水蜜桃慕士蛋糕

最近日本和歌山水蜜桃又做團購啦！即代表水蜜桃當造啦！不過我d水蜜桃並吾係團購，而係朋友送嘅。水蜜桃真係好好味，又香又甜又多汁，所以用左1個嚟試做蛋糕。

但裝飾就冇用到水蜜桃啦！因要留番比阿仔吃，所以唯有用士多啤梨裝飾。呢盒士多啤梨好襟食，已經係第三度甜品啦！

柚子士多啤梨蒟蒻

屋企有包未開嘅蒟蒻粉，7月就到期，而咁啱屋企又有士多啤梨淨，再配搭柚子蜜做底味，就係咁，就做左呢個簡單嘅甜品【柚子士多啤梨蒟蒻】。

如果大家屋企冇柚子蜜，就可轉用水加糖，又或者果汁都得。

貼士：

蒟蒻粉同液體份量需自我調教，因吾同烘烤店買到嘅蒟蒻粉都會有不同比例。

士多啤梨忌廉蛋糕

前日行惠康見到長柄🍓$79，尋日再行見🍓特價$69，所以。。。忍吾住買左盒🍓。

由於上星期水波爐漏蒸氣，拎左返廠維修，搞到成個禮拜冇得焗蛋糕，又冇得蒸糕，今晚終於可以焗番蛋糕啦！

本來係想做條瑞士卷，不過最後都係改變主意，做左海綿蛋糕。再配上打起忌廉及士多啤梨粒，砌成呢款三層蛋糕。

迷你咸肉粽／三色豆粽

今日包粽日，包都包到洽眼瞓呀！事關我慢慢包，足足包左三個鐘😅。

今年冇包梘水粽，亦冇包燒肉粽，只係包左35隻咸肉粽同15隻紅豆粽（冇肉冇蛋黃），總共包左50隻。

今年我再用智能煲幫手，因為真係好方便，又慳時間，最重要係效果好嗎！。用智能煲最吾好就係內膽吾夠大，吾可以一次搞掂。

我個智能煲係5公升，每次可煲到15隻粽（每次30分鐘），所以一共煲左四轉，加加埋埋總共煲左兩個鐘。

如果用明火嘅話，就要開齊兩個爐頭，烚三個鐘。明火除左煤氣費貴之外，仲要睇火，又要中途加水，廚房仲會好熱添。最最最麻煩係，阻住姐姐煮飯呀囉！哈哈。

我最鍾意包迷你粽，細細隻又得意，食晒一隻都吾會漏，仲吾怕肥添。

豆沙鍋餅

呢個呢！真係冇諗過會自己做，一款只會出街食嘅甜品【豆沙鍋餅】。

事關上星期做完草莓大福，仲有半份紅豆餡淨，為左要盡快清晒佢，忽然想起呢個甜品，於是咪做吓囉！

其實材料好簡單，只需3樣野，而3樣野我都有齊，咁咪做到呢個平時吾會周街食到，只在上海飯店食到嘅甜品囉。不過我有少少偷懶，因為我只係半煎炸，所以表皮吾夠脆，但自家製算係咁啦！冇緊要掛。其實咁咪食得更健康，少油嗎！仲冇咁肥膩添。

五香咸蛋（續集）

今日終於到左收成嘅大日子，話說15/4果日浸左樽咸蛋，而今日係14/5，剛剛好一個月啦！心情既緊張又興奮，吾知成吾成功呢？！雖然話零失敗啫，但我都驚會破紀錄，成為零的突破。哈哈。

迷底終於可以打開，係。。係。。係大成功啊！我終於相信零失敗的預言啦！嘻嘻。

鴨蛋用五香鹽水浸左一個月，蛋殼都黏滿了一層薄薄的青苔般面層（滑滑地黏黏地）。需要用百潔布才可以將佢刷甩，最後又回復番白淨啦！至於樽五香鹽水，就變得深色同混濁。將蛋洗乾淨後，仲要抹乾，然後放入雪櫃保存。

我再為大家介紹一下，蛋黃橙紅亮麗，實的的。而蛋白晶瑩通透（忘記影相），不混濁。至於味道，就同街買到嘅冇分別，只係冇街買咁咸。

今晚我就即興用左4隻蛋黃嚟煮黃金蝦啦（蛋白冇要）！淨低嘅都會留番嚟包咸肉粽，下個禮拜見。

口袋包／印度烤餅

今晚煮咖喱，又點可以少得你呢『印度烤餅』！其實可以焗都得，一次焗兩盤，比煎會快趣好多。但我都係鍾意煎，點解？因為我覺得冇焗咁乾，就算一旱煎好，放幾個鐘都好，一樣保持軟熟，吾乾吾硬，好正架。

今日好成功，每個都可以脹得起，真係睇見都開心。哈哈！

草莓大福

嘩！勁大粒呀！一粒起碼過百幾克重，食半粒已好飽肚啦！用自家製紅豆蓉，配日本士多啤梨，真係非常夾，不但清香，不太甜，又不會漏，正！

今次係我有史以來第二次做草莓大福，上一次都吾記得係幾時啦！

紅豆豆腐芝士杯

明晚需要準備兩款飯後甜品，兩款甜品我都會以紅豆做主題，事關我做左一大盒紅豆蓉囉！嘻嘻。

首先，今晚做定一款甜品『紅豆豆腐芝士杯』先，而第二款，因要新鮮做，新鮮食關係，所以要等聽日下晝先做得。等我賣個關子先，聽日至開估。大家估吓我會做乜東東呢！？

缽仔糕（改良版）

襯今日放假，整定個紅豆餡，等嚟緊星期六日假期，可以做紅豆大福同其他紅豆甜品。

因姐姐烚多左紅豆，所以就唯有用佢嚟整缽仔糕，順便又可以試埋個新模添。

今次食譜加入左木薯粉，口感似足街買到果Ｄ。

玫瑰蘋果批

雖然呢款蘋果批並吾係d咩新鮮野，最近連肥媽都做嚟，但對我嚟講就真係好新鮮，因為係我第一次，而且仲係第一次做蘋果批呀！

因為我自己吾太好蘋果批，因始終吾太接受生果做熱食，感覺有點怪。但吾知點解阿女又會咁鍾意，其實我都冇同佢去食過。

今日最後一日假期，見屋企有酥皮，有蘋果，又有齊材料，所以就試吓整比佢食囉。

玫瑰花造型，又確係幾靚嘅。

雜果仁朱古力餅

都吾知幫佢改個咩名好呢！唯有跟材料照改一個啦（材料有杏仁，榛子，合桃，消化餅，黑朱古力）！其實呢個應該算朱古力？定係餅？其實都冇所謂啦！最緊要好食就得啦！

呢個做法其實好簡單，不單止步驟少，而且仲免焗添，不過材料費就貴ＤＤ囉！嘻嘻。