朱古力梳乎厘

今日為粉絲示範「朱古力味梳乎厘」，不過今次冇上次升得咁靚，因為我冇用匙柄圍杯邊鎅一圈，所以效果大家睇得出。。。好明顯啦！真係冇成個面升起架。

不過都只係外觀上吾同啫，對味道完全冇影響嘅。如果大家想再整得靚d，高級d，除左圍杯邊記住鎅一圈外，仲有就係出爐後，響梳乎厘面灑上防潮糖霜，咁賣相同效果就可即時升級啦！

其實材料同做法與橙酒梳乎厘冇乜分別，只係將可可粉代替橙酒，轉變口味啫。不過講到味道。。。我始終都係覺得基本嘅。。。橙酒梳乎厘最好味。

之前買落嘅甜品杯，終於可以出場啦！大家覺得靚吾靚呢？我鍾意佢帶點中國風，再配上西式甜品，可以說是絕配呀！哈哈！

＊千奇咪問我邊度買，都係淘寶咋，自己去search啦！已冇link呀（買左好耐）！

第一部份：(16杯)

麵糊材料：

蛋　　　1隻

蛋黃　　1隻

砂糖　　50g

低筋粉　20g

牛奶　　330g

做法：

1. 蛋，蛋黃加糖打勻，篩入低筋粉拌勻。
2. 牛奶用小鍋煮熱（微滾），倒入（1）內拌勻。
3. 然後再倒回小鍋煮滾（邊煮邊攪，小心煮燶或起粒），煮至杰身糊狀。
4. 倒入密實盒，糊面緊貼一張保鮮紙，放涼後放入雪櫃備用。

第二部份：(4杯)

1. 預備4隻焗杯，杯内掃上薄薄牛油溶液，再灑上糖浪勻全杯（冇糖位置會升吾起，要補執漏），多餘凳出。

第三部份：(4杯)

材料：

麵糊　　　2湯匙

蛋黃　　　1個

可可粉　　5-8g
牛奶／水　10g

蛋白　　　2只

砂糖　　　15g

做法：

1. 蛋黃，麵糊，可可粉及牛奶／水拌勻。
2. 蛋白加糖打至硬泡性，然後分兩次拌入（1）内拌勻，倒入焗杯，掃平。
3. 用茶匙柄插入杯邊（約3mm深），然後貼住杯邊鎅一圈（有助升起）。
4. 放入已預熱170°C焗爐，焗約12分鐘。
5. 出爐要盡快享用

貼士：

1. 麵糊每次取出所須份量後，都要將保鮮紙緊貼麵糊表面，這就不會變乾／硬，保存得好可保存兩星期。
2. 焗杯大細不同，要自行加減份量倍數。