冰糖陳皮檸檬膏

我又嚟燉檸檬啦！上次燉嘅又飲晒啦！不過其實今次仲有令一個目的，就係燉嚟送禮呀！因為我細妹想飲，而佢又會嚟緊個星期日（29/7）返香港（趁D女放暑假），所以我要準備定啦！話說細妹舊年已講定，今年會返香港，仲話到時要試我嘅燉檸檬，所以一早我已買定真空玻璃樽同包裝，今日終於可以用到啦！雖然只係做比屋企人，但我都要做得好好睇睇，吾好失禮。

今次燉法同以往有少少吾同，我在燉到10個鐘時，用攪拌棒（直接放入燉盅）將全部材料打爛，然後再繼續燉多3個鐘，之後工序就同以往一樣，如入樽，倒轉，放涼等。

而製成品經雪過後（自己食果d），可以見到同平時嘅好大分別，係杰身好多，好似醬／膏咁樣。顏色方面，會比較實，不通透。而味道亦有分別，比以前較濃厚。最重要，係啱阿妹飲，因佢吾愛食渣，依家可以連渣都飲埋，咁就吾怕蹝嘢啦！

另外，仲有兩樽迷你版，係送比朋友㗎。

材料：（6x250m 玻璃瓶）

老陳皮　　　　40g

新奇士檸檬　　1000g（10個）｛去兩端／白芯／核後｝

碎冰糖　　　　1300kg

其他：

食用梳打粉　　2茶匙

清水　　　　　適量

粗鹽　　　　　適量

已消毒玻璃瓶　6 x 250ml

做法：

1. 清水加梳打粉拌溶，放入檸檬浸泡30分鐘（水要蓋過檸檬）。
2. 檸檬清洗乾淨，用粗鹽抹擦吓表面，再用清水過清。
3. 用廚紙抹乾檸檬水份，放上烤架風乾一晚（面蓋上廚紙）。
4. 陳皮浸軟，用刀仔刮乾淨果囊，然後清洗乾淨，用廚紙抹乾水份，放烤架風乾一晚（面蓋上廚紙）。
5. 第二日，將檸檬兩端切走，然後切開一半，取走中間白芯。
6. 將檸檬切片／粒及去核，陳皮切絲／碎。
7. 將檸檬，陳皮，冰糖順次序放入燉盅內，然後隔水燉12-13小時（中途可拌勻一兩次）。＊我中途用攪拌棒將材料打爛＊
8. 完成後趁熱注入已消毒玻璃瓶內，蓋好立即將瓶反轉（製造真空狀態）， 當整瓶完全冷卻後，可反正及儲存陰涼位置（乾爽陰涼）。

請按＞詳細步驟