瑤柱臘味芋頭糕 - 2021

仲有幾日就過年啦！今年又點會少得佢。登...登...登...凳...阿仔至愛「芋頭糕」呀！

今年有d改變，就係變左少量製作啦！因為少食多滋味嗎！

一出爐就急不及待試食，點知試食都試左1/4底啦！因為實在太好味呀！哈哈。

材料：（2個680ml盒）

芋頭肉　　600g
粘米粉　　100

馬蹄粉　　25g
水　　　　660ml（包括瑤柱水及冬菇水）
臘腸　　　2條

潤腸　　　1條
瑤柱　　　4粒
冬菇　　　3粒
乾蔥茸　　2茶匙

調味料：
雞粉　　　1/2湯匙
五香粉　　3/4茶匙
砂糖　　　3/4茶匙
鹽　　　　1/2茶匙
胡椒粉　　少許
麻油　　　少許

預備：

• 冬菇洗淨，浸軟去蒂，揸乾水份（水留用），切細粒備用。
• 瑤柱洗淨放入飯碗，加水過面。臘腸及潤腸洗淨，放上碟。將瑤柱及臘味，大火隔水蒸15分鐘，然後放涼切細粒備用。
• 芋頭去皮洗淨，切成1cm方粒。
• 粘米粉及馬蹄粉混合，加330g水拌勻，再加入調味料（五香粉除外）拌勻。

做法︰

1. 燒熱油鑊，加入臘味炒香，然後加入乾蔥茸炒勻，再加入冬菇及瑤柱炒至焦香，盛起備用，鑊免洗。
2. 倒入芋頭炒勻，然後加入五香粉炒勻。
3. 煲滾330g水，倒入芋頭煮淋，熄火。
4. 取出半份芋頭壓蓉，然後回鍋拌勻，再加入2/3臘味拌勻。
5. 慢慢加入粉漿，邊加邊攪，不停攪拌，如未夠稠身可開細火煮一陣。
6. 倒入糕盤至8成滿，掃平，大火隔水蒸1小時或至熟。
7. 出爐後，糕面放上臘味，待完全放涼後，放入雪櫃儲存。