瑤柱臘味蘿蔔糕

蘿蔔糕可以說是新年食品的代表作，居家必須。嘻嘻！

自從愛上下廚後，每年我都會自家製所有賀年糕點，如蘿蔔糕，芋頭糕，年糕，馬蹄糕，紅棗糕，紫薯糕等等。講真，我都冇再買糕好多年啦！記得最癲個年，我傻到整左幾十底（派吓街坊），諗番起都覺得癲呀！不過案件應該吾會再重演，因為我已學識放下，吾會再比咁大壓力自己。所以今年開始，如無人特別要求，我只會整比媽咪。

今年雖然未開始整，但已有粉絲趕住問，所以搵左D舊作嚟頂住先。我係用水波爐蒸，一次最多可蒸到十底架（不過我只做得5底），你話利害吾利害？！哈哈。

材料：（2盒 1L)
白蘿蔔　　1200-1500g
粘米粉　　160g
澄麵　　　40g
臘腸　　　3條
瑤柱　　　4粒
蝦米　　　2湯匙
乾蔥茸　　1湯匙
熱水　　　160g（分別浸瑤柱及蝦米）
清水　　　160g（包括蘿蔔水）

調味：
蠔油　　　1⅓湯匙
鹽　　　　⅓茶匙
糖　　　　⅓茶匙
雞粉　　　1½茶匙
胡椒粉　　少許

預備：

1. 蘿蔔洗淨刨皮，刨絲或切粗絲備用，蘿蔔水可代替水。
2. 瑤柱洗淨加100ml熱水蒸30分鐘，放涼後撕開一絲絲備用，瑤柱水留用。
3. 蝦米洗淨後加60ml熱水浸軟，然後切細粒備用，蝦米水留用。
4. 用熱水略浸臘腸一會，清洗表面灰塵，然後蒸10分鐘，放涼後切細粒備用。
5. 將粘米粉，澄麵，已放涼瑤柱水及蝦米水，全部調味料拌勻，備用。

做法：

1. 燒熱鑊，炒至臘腸出油，加入乾蔥茸及蝦米炒香，再加入瑤柱絲炒勻，盛起備用。
2. 鑊免洗，加入蘿蔔絲略炒，加入水160ml（包括蘿蔔水），將蘿蔔煮至半透明。
3. 鑊內只需留下160ml水，有多取走不要（如不懂目測，可將蘿蔔水隔出，取出160ml）。
4. 加入2/3臘味料炒勻，熄火。
5. 倒入粉漿，拌勻後再開火，中細火煮至杰身。
6. 倒入糕模（8成滿），掃平，面放上餘下1/3臘味料，大火隔水蒸60分鐘或至熟。
7. 出爐後可襯熱食，亦可放涼後存雪櫃，食前切件煎香。

我家沒有廚師機（刨絲），只得一個蘿蔔刨（人仔10蚊），木質銅片（非不锈鋼），中碼7mm孔。最啱用嚟刨蘿蔔絲（做蘿蔔糕），平時就會用嚟刨薯仔（炒土豆絲）。

呢個刨係我專誠由大陸淘寶落嚟，個刨真係非常好用（小心好鋒利），刨出嚟嘅蘿蔔絲條條一樣粗，而且仲可以保留到蘿蔔汁，吾會刨完成出晒水。