枝竹羊腩煲

原來已有三年冇煮過羊腩煲啦！

1月頭網購凍肉，見到有新產品＂紐西蘭羊腩＂，而且仲做特價，所以就買左兩包試吓。仔女知我買左羊腩，就一直不停吹我煮，足足提住三個禮拜。

因為冰箱已被打爆，所以我專登安排遲D送貨（29/1送貨），大家比Ｄ耐性，吾好咁心急啦！今日終於可以煮啦！大家終於有得食啦！

今次煮法同3年前吾同，除左醬料外，仲加左竹蔗，陳皮同檸檬葉。估吾到味道又真係幾好味喎！不過就功夫多Ｄ囉。

鳳凰馬蹄糕 - 2021

其實今年打算吾整馬蹄糕，但因為今日要煮羊腩煲，要用馬蹄，所以咪買多Ｄ整埋囉。今日買到又大又靚嘅馬蹄，$14斤，仲一粒都冇爛呀！

今次加左吉士粉同椰漿，顏色真係靚好多。

傳统古法年糕 - 2021

今年第一批年糕比爐啦！1大6細，全部將會陸續送出。屋企當然有得食，就係兩個迷你裝啦！

今年都係去渣華道街市買糖，但檔口原來已經已結業，咁唯有去第二間買啦！不過其實全場得兩間有賣咋，仲要淨低好少貨，冇乜選擇，感覺亦吾太靚。

今年蔗糖價格貴左好多，要$28斤呀！大糖就$10包(大小同價)，比舊年貴左$2。返到屋企即刻秤吓，點知(蔗糖)原來比人呃秤，得520g，少左80g，吾會再幫襯，冇下次。

瑤柱臘味蘿蔔糕 - 2021

話咁快，仲有一個月又過年啦！希望疫情盡快消失，大家可以從回正常生活。

雖然仲有一個月先過年，但阿女已急不及待，日日吹住我整蘿蔔糕同芋頭糕啦！佢話吾想過年時食糕，要在過年前食喎，究竟呢個係咩玩法！？

今年最特別係，阿女竟然為我準備埋臘腸呀！好啦！既然佢咁想食，就早Ｄ整比佢食啦！今日先嚟整個蘿蔔糕，下星期先整芋頭糕啦！

今年想轉吓新口味。所以食譜內加入左蝦米（希望香Ｄ），同埋改左少少調味（希望顏色白Ｄ）。

出爐啦！等我即刻試吓味先，味道比往年嘅嚟得簡單和清淡，又是另一種食法。雖然蘿蔔份量比以往少了一半，但出嚟又吾多覺（少）喎。

OK，呢個味道我都幾滿意，可以再encore。

土鳳梨酥 (4S)

第一次用4S焗鳳梨酥，效果比水波爐好得多，吾會焗到出晒油。

其實個餡已是10月時做的，不過一直都懶吾願郁。今日終於的起心肝，係時侯要做Ｄ嘢啦！但今日只做一半，留番一半遲D再做，吾想一次做咁多，食住15個先啦！

土鳳梨酥＞做法按此

鳳梨餡＞做法按此

芝士蛋糕（凍餅）

今日放假，整左個生日蛋糕比媽咪，希望佢會鍾意啦！

今次係第二次整生日蛋糕比媽咪，上一次都已經係幾年前啦！

呢個蛋糕，看似簡單，但其實一D都吾簡單。首先係oreo餅底，然後3層芝士夾住2層咖啡蛋糕，再淋上焦糖醬，雪凍後再放上麻雀造型椰汁糕裝飾，真係好多功夫架。

低溫慢烤蜜汁豬仔脾

最近瘋狂網購凍肉，冰箱都被打爆晒啦！搞到阿仔都吾可以買雪糕，哈哈。

為左我可以繼續買，所以就要盡快清貨。今晚先清左豬仔脾同羊架先，聽晚就繼續清雞脾同梅頭扒。咁我又有位放聽日送嚟嘅貨啦！哈哈。

嗯.....應該係時候要收手啦！