美式曲奇

第一次做焦化牛油，第一次加黑朱古力，估吾到又幾好味喎，真係好似Mrs Fields 🍪呀！

極品瑤柱臘味蘿蔔糕

2021年最後一爐「Double Turnip Cake 雙重蘿蔔糕」

估吾到都最後一日啦！仲夠敢嚟試新嘢，真係服左自己，咁有膽色。

話說有次睇到美心蘿蔔糕廣告，佢標榜自己用8mm蘿蔔條，加上蘿蔔蓉糕底，搞到我心思思想試吓。

所以趁住今日年三十放早，把握最後機會，做少少嚟證實吓啦！

食後感：蘿蔔糕不但食到一條條蘿蔔條，仲食到啖啖蘿蔔甜味，比起淨用蘿蔔絲嘅蘿蔔糕，真係濃郁好多，正呀！

軟心朱古力麻糬曲奇 (綠茶、朱古力)

今日已經連續第三日做麻糬曲奇啦！今日吾想再一樣，所以轉轉做法。首先餅皮做左兩款口味（綠茶同朱古力）。另外，就係個餡，將麻糬包入70%黑朱古力，變為軟心朱古力麻糬。雖然材料大致相同，但今次又係另一種食法，都吾錯呀！

呢批曲奇係阿女order，所以佢嘅朋友又有口福啦！

屋企嘅麻糬餡已沽清啦！得閒又要做定一批看門口啦！

瑤柱臘味芋頭糕 - 2021

仲有幾日就過年啦！今年又點會少得佢。登...登...登...凳...阿仔至愛「芋頭糕」呀！

今年有d改變，就係變左少量製作啦！因為少食多滋味嗎！

一出爐就急不及待試食，點知試食都試左1/4底啦！因為實在太好味呀！哈哈。

麻糬朱古力曲奇

其實好耐之前，阿女已經點名，話想食麻糬朱古力曲奇，但我就從來冇諗過會整，哈哈。

直至最近，吾知挑起邊條筋（可能patpat痕），走嚟玩呢D。

其實近幾年，我已用homemade做拜年手信，冇再買糖果啦！因為嫲嫲婆婆們都年紀大啦！所以好少食糖果。

今日係我第一次整麻糬曲奇，所以都有Ｄ緊張，好驚麻糬效果吾理想。雖然之前都整過大福／糯米糍，但今次做餡，就真係未試過（食都少）。如做過糯米糍都應該知，個糯米皮如隔夜／雪過都會變硬，所以我好想找一個不變硬嘅方法。

上網搜尋過資料，指麵糰內加入水麥芽，就可以令麵糰雪不硬，係咪真係咁神奇？好啦！今日就嚟個測試。

其實麻糬只須好少水麥芽，不過.....因為買吾到小裝，所以.....哈哈....唯有成桶嚟啦！吾想再周圍搵啦！雖然咁大桶，而且仲有d誇張，但其實只係$33.5咋（如常用，都好抵）。

拉到咁長都吾斷，就知幾軟糯啦！

呢個就係傳說中的拉絲麻糬啦！

枝竹羊腩煲

原來已有三年冇煮過羊腩煲啦！

1月頭網購凍肉，見到有新產品＂紐西蘭羊腩＂，而且仲做特價，所以就買左兩包試吓。仔女知我買左羊腩，就一直不停吹我煮，足足提住三個禮拜。

因為冰箱已被打爆，所以我專登安排遲D送貨（29/1送貨），大家比Ｄ耐性，吾好咁心急啦！今日終於可以煮啦！大家終於有得食啦！

今次煮法同3年前吾同，除左醬料外，仲加左竹蔗，陳皮同檸檬葉。估吾到味道又真係幾好味喎！不過就功夫多Ｄ囉。

鳳凰馬蹄糕 - 2021

其實今年打算吾整馬蹄糕，但因為今日要煮羊腩煲，要用馬蹄，所以咪買多Ｄ整埋囉。今日買到又大又靚嘅馬蹄，$14斤，仲一粒都冇爛呀！

今次加左吉士粉同椰漿，顏色真係靚好多。

傳统古法年糕 - 2021

今年第一批年糕比爐啦！1大6細，全部將會陸續送出。屋企當然有得食，就係兩個迷你裝啦！

今年都係去渣華道街市買糖，但檔口原來已經已結業，咁唯有去第二間買啦！不過其實全場得兩間有賣咋，仲要淨低好少貨，冇乜選擇，感覺亦吾太靚。

今年蔗糖價格貴左好多，要$28斤呀！大糖就$10包(大小同價)，比舊年貴左$2。返到屋企即刻秤吓，點知(蔗糖)原來比人呃秤，得520g，少左80g，吾會再幫襯，冇下次。

瑤柱臘味蘿蔔糕 - 2021

話咁快，仲有一個月又過年啦！希望疫情盡快消失，大家可以從回正常生活。

雖然仲有一個月先過年，但阿女已急不及待，日日吹住我整蘿蔔糕同芋頭糕啦！佢話吾想過年時食糕，要在過年前食喎，究竟呢個係咩玩法！？

今年最特別係，阿女竟然為我準備埋臘腸呀！好啦！既然佢咁想食，就早Ｄ整比佢食啦！今日先嚟整個蘿蔔糕，下星期先整芋頭糕啦！

今年想轉吓新口味。所以食譜內加入左蝦米（希望香Ｄ），同埋改左少少調味（希望顏色白Ｄ）。

出爐啦！等我即刻試吓味先，味道比往年嘅嚟得簡單和清淡，又是另一種食法。雖然蘿蔔份量比以往少了一半，但出嚟又吾多覺（少）喎。

OK，呢個味道我都幾滿意，可以再encore。