芝士蛋糕（凍餅）

早幾個月，媽媽嚟我度食飯，嚟之前佢同家姐去超市shopping，點知買錯盒忌廉芝士（想買芝士醬），佢地又吾會做甜品／蛋糕，所以就留低比我。擺左咁耐（6月到期），今日終於有機會用左佢啦！忌廉芝士對我嚟講，我只會做蛋糕，所以今次都吾例外，都係做芝士蛋糕咋！哈哈。

咁啱尋日買左兩盒士多啤梨，可以用一盒嚟做蛋糕，另一盒就留比阿仔同阿女，咁就吾會比佢地炸型啦（佢地次次都吾比我做甜品，話嘥左喎，無奈。）！

今日呢個係原味芝士蛋糕，芝士味吾重，比較清新。以往我會在蛋糕面做咖啡雲石，但今次就轉做生果，效果更清新呢！

材料：(8")
海綿蛋糕　2片（海綿蛋糕做法）

餅底：
消化餅　　125g（打碎）
無鹽牛油　40g（座溶）

芝士糊：
忌廉芝士　300g（室溫）
砂糖　　　60g
牛奶　　　50g
魚膠片　　10g（冰水浸軟）
淡忌廉　　200g（打至7成企）

做法：

1. 餅碎加牛油拌勻，倒入蛋糕模內壓平，然後放入冰箱冷藏備用。
2. 淡忌廉打至7成發泡，存入雪櫃備用。
3. 魚膠片加冰水浸軟，存入雪櫃備用。
4. 將魚膠片揸乾水，加少許打起忌廉，隔熱水座溶備用。
5. 芝士加糖打勻，然後加奶打至滑身。
6. 然後加入魚膠液拌勻，再加入打起忌廉拌勻。
7. 將1/3芝士糊倒入消化餅面，然後放上一片蛋糕，再倒入1/3芝士糊，再放上一片蛋糕，倒入餘下芝士糊，掃平，存入雪櫃雪兩小時以上。
8. 脫模後鋪上士多啤梨，然後灑上防潮糖霜裝飾即可。