南瓜脆皮奶黃月餅

距離終點不遠了，完成今晚呢round後，再做埋聽晚最後一round，就可以收爐啦！今年任務總算順利。。。接近完成，哈哈。

吾知大家有冇發現，我今年嘅產量比往年少呢？因我已學習慢活，盡量不比壓力自己，不強迫自己，想做就做，想懶就懶，感覺真係輕鬆舒服好多，嘻嘻。

今晚我又偷懶，做左懶人版嘅奶黃月餅。實在太容易啦！真係超輕鬆。事關吾洗睇火，吾洗高溫，仲吾洗掃蛋／掃糖水添。

不過，重點係。。。成功率極高，連第一次跟我學做嘅粉絲們都冇失手呢！

脆皮金莎奶黃月餅（實驗版）

今年第一批正式送出嘅月餅，除左指定動作獨立（密封）包裝外，更係首次加入脫氧劑（放餅托底），因為希望保持月餅新鮮，而且可以延長食用期。

另外，今次食譜我也改左少少，將餅皮同奶黃餡比例，由以往的1比1，變成3（皮）比2（餡）。做法雖然與平時一樣，但效果卻明顯有異樣。

首先，響第一次出爐時（6分鐘後），已見到有象腳跡象，到完成出爐後，象腳問題更加嚴重。

所以，今次就當係反面教材啦！無須再寫食譜啦！如大家想做奶黃月餅，就跟番上次嘅食譜啦！哈哈。

低溫慢煮叉燒

今次終於試左訂豬肉（梅頭），咁大個人都係第一次訂豬肉咋，好彩冇比豬肉佬呃我啫（比次貨我）。

是咁的，由於我每次去到豬肉檔，梅頭總會是賣晒，所以豬肉佬就叫我下次訂定，吾洗白走一趟。所以，星期五睇完醫生，就順路即管去試吓訂貨。今次同豬肉檔訂左2-3斤梅頭，明天取貨，而且係取貨時才付款，因未知實際重量。

試過今次後，下次想整叉燒，吾洗驚買吾到靚梅頭啦！只要早一日訂定就得啦！真係超方便呀！不過最重要都係搵間有信譽嘅豬肉檔。

焦糖金粟紫薯月餅（2018新口味）- 廣式餅皮

舊年第一次自家製轉化糖漿，真係一試難忘，因為市面上買到嘅，絕對無法媲美。所以如果冇一手準備（自製糖漿），我絕對，絕對，絕對（講3次，因為好肯定）吾會整廣式月餅。

一個月前，我已準備轉化糖漿啦！因為諗住今年試做廣式月餅。餡料方面，我當然要自家製啦！不過做咩味道好呢？蓮蓉？咪搞，我怕怕啦（會手殘）！紅豆？芋泥？。。。。。

最後，我終於揀左紫薯。不過，我又點會咁簡單呢！今次我又試左新配搭「紫薯拼焦糖栗子」，係咪聽個名都已經覺得好味呢（我女係）？哈哈。

*食後感：阿仔即晚已食左一個（我瞓前發現少一個），因佢吾知要等回油，哈哈。於是我問佢評語，佢答：餅皮吾硬喎，個皮有老嘅味道！栗子質感與紫薯不夾（因原粒），應該切碎會夾d。結論：如果吾好食，佢應該即時出聲，吾會等我發現問佢至comment。

待三日回油後，食得啦！

紫薯餡

無論製作中式酥點、月餅、糯米糍、蛋糕、麵包或饅頭，呢個餡都一樣咁啱用架。

材料：（約500g）

紫心蕃薯　　450g（淨肉）

糖粉　　　　1湯匙

麥芽糖　　　2-3湯匙（試味）

無鹽牛油　　20g

淡忌廉　　　20g

做法：

1. 紫薯洗淨刨皮切片，大火隔水蒸淋。完成後，立即將紫薯壓蓉。
2. 將紫薯蓉、糖、牛油、淡忌廉及麥芽糖同放入易潔鍋中內，開中火炒勻至杰身。
3. 完成後，放入保鮮盒，餡面緊貼上保鮮紙（避免風乾），待冷卻後放入雪櫃雪一晚以上。

土鳳梨酥（吉士粉）

有時見到靚菠蘿，但又吾知幾時先用到，吾緊要，照買。因為可以買定，然後做定.....鳳梨餡。只要將煮好嘅鳳梨餡，密封好（包好），然後存放冰格（可keep半年），咁就可以隨時隨地，拿起手都用到啦！

最近忙住煮奶黃，掛住做月餅，搞到冇時間做鳳梨酥，但又吾想鳳梨餡擺咁耐，所以今日終於忍吾住要出手啦！

試過幾款餅皮味道鳳梨酥，我覺得呢個同芝士粉果個都比加杏仁粉好味，大家不防試吓比較吓，睇吓同我口味係咪一樣。

極黑朱古力脆皮奶黃月餅（2018新口味）

乜嘢叫即叫即蒸？今日我真係好好體會到啦！

乜嘢叫囡奴？我咪係人版囉！好彩屋企有奶黃餡（吾係次次咁好彩），下次可吾可以早響呢？！等我有心理準備，可以多d時間準備呢！

介紹番，我今次用左隻新材料，以前從未見/聽/食/用過架，原來逐漸變黑又得，立即變黑都得，得左。

第一次試呢隻「極黑可可粉」，黑嘅程度，吾洗我多講，大家都睇到啦！如果第時想做黑色效果，吾洗再用竹炭粉啦！

再介紹埋味道啦！製作前-聞落吾香（有D難聞）、制作中-混入麵糰後，出奇地又好香喎（點解嘅）、成品-食落就好似Oreo（吾怪得Oreo咁黑）。

可能有好多朋友見到黑媽媽都會有D抗拒，仲會有D驚添。不過我就冇比顏色嚇親，反而覺得幾特別幾吸引。