士多啤梨拿破崙

話咁快又放完四日復活節假啦！明天又要繼續返工，要等下次放假至可以再做甜品啦！

呢款係我超愛嘅甜品『拿破崙』，佢不但外型靚，而且仲好好味，絕對可以比美酒店餅房呀！吾信？！即管試吓囉。哈哈！

講起呢個甜品，真係吾講得笑架，因為佢曾經幫我攞過獎，仲係第二名添，我永遠都吾會忘記，真係一個好難忘回憶。

時間過得好快，都有年多冇做過啦！今日再做番，一樣冇難度，難度只係時間。不過只要時間分配得好，就一定冇問題。好似我咁，今朝煮定個餡，然後同阿女出街歎茶，之後仲去埋街市買餸，返到屋企仲可以他他調調，慢手慢腳咁去繼續搞埋個皮。今日可算是在零壓力下，完成左一款精美又美味嘅『士多啤梨拿破崙』。

材料：

［法式香草吉士醬］
A) 淡忌廉 150g，砂糖 15g
B) 牛奶 250g，雲呢拿油 5g，砂糖 30g
C) 蛋黃 2個，砂糖 30g，粟粉 25g

做法：

1. 把A打發至十成，放入雪櫃備用。
2. 把B煮滾
3. 把C拌勻
4. 把B倒入C內拌勻，再倒回鍋內煮滾（不停攪拌），放暖後加忌廉拌勻，然後放入唧袋，存雪櫃備用。

｛酥皮］
急凍酥皮 1塊
糖霜 適量

做法：

1. 酥皮用叉剌滿小孔（兩面），放入已預熱180度焗爐，焗15分鐘。
2. 出爐，在酥皮上放上牛油紙，然後再放上另一個焗盤壓住酥皮，再焗15分鐘。
3. 出爐，拿走上面焗盤及牛油紙，焗爐調高240度。
4. 在酥皮表面灑滿糖霜，放入已預熱240度焗爐，焗3-4分鐘，重複做多兩次（即是總共灑了三次糖霜及焗了三次）。
5. 出爐後，放在架上放涼，然後切去四邊，再切成等份（要雙數）。

［裝飾］
防潮糖霜 適量

組合：

一塊酥皮，唧上一層吉士醬，再放上一塊酥皮，面唧上3小點吉士醬，放上士多啤梨，灑上防潮糖霜，完成。

貼士：
i) 可選擇喜愛生果，如芒果，桃或藍莓等。
ii) 可放雪櫃雪一會才吃，但要盡快吃光，否則酥皮會變淋。

已打發淡忌廉

蛋黃糊

熱牛奶與蛋黃糊混合，並煮至杰身，放涼備用。

加入忌廉拌勻

入唧袋，放入雪櫃備用。

酥皮用叉刺滿小孔（兩面）

放入已預熱180度焗爐，焗15分鐘。

酥皮面放上牛油紙，再放上另一個焗盤壓住，再焗15分鐘。

取出，將爐調高240度，取走面焗盤及牛油紙。然後將糖霜灑滿酥皮面，再放入已預熱好焗爐（開底火，或加多個底盤隔熱），焗3-4分鐘（睇住，勿行開，吾好燒燶）。

出爐後，再灑第二次糖霜，繼續240度焗3-4分鐘。

焗完兩次糖霜後樣貌

焗完三次糖霜後，出爐放涼。

修齊四邊，然後切開等份（雙數，一對對）。

洗淨士多啤梨，抹乾，切開1/4一粒。

酥皮唧上吉士醬

蓋上另一塊冇酥皮，面唧3點吉士醬，然後放上士多啤梨。