煨蕃薯

今日去超市買左兩袋日本蕃薯，$45／2袋，1袋紫心蕃薯有兩條，黃心蕃薯有4粒。計吓數，原來1條紫心要成$11呀！其實都幾貴，所以今日食一半好啦！留番一半聽日食。本來諗住烚嚟食，但最後竟然轉左煨，哈哈。

對上一次煨蕃薯，究竟係幾時呢？我諗都有5年啦！我仲記得上次煨嘅係印尼蜜糖蕃薯，甜到不得了，我就吾太鍾意，但老公就超like，嘻嘻。

出街買一舊煨蕃薯，起碼要廿蚊，自己焗真係平好多。雖然焗爐焗爭左炭燒味，但都已經好吾錯啦！

黃肉煨到離晒皮，個心吾知點解會白白地，但其實係熟。

紫肉同黃肉都好甜（濃味），但質感卻吾一樣，我比較鍾意紫肉。

日式焙茶芝士蛋糕

月餅節過左，一切又回復正常啦！今日趁住十一國慶，就做個蛋糕慶祝吓啦！

呢個蛋糕除左可以做原味，其實仲可以做抹茶味（抹茶粉），咖啡味（咖啡粉），朱古力味（可可粉），芝麻味（點芝麻粉）等。

大家估吓今日我做左咩味？就係焙茶味呀！不過大家吾好問我邊度買喎（焙茶粉），因為我都吾知，因為係朋友日本手信嚟架，哈哈！

做法按此

＊其他味道，只須減低筋粉4-6茶匙，然後加入其他粉（如：抹茶粉、咖啡粉等）代替。

紅麴脆皮奶黃月餅（2018新口味）

最後一爐啦！今次都係懶人版，總算為2018中秋劃上完美句號。

第一次做紅麴月餅皮，大家有冇覺得，顏色好似紅酒桃山皮呢？下次可以減少紅麴粉，因想試吓粉紅色囉。

今年試做過幾種粉，真係各有各靚，各有各特色。吾講你吾知（我估），原來吾同嘅粉，做出嚟嘅麵糰，都會有吾同質感。如南瓜粉同紫薯粉，麵糰係比較乾，包餡時容易裂開同散，所以要比Ｄ耐性嚟修整。而紅麴粉就比較濕，可能要加少少麵粉，否則會癡模爛皮。所以要靠自己隨機應變啦！

南瓜脆皮奶黃月餅

距離終點不遠了，完成今晚呢round後，再做埋聽晚最後一round，就可以收爐啦！今年任務總算順利。。。接近完成，哈哈。

吾知大家有冇發現，我今年嘅產量比往年少呢？因我已學習慢活，盡量不比壓力自己，不強迫自己，想做就做，想懶就懶，感覺真係輕鬆舒服好多，嘻嘻。

今晚我又偷懶，做左懶人版嘅奶黃月餅。實在太容易啦！真係超輕鬆。事關吾洗睇火，吾洗高溫，仲吾洗掃蛋／掃糖水添。

不過，重點係。。。成功率極高，連第一次跟我學做嘅粉絲們都冇失手呢！

脆皮金莎奶黃月餅（實驗版）

今年第一批正式送出嘅月餅，除左指定動作獨立（密封）包裝外，更係首次加入脫氧劑（放餅托底），因為希望保持月餅新鮮，而且可以延長食用期。

另外，今次食譜我也改左少少，將餅皮同奶黃餡比例，由以往的1比1，變成3（皮）比2（餡）。做法雖然與平時一樣，但效果卻明顯有異樣。

首先，響第一次出爐時（6分鐘後），已見到有象腳跡象，到完成出爐後，象腳問題更加嚴重。

所以，今次就當係反面教材啦！無須再寫食譜啦！如大家想做奶黃月餅，就跟番上次嘅食譜啦！哈哈。

低溫慢煮叉燒

今次終於試左訂豬肉（梅頭），咁大個人都係第一次訂豬肉咋，好彩冇比豬肉佬呃我啫（比次貨我）。

是咁的，由於我每次去到豬肉檔，梅頭總會是賣晒，所以豬肉佬就叫我下次訂定，吾洗白走一趟。所以，星期五睇完醫生，就順路即管去試吓訂貨。今次同豬肉檔訂左2-3斤梅頭，明天取貨，而且係取貨時才付款，因未知實際重量。

試過今次後，下次想整叉燒，吾洗驚買吾到靚梅頭啦！只要早一日訂定就得啦！真係超方便呀！不過最重要都係搵間有信譽嘅豬肉檔。

焦糖金粟紫薯月餅（2018新口味）- 廣式餅皮

舊年第一次自家製轉化糖漿，真係一試難忘，因為市面上買到嘅，絕對無法媲美。所以如果冇一手準備（自製糖漿），我絕對，絕對，絕對（講3次，因為好肯定）吾會整廣式月餅。

一個月前，我已準備轉化糖漿啦！因為諗住今年試做廣式月餅。餡料方面，我當然要自家製啦！不過做咩味道好呢？蓮蓉？咪搞，我怕怕啦（會手殘）！紅豆？芋泥？。。。。。

最後，我終於揀左紫薯。不過，我又點會咁簡單呢！今次我又試左新配搭「紫薯拼焦糖栗子」，係咪聽個名都已經覺得好味呢（我女係）？哈哈。

*食後感：阿仔即晚已食左一個（我瞓前發現少一個），因佢吾知要等回油，哈哈。於是我問佢評語，佢答：餅皮吾硬喎，個皮有老嘅味道！栗子質感與紫薯不夾（因原粒），應該切碎會夾d。結論：如果吾好食，佢應該即時出聲，吾會等我發現問佢至comment。

待三日回油後，食得啦！