腰果奶露

第一次煮腰果露，估吾到又幾好味喎（比想像中好）。以前一直都覺得腰果味淡，如做糖水驚吾夠香濃，所以一直都只係煮芝麻糊或合桃露。試過今次後，以後又多樣選擇啦！

今次用嘅係印度腰果，冇過濾過，所以會食到微細腰果粒，如果介意的話，亦可以用篩過濾隔渣一次先煲。

椰汁紫薯糕

今日試玩新嘢，用左紫薯配馬蹄粉，估吾到效果又幾夾喎，味道仲吾錯添。

點解我會咁樣試？係因為之前睇 "香港原味道" 有介紹，所以一直記住，直到今日突然心血來潮，咁咪即刻買料試吓囉。雖然片中並無講份量，但應該吾會難到我掛。

伯爵茶奶凍（無火煮食）

伯爵茶甜品係阿女至愛，所以無論我做乜，只要加左佢（伯爵茶），阿女就實捧場。

其實旱幾日已整過一次，因為用左模，竟然脫吾到，搞到樣衰衰，所以冇post到。今日再嚟一次，用番個樽裝，咁就冇問題啦！仲做左兩杯外賣請人食添。

呢個甜品好簡單，吾洗開火，只要用微波爐加熱就搞掂，認真快靚正。

紅糖薑汁紅棗千層糕

其實我本身就吾太喜好紅棗糕，但有粉絲就非常鍾意，仲想我教吓佢地整添。徇眾要求，就滿足吓你地啦！哈哈。

記得好耐之前，都曾經做過棗泥糕，但今次就有Ｄ吾同，因冇再壓棗蓉啦！今次算係簡易版，讓大家都可以做得舒服Ｄ。如果大家吾怕功夫多，或者鍾意勁紅棗味，亦可以參考番我嘅舊食譜「棗泥糕」。

今次做法相比簡單，只須要煲紅棗水，加糖加粉，就係咁簡單咋。另外，糖方面，可跟個人喜好，鍾意用咩糖都冇所謂（如：冰糖、片糖、黑糖、紅糖、棗糖等）。仲有，呢個做法，成品嘅賣相會比棗泥糕通透，感覺好似靚Ｄ。

*吾知大家睇吾睇到有5層呢？因太細個模，做吾到9層咁多呀！😅

貓爪大菜糕

最近真係好懶，完全冇心情／動力去整嘢食，如果吾係為左個模，應該都吾會肯郁呀！

橫掂都整開啦，就整夠三隻色啦！其實事前我都冇諗過要做色架，只係煮溶大菜後，想搵d嘢玩吓。咁咪隨意抓吓，見屋企有咩咪加咩囉。哈哈。

嘩！期待嘅畫面出嚟啦！真係好靚呀！

（白色＋花奶／紅色＋紅桑子粉／綠色＋綠茶粉）

材料：

大菜絲　10g

水　　　600g (偏實) 900g (偏淋)

蔗冰糖　90g (900g水 : 130g糖)

做法：

1. 大菜絲，糖，水同煮溶。（如喜歡其他味道，可加果粉或茶粉，亦可加椰汁代替部份水，也可改用其他糖。）
2. 倒入模具，放入雪櫃雪至凝固即可食用。

香草墨汁法式麵包

原來（我）已經有兩個月冇整麵包啦！為左消滅屋企包墨魚汁，但又吾夠整意粉，咁就唯有整麵包囉。今次我混入左法包粉同粿麥粉，令口感比較實在。如食時搽少少鹽味牛油，味道會更好。

拉爺糕

第一次用自家種班蘭葉（媽咪朋友送），其實味道同印尼鋪買嘅冇分別，只係外型窄D短D，味道淡D（要用雙倍份量），同埋成品顏色暗沉D啫。

今次嘅拉爺糕，因為吾夠材料，所以只夠做一隻顏色，冇得間色啦（其實懶就真）！大家覺吾覺（其實好明顥）D糕一點點呢（葉渣）？吾知係咪打得吾夠爛？又或者隔得吾夠幼細？不過吾緊要啦！最緊要好食啫！哈哈。