焦糖金粟紫薯月餅（2018新口味）- 廣式餅皮

舊年第一次自家製轉化糖漿，真係一試難忘，因為市面上買到嘅，絕對無法媲美。所以如果冇一手準備（自製糖漿），我絕對，絕對，絕對（講3次，因為好肯定）吾會整廣式月餅。

一個月前，我已準備轉化糖漿啦！因為諗住今年試做廣式月餅。餡料方面，我當然要自家製啦！不過做咩味道好呢？蓮蓉？咪搞，我怕怕啦（會手殘）！紅豆？芋泥？。。。。。

最後，我終於揀左紫薯。不過，我又點會咁簡單呢！今次我又試左新配搭「紫薯拼焦糖栗子」，係咪聽個名都已經覺得好味呢（我女係）？哈哈。

*食後感：阿仔即晚已食左一個（我瞓前發現少一個），因佢吾知要等回油，哈哈。於是我問佢評語，佢答：餅皮吾硬喎，個皮有老嘅味道！栗子質感與紫薯不夾（因原粒），應該切碎會夾d。結論：如果吾好食，佢應該即時出聲，吾會等我發現問佢至comment。

待三日回油後，食得啦！

材料：（12 x 50g）

＜焦糖栗子＞

栗子　　　　8粒
砂糖　　　　20g

1. 栗子去殼去衣，烚淋備用。
2. 將砂糖放入小鍋，中火煮溶（不可攪拌），轉細火煮金黃色焦糖漿（不可攪拌），倒入栗子拌勻，要每粒栗子黏滿焦糖漿即可。
3. 放入保鮮盒，待冷卻後放入雪櫃雪1小時以上。

＜紫薯餡＞

做法按此        420g

紫薯分割30g/粒，滾圓。

紫薯用指頭按入凹洞，放入半粒栗子（5g）。

包好，收口向下。

貼上保鮮紙，放雪櫃雪一小時以上。

＜餅皮＞

低筋粉　　　105g

轉化糖漿　　60g（做法按此）

花生油　　　20g

鹼水　　　　1/3茶匙

其他：

蛋黃　　　　1個

高粉　　　　適量
糖水　　　　砂糖10g + 熱水10g

做法：

1. 將油、糖漿及鹼水放入盤攪勻，直至完全混合（約3分鐘）。
2. 加入已篩低筋粉，拌勻成糰，用保鮮紙蓋上，靜止4小時。　
3. 將麵糰搓光滑，然後分割12粒（15g），滾圓備用。
4. 將餅皮隔著保鮮紙按平，再用棍碌薄，包入餡，收口向下。
5. 將餅皮表面及餅模內掃上手粉（多餘掃走／凳出）
6. 將月餅放入模（收口向外），檯面灑上少許手粉，放上餅模，然後垂直按壓。
7. 餅模放上已鋪牛油紙焗盤上，然後脫模，將整盤月餅放入雪櫃雪半小時以上。
8. 取出，在餅面噴少許水，然後放入已預熱180度焗爐，焗6分鐘。
9. 取出，掃上蛋液（只掃凸起部份），放回焗爐160度焗6分鐘至淺啡色。
10. 取出，再掃一次蛋液（只掃凸起部份），放回焗爐150度焗6-8分鐘至深啡色。
11. 出爐後即掃上薄薄糖水（餅面），待完全放涼後，存入保鮮盒置陰涼處，待3日回油後才可享用。

糖漿、花生油、鹼水

完全混合

加入已篩低筋粉，搓成糰。

用保鮮紙蓋好，靜止4小時。

餅皮分割13g/粒

隔著保鮮紙按平，再用棍碌薄。