話說阿女話想星期四整檸檬乳酪芝士蛋糕，我見噚晚個個都吾返嚟食飯，個廚房比較清閒，咁我咪早一日整定先囉，應該都擺得嘅，多一日啫。
點知今朝收到阿女whatsapp，佢話其實係佢想整蛋糕，吾係想我整蛋糕，唉！擺左烏龍添。算啦！佢吾要咪我自己派囉街坊囉，哈哈哈。
因為買吾到檸檬乳酪，所以就買左藍莓乳酪，其實鍾意咩乳酪咪用咩乳酪囉，冇所謂，最緊要自己啱食。
重點係我鍾意食乳酪多過酸忌廉，而且感覺好似又健康D（其實芝士蛋糕都係肥），原來乳酪配芝士蛋糕又幾夾喎。
今次做左8"模份量，估吾到竟然做到8個細模。
1) 蛋糕模（8"）：（如用錫紙模，可刪減此部分）
無鹽牛油液 2茶匙
杏仁粉 1湯匙
- 蛋糕模內圈掃上牛油，然後沾上杏仁粉。
2) 餅底：
消化餅 130g
無鹽牛油液 40g
- 消化餅打碎，加入牛油拌勻，然後倒入蛋糕模內壓平，放入雪櫃備用。
3) 芝士餡：
忌廉芝士 500g
糖粉 85g
檸檬皮茸 1個（細）
雞蛋 3隻
無鹽牛油液 50g
- 忌廉芝士加糖中速打至軟滑，約2-3分鐘。
- 蛋分3次加入芝士餡內，用中速打至軟滑，每次打約30秒左右（不宜太久）。
- 最後加入牛油打勻
- 將芝士糊倒入模（餅面），160度焗60分鐘或金黃即可（最後10分鐘可180度焗10分鐘）。
4) 餅面裝飾：
藍莓乳酪 100g
- 蛋糕放涼後，淋上蛋糕面（中間），放入雪櫃4小時以上即可享用。
