黑糖粿麥麵包

兩年前曾經用呢款包參加過 Panasonic 麵包比賽，雖然攞吾到冠、亞或季軍，但就能入到最後8強。不過，最大喜悅係得到蘇玉華嘅讚賞，仲有實戰嘅經驗。講真，咁大個女都係第一次參加食譜比賽咋，真係超級難忘呀！

前一排同阿女去Outback歎下午茶，不過我地冇點到佢地嘅signature（黑糖包），因食tea set要加錢囉。

大家可能會問，自己整嘅同Outback食嘅係咪一樣味道呢？如果我答一樣，就呃緊你啦！不過，自己整其實都有七成相似，其實都算吾錯啦！

今次材料同以往有少少吾同，就係轉左麥芽精。以往一直用黑麥芽精粉末，而今次嘅係液體。食落兩者味道的確有分別，我覺得液體做出嚟像真度更高，有八／九成相似呀！吾信？！大家不防可以試吓。

印尼黃金糕

記憶中，好似曾經N年前試做過一次，而印象中應該係失敗嘅。至於點解會失敗，首先係食譜，然後係做法。

想當年，有一日，有位印尼華橋同事，請我食自家製黃金糕（微波爐翻熱過），記得果次係我第一次食，果種感覺係.....勁甜同勁un，un到好似食緊擦子膠囉！哈哈。

跟住佢仲教我做，咁我咪又試吓囉，可能係技術吾夠啦（又或者吾明）！所以結果係失敗。

過左N年後，間中都有朋友問我，識得整黃金糕嗎？有冇食譜呀？所以我就趁未到新年，即管再試多次，向自己挑戰吓。

吸取過N年前嘅經驗，大概都知邊度出左問題，所以從邊度跌低，就從邊度企番起身。大家估吓，究竟我係邊度出錯呢？其實應該係發酵時間同處理，今次我用左水波爐幫手發酵，效果真係穩定同準確好多，吾洗再估估吓。

出爐一刻，真係有D緊張，吾知切開會點呢？嘩！雖然效果未係最好，但都算滿意，吸取左今次經驗，下次我一定會做得更好。

改善地方：今次模太淺，不夠空間發高，所以紋路吾夠長。下次要用深模，令紋路可發得更高、更明顯、更靚。

如果大家都鐘意食黃金糕，今個農曆新年又可以多款「糕」選擇啦！

新加坡班蘭蛋糕

今日Boxing Day，不過冇節目，唯有留家休息。但又吾想嘥晒D時間嚟Hea，所以就搵D嘢嚟搞吓。

話說星期日，榨左D班蘭汁（standby），所以今日可以整班蘭蛋糕，順便消磨下時間，不但可以有得玩，仲可以有得食。

講番呢個蛋糕，與以往吾一樣架，佢冇加椰漿，亦冇加椰子粉，但就加左椰糖。口感同味道比以往更突出，更出色，更香濃。

大家一定要試吓，不過就要預早幾日準備.....「班蘭精華」呀！

煮西米的方法

材料：
西米　1杯
水　　5杯

做法：

1. 將水煮滾，倒入西米，然後攪勻，蓋上鍋蓋煮10分鐘。
2. 完成後，不要開蓋，熄火焗20分鐘。
3. 將西米倒入篩，用水沖洗至爽身冇糊狀黏附即可。

桂圓糕

上一個post都講過，因屋企材料有限，所以呢個甜品都一樣，都係少咁樣嘢.....杞子，不過並無影響味道，因杞子基本上冇味，所以吾會影響到架。

呢個桂圓糕，除左冇杞子外，同時亦轉左蔗冰糖，所以顏色淺左好多，而味道亦會清香左。不過，都係果句，屋企有咩糖，咪用咩糖囉，絕對冇局限，只要自己鍾意咪得啦！

椰汁糕

屋企冇馬豆，亦冇紅豆，所以冇椰汁馬豆糕，亦冇椰汁紅豆糕。

今日由於材料有限，所以只能做到椰汁糕咋。呢款椰汁糕，真係好簡單，墓本上失敗機會係好低。

雙色蛋糕

第一次1212淘寶，不過其實未到1212，好多店鋪已開始減價，為左避開當日高峰期，所以我就預先買定，吾洗同人迫（送貨）。

今次主要淘烘烤用具，如打蛋盤，慕斯圈，批盤，蛋糕模等。然後將舊嘅送晒比姐姐，皆大歡喜，哈哈。

今日為左試個新模，就求其整條牛油蛋糕，睇吓效果會如何。雖然呢個模話不黏，但我都有照鋪牛油紙，如果吾鋪，我估應該都會癡癡地。

原本諗住做一層牛油蛋糕，一層Brownie，點知...真係估佢吾到，竟然變成咁...水滴形，真搞笑，哈哈。

Tiramisu（無蛋）

吾知點解阿女咁鍾意食呢款蛋糕，可能係我整得太好味掛，哈哈！

話說好多個月前（可能有半年），阿女落order要我整Tiramisu，不過我就一直都冇整到。就算買左Mascarpone返屋企，但結果都係整左第二款甜品，真係激死佢，哈哈。

