌勻，然後再逐少加入糖水，攪拌至光滑麵糰。
- 然後再逐少加入糖水，拌成粉漿，最後加入蛋黃拌勻。
- 將粉漿過濾2次至幼滑，然後倒入糕模至8/9成滿。
- 大火隔水蒸60-75分鐘或至熟
- 出爐後放涼，蓋好存入雪櫃儲存。
- 食前取出切件，蘸蛋漿煎至金黃即可享用。
貼士：
- 年糕須雪凍才可容易脫模，如非矽膠模具，須先掃油。
- 可以放一對筷子在模面（左右兩邊分開放），面放一隻碟或錫紙（大過模，遮倒汗水）。記住錫紙不可密封糕模，因為會令糕面周邊變乾。
準備送出
