粉絲蝦煲

2017年新開始，希望新一年人人健健康康，事事順利。所以今晚特登煮左呢味餸，喻意希望各位“粉絲”日日都笑“蝦”蝦。

如果出街食一個粉絲蝦煲，閒閒地收你二百幾蚊，仲要冇咁多蝦，仲吾會係新鮮游水蝦喎！依家自己整，只係盛惠80大元，認真抵食到痹呀！

黑糖牛油蛋糕@配鮮菠蘿果醬

早幾日見到Dole金菠蘿特價$15.9，於是就買左兩個。室溫放左兩日，等夠熟先用嚟整鳳梨酥餡。煮好後竟然出乎意料的少，只得1飯碗左右咋。所以唯有打消整鳳梨酥念頭啦（因為整得果幾粒）！其實菠蘿餡仲可以整Ｄ乜？除左做鳳梨酥外，我都試過做果醬，戚風蛋糕，拿破崙。

今日不如又用嚟做蛋糕啦！簡單Ｄ。不過都係嚟亂搭咋，搭個黑糖牛油蛋糕，吾知得吾得呢？！

黑糖牛油蛋糕本身都已好好味（比用砂糖香，冇咁甜，顏色又靚），再配個甜甜酸酸菠蘿醬，清新得嚟又冇咁油膩，都係一個吾錯嘅選擇。

花生酥（花生醬版）

因為屋企有樽大碼花生醬，所以要諗辦法盡快用左佢。咁啱買左斤南乳花生同甜花生，不如就用嚟整花生酥食吓啦！

花生醬版缺點係比較癡口，但味道會比吾用香好多，自已揀用吾用啦！吾用就睇番我d舊post有啦！

紙包蛋糕（不回縮版）

因為印尼姐姐吾食豬肉，所以今晚同場加影，整多款紙包蛋糕。今次試吓低溫長烤，不浸浴方法，睇吓可吾可以不回縮，實驗證明係work嘅！但水波爐焗得吾夠靚，邊有少少爆。

臘腸卷

今日再做中式包，不過加左條臘腸做餡，冇咁單調嗎！不過臘腸都係食少Ｄ好，所以每個只包左1/4條咋。其實我吾鍾意中式包太多餡，鍾意食包皮多過餡。

今次效果依然靚仔，皮光肉滑。連續兩日都係用「美玫」低筋粉，對於口感同效果都非常滿意，以後做中式包可以繼續買「美玫」（$14），吾洗再買「鳥越金明竹」（$28）啦！可以嘥番好多呀！

溫泉蛋臘味飯

今日冇做甜品，只煮左個臘味飯，但並不是一般嘅做法，係加左溫泉蛋同蕃薯架。

重點當然係隻蛋啦！嘻嘻。

水波爐做溫泉蛋，零失敗。做法簡單，只需將蛋放入爐，65度蒸40分鐘，靚晒。

蜜糖杏仁酥（中式合桃酥變身）

因為屋企有d食淨嘅韓國蜜糖杏仁，再吾快d食驚會變淋啦！所以要諗吓計消滅佢。

本來想用嚟整杏仁曲奇架，但需時較長，因要冰硬至做得，所以唯有改變想法，轉左做合桃酥變身版【杏仁酥】啦！

今次加左臭粉（因為屋企有），效果同味道真係同以往做過嘅合桃酥完全兩回事，終於可以做/食到嫁女餅嘅合桃酥味道啦！就係呢個味道啦！

雖然大家都話臭粉吾好，但自家製其實只係落好少份量，應該總比街買/食到嘅健康得多掛！更何況只係間吾中食一次啫，又吾食得多，都吾怕啦！怕就兩份啦！哈哈。