一包急凍酥皮有六塊，如果每次用一塊，閒閒地都做到六款甜品咁多架，真係好襟食。上次就做左士多啤梨拿破崙，而今次就試吓另一款口味啦！
今晚做左樣從未做過嘅拿破崙【藍莓朱古力拿破崙】，其實只要花少少心思，就可以變出多款口味啦！
今晚除左有拿玻崙外，仲有【朱古力酥皮杯】呀！大家look落去就可以見到啦！
材料：
急凍酥皮 1塊
無糖可可粉 少許
糖粉 少許
［餡］
黑朱古力30g
淡忌廉150g
砂糖20g
- 淡忌廉加糖打至企身
- 黑朱古力座溶，加入忌廉拌勻，入唧袋放雪櫃備用。
［裝飾］
藍莓 適量
防潮糖霜 少許
防潮可可粉 少許
做法可參考 > 士多啤梨拿破崙做法
酥皮刺孔後，抹上無糖可可粉。
再灑上糖粉
180度焗15分鐘，完成後，在酥皮面放上牛油紙，再放上焗盤壓住，焗15分鐘。
完成後，取走面焗盤及牛油紙，焗6分鐘。出爐後放架放涼。
用有牙刀將酥皮四邊切走（拉鋸），然後平均切成等份（3 的倍數）。在酥皮面唧一層朱古力忌廉，然後放上第二塊酥皮，再唧一層忌廉，再放第三塊酥皮，面唧幾點忌廉，然後放上藍莓，再灑上防潮糖霜裝飾。
可將用淨酥皮碎做成酥皮杯，絕對吾會浪費。
首先將半份酥皮碎放入杯，然後唧一層忌廉。再放入半份酥皮碎，唧一層忌廉。最後放上藍莓及灑上防潮可可粉裝飾即可。
