椰皇鮮奶燉蛋白

記得第一次整呢個甜品，已經係4年前嘅事啦！因為當時係為左試水波爐，估吾到一隔就隔左4年啦！

由於當時仲未成立網誌(blog)，所以連食譜都未出過。襯住今晚重溫，我就順便寫番個食譜記綠低啦！

點解無端端我會做呢個甜品呢？是咁的，因為尋日下晝，阿女突然whatsapp我，話想食椰皇燉蛋白，咁媽媽我就話不如買椰青水燉算啦！點知阿女回覆我，其實呢個甜品"椰皇"先係重點呀！哈哈(咁又係)。所以今日放工買齊材料，返到屋企立即行動。

有圖有真相，4年前嘅作品。找錯處。。。。。椰皇倒轉左開，所以好難開，哈哈。

伯爵茶奶凍

之前都講過，阿女係伯爵茶控，所以伯爵茶甜品又點少得呢！吾想成日都係伯爵茶蛋糕，今次就轉吓食法啦！

材料簡單，做法簡單，連火都吾洗開，最啱想懶又想食甜品嘅你（包括我）。講過秘密你知啦！其實伯爵茶我只會用嚟做甜品，吾會用嚟飲架。想起以前，我直頭連甜品都吾會試添。

因為屋企盒牛奶今日到期，所以要諗辦法用晒佢，吾要做大嘥鬼。

芋圓

首先，我個人就吾好芋圓嘅，因為覺得佢只係一舊冇味嘅粉糰，其實有咩好食啫，所以記憶中，只係做過一次，而且仲係食吾多過三次。

咁點解今日我又會做呢？咪全因阿女囉，尋晚兩母女對話如下：

女：不如你試吓做芋圓呀！

媽：不如你自己做啦！好易之嗎！

女：都好喎，好似好好玩。

媽：咁聽日買材料比你做啦！

女：好呀！我想做芋頭（淡紫灰色）同蕃薯（橙黃色），仲可以做埋紫蕃（深紫色）。

媽：做住兩樣先啦！好食嘅下次再做三樣啦！

就係咁，今晚有芋圓食啦！不過.....結果.....最後.....咪又係阿媽（我）做。

估吾到今次嘅芋圓竟然有驚喜，佢嘅質地同味道都吾錯，QQ地，煙煙un un，下次可以繼續。

＊一連兩晚試齊熱同凍，我自己個人就比較鍾意熱多D啦！

凍食（仙草芋圓）

熱食（加薑茶）

迷你三色豆素糭

呢款糭主要係為媽媽已包，感覺好有意義。

雖然街可能有得賣，但未必係呢三種豆，就算有都肯定冇咁多料啦！不過我都會循例問吓媽媽，今年仲食吾食呀？想要幾多隻呀？答案當然係食啦！

除左媽媽鍾意食豆糭外，工人姐姐都好鍾意架（因冇得揀，鬼叫佢吾食豬咩！哈哈）。

瑤柱咸肉糭

一年一度大工程，今日正式開鑼啦！今年除左主打咸肉糭，三色豆素糭外，仲加多款瑤柱咸肉糭呀！

是咁的，因為舊年食過朋友媽媽包嘅瑤柱咸肉糭，覺得都幾夾，幾好味，所以今年自己都試吓包囉。不過我包得比較細隻，所以每隻糭只加半粒瑤柱，如大家包五角糭的話，就可以比原粒啦！除左瑤柱，仲可以包小鮑魚，亦可以加冬菇，栗子添。

低溫慢烤叉燒

因為我有儲備梅頭習慣（當遇到靚梅頭時，一定會買左先講），所以今晚吾洗食貴豬啦！其實想食叉燒又有幾難，只係預早買定，預早雪定，然後預早解凍，預早醃定，咁就有得食啦！係咪吾難呢（講就易囉，食果個，嘻嘻）？

其實咁焗法都吾係（我）第一次，只係blog度冇出現過啫（當時未成立）。記得果次買梅頭做叉燒，以為第一刀就係正（最好），點知.....味道係OK嘅，但肉質同口感就.....有D強差人意囉。最慘仲要被屋企人彈三彈四，呢個話好嚡，果個又話乾，總之多多聲氣咁囉，唉！

不過我冇因為咁而放棄，反而繼續鑽研嘗試不同方法，雖然效果始終未如人意（屋企人要求太高）。直到有日，突然醒覺，了解到肉嘅紋路，終於.....皇天不負有心人，比我學識到點揀啱嘅肉啦！仲要配合埋啱嘅切法喎。就係咁，從此開始了我嘅「叉燒」歷程啦！

今日其實冇諗過會出post，所以冇影到相，不過食完後，竟然好有驚喜，覺得有必要記綠在案（重做）。

＊＊只影到一張食淨幾舊嘅相咋，哈哈！

頂角吐司

因為買左個吐司模，所以試吓學人整吐司，好彩都吾太差啫，嘻嘻。

第一次學人做吐司，所以感覺似做實驗，一步一步考驗，一步一步過關，講真，真係有少少緊張，仲有少少期待，哈哈。

因為話晒第一次，所以吾敢跟足份量，驚爆瀉呀！由於只係估估吓，所以先試做300g粉。開蓋果一刻，噢！爭少少添！吾夠頂角呀！吾緊要啦！其實都吾錯啦！下次我識做啦！要做320g粉，就應該可以頂角。

＊以下食譜已更正320g粉
＊本食譜以Panasonic麵包機製作麵糰及一發（可用手搓或廚師機製作麵糰，及室溫發酵，須注意時間及溫度。）
＊本食譜以東芝水波爐二發及烤焗（可室溫發酵及使用焗爐，須注意時間及溫度。）