紫薯忌廉瑞士卷

嘩！耐到都吾記得幾時整過啦！總之就好耐啦！經翻查後，原來已是2016年11月啦！嘻嘻。

記得第一次做瑞士卷，就係班蘭瑞士卷，果次比左我好大成功感，於是就繼續做吾同口味，真係百吃不厭。

今日突然好想食瑞士卷，咁啱屋企有盒甜忌廉，又有條紫蕃薯（尋晚烚左冇食），所以我就將佢地溝埋做左一條瑞士卷啦！

其實今次份量好隨意，因甜忌廉有甜味，而紫蕃薯亦有甜味，所以個餡我無加到糖，清清地少少甜，但如果鍾意多甜，當然可以適量加糖啦！

材料：（25 x 35 cm）

蛋黃糊：
蛋黃　　　4個
砂糖　　　40g
菜油　　　30g
牛奶　　　70g
低筋粉　　80g

蛋白霜：
蛋白　　　4個
砂糖　　　30g
檸檬汁　　1茶匙

餡：
紫心蕃薯　1條
甜忌廉　　120g
（*可用淡忌廉，份量：忌廉120g + 糖粉12g）

做法：

1. 蕃薯隔水蒸淋，撕去皮，用叉壓蓉（可保留細細粒肉）。
2. 甜忌廉打至企身，加入紫薯蓉拌勻，放雪櫃備用。
3. 蛋白低速打散，然後轉高速打至泡沫狀，將糖分2-3次加入打至企身（將打蛋棒提起，會有倒三角長尾巴，不要打過龍），再轉低速打一分鐘。
4. 蛋黃加糖打至乳白，加入菜油打勻，再加入牛奶打勻，篩入低筋粉，用手動打蛋器拌勻。
5. 將蛋白霜分3次拌入蛋黃糊內拌勻（用手動打蛋器）
6. 蛋糕模鋪上牛油紙，然後倒入蛋糕糊，掃平。
7. 放入已預熱180度焗爐，焗10-15分鐘（夠色），170焗10分鐘，160度焗5分鐘，完成後留焗爐3分鐘。
8. 出爐後，蛋糕面放上牛油紙，牛油紙面放上涼架，然後將涼架連蛋糕模一齊反轉。
9. 將蛋糕底牛油紙撕開，再放回蛋糕面（蓋著）放涼。
10. 將蛋糕四邊切走，然後平均塗上紫薯忌廉餡，捲起成瑞士卷，用牛油紙包好，放雪櫃雪兩小時至定型即可。