芋圓

首先，我個人就吾好芋圓嘅，因為覺得佢只係一舊冇味嘅粉糰，其實有咩好食啫，所以記憶中，只係做過一次，而且仲係食吾多過三次。

咁點解今日我又會做呢？咪全因阿女囉，尋晚兩母女對話如下：

女：不如你試吓做芋圓呀！

媽：不如你自己做啦！好易之嗎！

女：都好喎，好似好好玩。

媽：咁聽日買材料比你做啦！

女：好呀！我想做芋頭（淡紫灰色）同蕃薯（橙黃色），仲可以做埋紫蕃（深紫色）。

媽：做住兩樣先啦！好食嘅下次再做三樣啦！

就係咁，今晚有芋圓食啦！不過.....結果.....最後.....咪又係阿媽（我）做。

估吾到今次嘅芋圓竟然有驚喜，佢嘅質地同味道都吾錯，QQ地，煙煙un un，下次可以繼續。

＊一連兩晚試齊熱同凍，我自己個人就比較鍾意熱多D啦！

凍食（仙草芋圓）

熱食（加薑茶）

材料：
芋頭肉 100g（100%） / 木薯粉40g（40%） / 砂糖20g（20%） / 水20-30g（20-30%）
橙蕃薯 100g（100%） / 木薯粉40g（40%） / 砂糖20g（20%） / 水15-25g（20-30%）

做法：

1. 蕃薯 / 芋頭洗淨，去皮，切片隔水蒸淋。
2. 出爐後立即加糖壓成蓉
3. 加入木蕃粉搓勻，再逐少加入水搓成麵糰。
4. 將麵糰搓成長條形，切粒，每粒表面滾上木薯粉（免黏成一糰）。
5. 完成後，將丸子篩一次，篩走多餘粉末。
6. 煲滾小鍋水，放入丸子，煮至熟，然後盛起。
7. 加入自己喜歡糖水一同進食即可。

滾成長條形

切粒，每粒表面滾上木薯粉（免黏成一糰）。

　可一次做多D，然後入保鮮盒／袋，存冰箱保存（可存2個月）。

如凍食，糖水煮好放涼，存入雪櫃備用。

如凍食，將丸子煮熟後浸入冰水降溫，

然後加入糖水或其他（涼粉／紅豆／雜果等）一起進食即可。