呢個Tiramisu雖然冇外表（造型），但勝在有內涵。次次做完呢款蛋糕，阿仔同阿女都迫不及待想即刻食。洗吾洗咁心急呀？！

太極鴛鴦糕（芝麻／杏汁糕）

鴛鴦吾一定係咖啡溝奶茶，仲可以係華田溝好立克。但對我嚟講，仲之兩樣吾同嘅嘢拼埋，咪就係鴛鴦囉，絕對吾會有限制架。道理同食燒味雙拼飯一樣，任你拼，叉雞好，雞鵝好，只要自己鍾意。今日我就用左黑芝麻拼杏仁，做左呢道太極鴛鴦糕（爭兩點，哈哈）。

杏仁霜就試過做啦！但杏汁糕就真係第一次。因屋企杏仁有限，只能做到6粒，6粒又邊夠食喎，所以唯有加D芝麻糕嚟頂檔啦！哈哈。

栗子布朗尼／栗子Brownie

Brownie應該係我食譜裡面，仔女最鍾意嘅甜品之一。原來我已經有好耐、好耐、好耐冇做過比佢地食啦！除左Brownie，仲有朱古力蛋糕，都一樣好耐冇做過啦！

今日執材料櫃，發現原來有好多材料過左期，包括白朱古力，防潮可可粉，蒟蒻粉等等。好彩仲有包黑朱古力未到期啫（月尾到期），咁就梗係要即刻用左佢啦！吾好嘥。

不過屋企冇合桃，亦冇腰果／杏仁，只得包栗子，咁就用佢嚟整栗子Brownie啦！

今次除左轉用栗子外，仲轉埋用黑糖，味道應該會更香更濃郁。仲有仲有，今次做法同材料都吾同過往，無論係味道或口感，都係吾一樣，唯一共通點就係一樣咁好食。

蜂蜜抹茶紙包蛋糕（燙麵+水浴）

本來想做抹茶雪芳蛋糕，但最終都係改變主意，試左個新食譜，蜂蜜+抹茶=蜂蜜抹茶蛋糕。

最近愛上燙麵+水浴做法，所以今次都吾例外。因為今次多左粉，又少左奶，所以撈粉嘅時候會比較乾同杰。不過其實都吾緊要，因為吾影響蛋糕成品的。由於第一次用鬆餅模試水浴，所以時間未能掌握準確，引致蛋糕面出現裂痕。有左今次嘅經驗，下次我就懂得時間控制啦！

今次用左元氣抹茶粉，估吾到都做到色、香、味俱全。另外，之前有粉絲問我，菜油需要加熱至幾度先啱，所以今次我特別量度吓溫度，結果係90度（微波爐30秒+20秒），但每個人爐溫不同，最好都係用溫度計測試。

可能倒蛋糕糊入模時提得不夠高，所以比上次多左氣泡。

焙茶雪芳蛋糕（水浴 + 燙麵）

好耐冇出品啦！事關我們（兩公婆加阿女）出走了（大阪京都奈良）。玩左5日，充完電返嚟，再HEA多3日，係時候做番d嘢啦！氹吓阿仔都要嘅（佢冇啖好食）。

今日用左日本買返嚟嘅焙茶粉，做左一個簡單又健康又好味嘅雪芳蛋糕（與戚風／棉花／枕頭蛋糕相同）。

日式抹茶芝士蛋糕

病左足足半個多月啦！連醫生都睇過3個，一共睇左5次醫生。好彩呢兩日終於都好番好多，係時候復出啦！不過，我當然吾會做得咁複雜，只係做個簡單芝士蛋糕咋。

原本係想做Tiramisu，但屋企冇手指餅，又吾想焗蛋糕做個夾心，所以就轉左做日式芝士蛋糕啦！

今日吾想做原味咁普通，所以就玩吓花臣，做夠三款味道，分別有抹茶，朱古力同鴛鴦。

法式軟包

咳左成個禮拜，都冇心情整嘢食，今日見精神好Ｄ，就隨意整個法包食吓啦！事關今晚煮左雜菜燴牛尾，吾想食飯嘅，就可以食麵包。

材料：

高筋粉　180g

法包粉　60g

砂糖　　18g

鹽　　　5g

菜油　　15g

酵母　　3g

水　　　140g

做法：

1. 麵包機麵糰模式（或手搓），完成後排氣，滾圓，鬆弛15分鐘，造型。
2. 第二次發酵至兩倍大，麵包面篩上法包粉，然後鎅花。
3. 放入已預熱200度焗爐，焗15-20分鐘。

蜂蜜蛋糕（燙麵／水浴法）

剛剛睇番Blog先知，原來已隔左咁耐冇出過蜂蜜蛋糕post，究竟係咪真係咁耐冇整過呢？定係冇post咋？不過通通都吾緊要，因為今日要同大家重溫吓。

今日改左做法，因想試吓第二種方法，睇吓效果又如何。燙麵加水溶，都係未試過用落蜂蜜蛋糕，結果會係點？燈、燈、燈、燈，show time。。。效果出乎意料的好呀！